ອິດຣິສ ເອລບາ ນັກສະແດງຊາວອັງກິດທີ່ມີຊື່ສຽງ ກຳລັງປິ່ນປົວຈາກເຊື້ອໂຄວິດ-19 ເຊັ່ນດຽວກັບສາວໂອລກາ ຄູຣິເລນໂກ ຂະນະທີ່ ທອມ ແຮງສ໌ ແລະ ພັນລະຍາ ອອກຈາກໂຮງໝໍໃນອົດສະຕຣາລີ ກັບມາກັກຕົວຢູ່ເຮືອນ.
ສຳນັກຂ່າວຕ່າງປະເທດລາຍງານຈາກນະຄອນຫຼວງລອນດອນ ປະເທດອັງກິດ ເມື່ອວັນອັງຄານ ທີ 17 ມີນາ ວ່າ ນັກສະແດງຊາວອັງກິດທີ່ມີຊື່ສຽງ ອິດຣິສ ເອລບາ ໄດ້ປະກາດຜ່ານບັນຊີສື່ສັງຄົມອອນໄລນ໌ສ່ວນຕົວ ເມື່ອວັນຈັນ ຜ່ານມາ ວ່າ ຕົນກຳລັງກັກຕົວເອງ “ຢູ່ໃນສະຖານທີ່ແຫ່ງໜຶ່ງ” ຫຼັງຈາກຜົນກວດສຸຂະພາບຂອງທາງການແພດໄດ້ຢືນຢັນວ່າ ຕິດເຊື້ອໄວຣັສໂຄໂຣນາສາຍພັນໃໝ່.
ເອລບາ ກ່າວວ່າ ການຕິດເຊື້ອໄວຣັສໂຄວິດ-19 ເປັນເລື່ອງທີ່ຮ້າຍແຮງ ແຕ່ “ເຮັດໃຫ້ເພິ່ມການມີສະຕິ ແລະ ຈິງຈັງ” ໃນການຮັກສາຄວາມສະອາດ ໂດຍສະເພາະການລ້າງມື ແລະ ການຮັກສາໄລຍະຫ່າງທາງສັງຄົມເພື່ອປ້ອງກັນພະຍາດ ເນື່ອງຈາກຜູ້ປ່ວຍຈຳນວນບໍ່ໜ້ອຍທີ່ບໍ່ສະແດງອາການຊັດເຈນ ແຕ່ຍັງສາມາດແຜ່ເຊື້ອໄປສູ່ຄົນອື່ນໄດ້ອີກ.
ຂະນະດຽວກັນ, ສາວໂອລກາ ຄູຣິເລນໂກ ນັກສະແດງ ແລະ ນາງແບບຊາວຝຣັ່ງເຊື້ອສາຍຢູເຄຣນ ເຊິ່ງເຄີຍຮັບບົດບາດນັກສະແດງນຳ ໃນຮູບເງົາ ເຈມສ໌ ບອນ “James Bond: Quantum of Solace” ກ່າວວ່າ ຕົນເອງກຳລັງກັກຕົວຢູ່ເຮືອນ ຫຼັງໄດ້ຮັບການຢືນຢັນຈາກໂຮງໝໍແລ້ວວ່າ ຕິດເຊື້ອໄວຣັສໂຄວິດ-19.
ຂະນະທີ່ ນິດຕະຍະສານພີເພິລ “People” ໄດ້ລາຍງານໂດຍອ້າງແຫຼ່ງຂ່າວສາທາລະນະສຸກຂອງອົດສະຕຣາລີ ວ່າ ທອມ ແຮງສ໌ ນັກສະແດງຮອລລີວູດ ຊາວອາເມຣິກັນ ແລະ ພັນລະຍາ ນາງຣິຕາ ວິລສັນ ໄດ້ອອກຈາກໂຮງໝໍ ໃນລັດຄວິນແລນ ເພື່ອກັບໄປກັກຕົວຢູ່ເຮືອນພັກສ່ວນຕົວແລ້ວ ໂດຍທັງຄູ່ ໃຊ້ເວລາປິ່ນປົວຢູ່ໂຮງໝໍ 5 ວັນ ຫຼັງຈາກ ແຮງສ໌ ປະກາດຜ່ານບັນຊີສື່ສັງຄົມອອນໄລນ໌ ວ່າ ຕົນ ແລະ ພັນລະຍາຕິດເຊື້ອໄວຣັສໂຄວິດ-19 ເມື່ອວັນທີ 12 ມີນາ ຜ່ານມາ.
