ສຳນັກຂ່າວເອພີລາຍງານເມື່ອວັນທີ 19 ເມສາຜ່ານມາວ່າ: ອົງການບໍລິຫານການບິນ ແລະ ອາວະກາດແຫ່ງຊາດຂອງສະຫະລັດອາເມຣິກາ (ນາຊາ) ໄດ້ເຜີຍແຜ່ຄລິບ ຜົນສຳເລັດໃນການນຳເຮລີຄ໊ອບເຕີທີ່ມີຊື່ວ່າ “Ingenuity” ເຊິ່ງມີນ້ຳໜັກພຽງແຕ່ 4 ປອນ ຫຼື 1,8 ກິໂລກຣາມ ຂຶ້ນບິນ ແລະ ລົງຈອດຢູ່ດາວອັງຄານໄດ້ສຳເລັດ ເຊິ່ງເປັນເຮລີຄ໊ອບເຕີລຳທຳອິດ ທີ່ສາມາດຂຶ້ນບິນ ແລະ ລົງຈອດຢູ່ດາວອັງຄານໄດ້.
ໃນຄລິບໄດ້ບັນທຶກໂດຍກ້ອງທີ່ມີຄວາມລະອຽດສູງ ເຊິ່ງຕິດຕັ້ງຢູ່ທີ່ຫົວຍານຫຸ່ນຍົນສຳຫຼວດ “Perseverance” ໂດຍເຮລີຄ໊ອບເຕີໄດ້ບິນຂຶ້ນສູງຈາກພື້ນຜິວດາວອັງຄານໃນລະດັບໜຶ່ງ ທ່າມກາງກະແສລົມທີ່ມີຄວາມໄວປະມານ 22 ກິໂລແມັດ/ຊົ່ວໂມງ ກ່ອນຈະລົງຈອດພື້ນຜິວດາວອັງຄານ.
ຜົນສຳເລັດຄັ້ງນີ້ ຖືວ່າເປັນຄັ້ງປະຫວັດສາດຂອງໂລກ ທີ່ຍານລຳໜຶ່ງສາມາດຄວບຄຸມການເຄື່ອນຕົວຂອງຍານອີກລຳໜຶ່ງຢູ່ເທິງດາວດວງອື່ນໄດ້ສຳເລັດ.
ຮູບ: AP
