ບໍ່ວ່າຈະຢຶດຖືອາຊີບຫຍັງກໍແລ້ວແຕ່ ຖ້າຫາກມີຄວາມດຸໝັ່ນ, ຊື່ສັດ, ປະຢັດ ແລະ ອົດທົນ ກໍຈະມັກເຮັດໃຫ້ຜົນໄດ້ຮັບ ແລະ ສິ່ງຕອບແທນທີ່ດີຕາມມາ. ດັ່ງຄອບຄົວຂອງ ທ່ານ ນາງ ມະນີວັນ ອາຍຸ 41 ປີ ປະທານໜ່ວຍສະຫະພັນແມ່ຍິງ ບ້ານສີວິໄລ ເມືອງສາມັກຄີໄຊ ແຂວງອັດຕະປື ຄອບຄົວຕົວແບບທີ່ໄດ້ຮັບຮອງຢັ້ງຢືນການຜະລິດເປັນສິນຄ້າ ໜຶ່ງເມືອງໜຶ່ງຜະລິດຕະພັນ.
ນາງ ມະນີວັນ ໃຫ້ຮູ້ໃນກອງປະຊຸມໃຫຍ່ຜູ້ແທນອົງຄະນະພັກເມືອງສາມັກຄີໄຊ ຄັ້ງທີ VI ທີ່ຈັດຂຶ້ນໃນທ້າຍອາທິດຜ່ານມາວ່າ: ຄອບຄົວຂອງຕົນມີສະມາຊິກທັງໝົດ 4 ຄົນ ຍິງ 1 ຄົນ. ໃນນັ້ນ, ມີແຮງງານສົມບູນ 3 ຄົນ, ໄດ້ຢຶດຖືອາຊີບຕ່ຳຫູກເປັນຕົ້ນຕໍມາແຕ່ປີ 2002 ໂດຍໄດ້ນຳໃຊ້ທຶນຂອງຕົນເອງລົງທຶນເບື້ອງຕົ້ນພຽງແຕ່ 8 ແສນກີບ ຜົນໄດ້ຮັບໃນໄລຍະນັ້ນກໍພຽງແຕ່ໄດ້ໃຊ້ສອຍປະຈຳວັນໃນຄອບຄົວເທົ່ານັ້ນ, ການເປັນຢູ່ຂອງຄອບຄົວກໍຍັງຂາດເຂີນ.
ມາຮອດ ປີ 2005 ຕົນເອງໄດ້ປຶກສາກັບຄອບຄົວ ແລະ ຕັດສິນໃຈກູ້ຢືມເງິນຈາກກອງທຶນບ້ານ, ບວກກັບຕົ້ນທຶນທີ່ໄດ້ສະສົມຜ່ານມາເພື່ອເພີ່ມການຜະລິດ ປ່ຽນຈາກການຕ່ຳຫູກແບບປະຖົມປະຖານມາເປັນການຜະລິດຫຼາຍຂຶ້ນກວ່າເກົ່າ, ແຕ່ກໍຍັງບໍ່ພໍກັບຄວາມຮຽກຮ້ອງຕ້ອງການຂອງສັງຄົມ. ມາຮອດປີ 2011 ໂດຍອີງໃສ່ແນວທາງນະໂຍບາຍຂອງພັກ – ລັດກໍຄືແຜນພັດທະນາເສດຖະ ກິດ – ສັງຄົມຂອງອົງຄະນະພັກເມືອງສາມັກຄີໄຊ ຄອບຄົວຂອງຕົນຈຶ່ງໄດ້ວາງແຜນເພື່ອພັດທະນາຄອບຄົວ ໂດຍເລັ່ງໃສ່ການຕ່ຳຫູກໃຫ້ເພີ່ມຂຶ້ນ ແລະ ນຳໃຊ້ແຮງງານເພີ່ມຂຶ້ນ ຈາກ 1 ຄົນ ມາເປັນ 2 ຄົນ.
ຈາກນັ້ນ, ຜົນຜະລິດກໍຫຼາຍຂຶ້ນ ແລະ ການຜະລິດນັບມື້ຫຼາຍກາຍເປັນສິນຄ້າ ເຊິ່ງຮູບແບບການຜະລິດເປັນປະເພດແພປູໂຕະ, ຜ້າບ່ຽງ, ກະຕ່ຽວ ແລະ ສິ້ນເຜົ່າຕະຫຼຽງ ຜົນຜະລິດສະເລ່ຍແລ້ວເດືອນໜຶ່ງຜະລິດໄດ້ 30 ຜືນ ຈຳໜ່າຍໃນລາຄາ 60.000 ກີບຕໍ່ໜຶ່ງຜືນ ສະເລ່ຍໝົດປີໄດ້ 20 ລ້ານກີບຕໍ່ປີ.
ທ່ານ ນາງ ມະນີວັນ ໃຫ້ຮູ້ອີກວ່າ: ມາຮອດປັດຈຸບັນການຕ່ຳຫູກຂອງຕົນ ໄດ້ຂະຫຍາຍເພີ່ມຂຶ້ນເລື້ອຍໆຍ້ອນວ່າຕົນເອງ ໄດ້ມີສາຂາຈຳໜ່າຍພາຍໃນ ແຂວງ ແລະ ຕ່າງແຂວງ. ຜົນໄດ້ຮັບຈາກການຢຶດຖືອາຊີບຫັດຖະກຳຕ່ຳຫູກ ແມ່ນເຮັດໃຫ້ຄອບຄົວມີລາຍຮັບເປັນປົກກະຕິ ແລະ ເພີ່ມຂຶ້ນເລື້ອຍໆ.
ປັດຈຸບັນຄອບຄົວຂອງ ນາງ ມະນີວັນ ກໍໄດ້ຫຼຸດພົ້ນຈາກ ຄວາມທຸກຍາກ ແລະ ມີເຮືອນຢູ່ຖາວອນ 1 ຫຼັງ, ມີດິນທຳການປູກ – ການລ້ຽງຈຳນວນໜຶ່ງ, ມີລົດຈັກ 2 ຄັນ, ມີອຸປະກອນຮັບໃຊ້ໃນຄອບຄົວສະດວກຕໍ່ການດຳລົງຊີວິດປະຈຳວັນ ພ້ອມທັງສົ່ງເສີມລູກຮຽນ ແລະ ປະກອບສ່ວນພັນທະອື່ນໆ.
