ພາຍຸໄຕ້ຝຸ່ນ “ຮາກິບິສ” ທີ່ກຳລັງພັດຜ່ານເຄື່ອນທີ່ຂຶ້ນຝັ່ງເກາະປະເທດຍີ່ປຸ່ນ ໃນທ້າຍອາທິດນີ້ ການຂົນສົ່ງຄົມມະນາຄົມທາງລົດໄຟ ແລະ ສາຍການບິນປິດໃຫ້ບໍລິການຊົ່ວຄາວຈົນເຖິງວັນາທິດ.
ສຳນັກຂ່າວເອພີລາຍງານຈາກເມືອງຊູຊູກະ ປະເທດຍີ່ປຸ່ນ ເມື່ອວັນສຸກ ທີ 11 ຕຸລາ ວ່າ ກົມອຸຕຸນິຍົມວິທະຍາຍີ່ປຸ່ນ ຖະແຫຼງການວ່າ ພາຍຸໄຕ້ຝຸ່ນ “ຮາກິບິສ” ຄາດວ່າຈະເຄື່ອນທີ່ພັດຜ່ານເຂົ້າສູ່ຝັ່ງພາກຕາເວັນຕົກ ແລະ ພາກຕາເວັນອອກຂອງປະເທດຍີ່ປຸ່ນ ລະຫວ່າງວັນເສົາທີ 12 ເຖິງ ວັນອາທິດ ວັນທີ 13 ຕຸລາ ນີ້ ແລະ ໄດ້ແຈ້ງເຕືອນໃຫ້ປະຊາຊົນມີສະຕິລະມັດລະວັງໄພທຳມະຊາດຮຸນແຮງຄັ້ງນີ້ ເຊິ່ງກ່ອນໜ້ານີ້ ສຳນັກງານອຸຕຸນິຍົມຍີ່ປຸ່ນ ຄາດການວ່າ ຈະສົ່ງຜົນກະທົບຕໍ່ການຂົນສົ່ງ ທັງລົດໄຟ, ຍົນ. ໂດຍເບື້ອງຕົ້ນມີລາຍງານວ່າ ສາຍການບິນເອັນເອເອັນ ແລະ ສາຍການບິນເຈແປນ ແອຣ໌ໄລນ໌ ທັງ 2 ສາຍການບິນ ໄດ້ປະກາດຍົກເລີກ ຖ້ຽວບິນທັງພາຍໃນ ແລະ ຕ່າງປະເທດ ລວມທັງໝົດ 955 ຖ້ຽວບິນ ຕັ້ງແຕ່ວັນສຸກ ທີ 11 ເຖິງ ວັນອາທິດ ທີ 13 ຕຸລາ ນີ້.
ນອກຈາກນີ້, ລົດໄຟຊິນຄັນເຊັນ ເສັ້ນທາງໂຕກຽວ – ນາໂກຢາ ລວມເຖິງເສັ້ນທາງ ນາໂກຢາ-ຊິນໂອຊາກ້າ ຈະໂຈະການໃຫ້ບໍລິການ ຕັ້ງແຕ່ເຊົ້າວັນເສົາ ທີ 12 ຕຸລາ ເປັນຕົ້ນໄປ.