ເພື່ອເປັນການອໍານວຍຄວາມສະດວກໃຫ້ແກ່ການປະຕິບັດໜ້າທີ່ວຽກງານຂອງອ້າຍນ້ອງກໍາລັງປ້ອງກັນຊາດ 2 ແຂວງພາກໃຕ້ ລັດຖະບານໄດ້ມອບລົດຈັກສະເກມຈໍານວນ 15 ຄັນ ມູນຄ່າ 285 ລ້ານກີບ ໃຫ້ແກ່ກອງບັນຊາການທະຫານແຂວງຈໍາປາສັກ ແລະ ອັດຕະປື.
ໃນລະຫວ່າງວັນທີ 15-16 ກໍລະກົດ 2020 ທີ່ຜ່ານມາ, ທ່ານ ຄຳລາວັນ ຈັນທະລາວັນ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ ຕາງໜ້າໃຫ້ລັດຖະບານ ໄດ້ນຳເອົາລົດຈັກສະເກມ ໄປມອບໃຫ້ ກອງບັນຊາການທະຫານແຂວງຈຳປາສັກ ຈຳນວນ 7 ຄັນ ລວມມູນຄ່າ 135 ລ້ານກີບ ຕາງໜ້າຮັບໂດຍທ່ານ ພັອ ຄໍາແຫວນ ຈະເລີນວົງ, ຫົວໜ້າການເມືອງ ກອງບັນຊາການທະຫານແຂວງຈຳປາສັກ ແລະ ມອບໃຫ້ກອງບັນຊາການທະຫານແຂວງອັດຕະປື ຈຳນວນ 8 ຄັນ ລວມມູນຄ່າ 150 ລ້ານກີບ ຕາງໜ້າຮັບ ໂດຍທ່ານ ພັອ ໂຊກໄຊ ພິມມະລາ, ຫົວໜ້າການເມືອງ ກອງບັນຊາການທະຫານແຂວງອັດຕະປື.
ໃນໂອກາດດັ່ງກ່າວ ທ່ານ ຄຳລາວັນ ຈັນທະລາວັນ ໄດ້ມີຄຳເຫັນບາງຕອນວ່າ: ການນໍາເອົາລົດຈັກສະເກມ ມາມອບໃຫ້ໃນຄັ້ງນີ້ ແມ່ນຍ້ອນເຫັນໄດ້ຄວາມສຳຄັນ ແລະ ຄວາມຮຽກຮ້ອງຕ້ອງການ ຂອງໜ້າທີ່ວຽກງານຕົວຈິງຂອງທ້ອງຖິ່ນ, ໂດຍມອບໃຫ້ເພື່ອນໍາໃຊ້ເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບຂອງແຂວງ ເວົ້າລວມ, ເວົ້າສະເພາະ ແມ່ນນໍາໃຊ້ເຂົ້າໃນວຽກງານວິຊາສະເພາະຂອງຕົນ ເພື່ອປົກປັກຮັກ ສາເຂດນໍ້າແດນດິນ ອັນຄົບຖ້ວນຂອງຊາດໄວ້ໃຫ້ໝັ້ນຄົງ, ຮັບປະກັນໄດ້ຄວາມສະຫງົບ, ປອດໄພ, ເຮັດໃຫ້ປະຊາຊົນບັນດາເຜົ່າ ມີຄວາມອຸ່ນອຽນທຸ່ນທ່ຽງ, ມີຄວາມປອດໄພໃນການທຳມາຫາກິນ, ພັດທະນາຊີວິດການເປັນຢູ່ຂອງຄອບຄົວ ແລະ ປະກອບສ່ວນເຂົ້າໃນການສ້າງສາພັດທະນາທ້ອງຖິ່ນຂອງຕົນ ກໍ່ຄືປະເທດຊາດ ໃຫ້ຈະເລີນຮຸ່ງເຮືອງຂຶ້ນເລື້ອຍໆ.
ໃນໂອກາດດຽວກັນ, ຫົວໜ້າການເມືອງກອງບັນຊາການທະຫານແຂວງຈໍາປາສັກ ແລະ ອັດຕະປື ກໍ່ໄດ້ ກ່າວສະແດງຄວາມຂອບໃຈຕໍ່ພັກ ແລະ ລັດຖະບານ ທີ່ຍາມໃດກໍ່ໄດ້ເອົາໃຈໃສ່, ມີຄວາມເປັນຫ່ວງເປັນໃຍ ແລະ ໃຫ້ຄວາມສໍາຄັນຕໍ່ວຽກງານ ປ້ອງກັນຊາດ-ປ້ອງກັນຄວາມສະຫົງບ ຢ່າງສະເໝີຕົ້ນສະເໝີປາຍ, ເຊິ່ງການມອບລົດຈັກສະເກມ ໃຫ້ແກ່ກອງບັນຊາການທະຫານແຂວງ ໃນຄັ້ງນີ້ ຍັງເປັນການປຸກລະດົມ, ຊຸກຍູ້ ແລະ ໃຫ້ກຳລັງໃຈອັນໃຫຍ່ຫຼວງແກ່ອ້າຍນ້ອງ, ນາຍ ແລະ ພົນທະຫານ ທີ່ກຳລັງປະຕິບັດໜ້າທີ່ວຽກງານຂອງຕົນ, ຈະນໍາໃຊ້ພາຫະນະດັ່ງກ່າວ ໃຫ້ຖືກຕ້ອງຕາມເປົ້າໝາຍ ແລະ ເກີດປະສິດທິຜົນ, ມີການຄຸ້ມຄອງ-ປົກປັກຮັກສາ ໃຫ້ສາມາດນຳໃຊ້ໄດ້ຍາວນານ.
ສໍາລັບລົດຈັກສະເກມ ທີ່ນໍາມາມອບໃນຄັ້ງນີ້ ແມ່ນໄດ້ຮັບການສະໜັບສະໜູນ ແລະ ອຸບປະຖໍາຈາກ ທະນາຄານ ເອສທີ ຈໍາກັດ ແລະ ບໍລິສັດ ຄູນໄຊພັດທະນາກໍ່ສ້າງຈໍາກັດ.
ທີ່ມາ: Lao National Radio