ສູນປະສານງານຊ່ວຍເຫຼືອດ້ານມະນຸດສະທຳອາຊຽນ (ອາຮາເຊັນເຕີ) ປະຈຳຢູ່ອິນໂດເນເຊຍ ໄດ້ນຳເຄື່ອງແຮສຸກເສີນສຳລັບຊ່ວຍເຫຼືອໄພພິບັດຂອງອາຊຽນຢູ່ປະເທດມາເລເຊຍມາມອບໃຫ້ ສປປ ລາວ ເພື່ອນຳໄປຊ່ວຍເຫຼືອປະຊາຊົນທີ່ຖືກຜົນກະທົບຈາກໄພພິບັດນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວ ເດີນທາງມາຮອດສະໜາມບິນວັດໄຕ ນະຄອນຫຼວງເປັນທີ່ຮຽບຮ້ອຍແລ້ວແລ້ວມື້ນີ້ ທີ 12 ກັນຍາ 2019.
ເຊິ່ງເຄື່ອງຊ່ວຍເຫຼືອດັ່ງກ່າວປະກອບມີ: ເຄື່ອງໃຊ້ຄົວເຮືອນຈຳນວນ 330 ແກັດ, ເຄື່ອງສຸຂະອາໄມ 2.596 ແກັດ, ເຄື່ອງເຮືອນຄົວ 1.144 ແກັດ, ມຸ້ງ 1.400 ດາງ ແລະ ກະຕຸກນໍ້າແບບພັບໄດ້ຈຳນວນ 1.400 ຕຸກ.
ສຳລັບເຄື່ອງທີ່ນຳມາມອບໃຫ້ຜູ້ປະສົບດັ່ງກ່າວ ມາຮອດສະໜາມບິນສາກົນວັດໄຕແລ້ວໃນບ່າຍຂອງມື້ນີ້ ດ້ວຍເຮືອນບິນກອງທັບອາກາດມາເລເຊຍ ໃນເວລາ 13:00 ໂມງ, ເຊິ່ງຕາງໜ້າກ່າວມອບໂດຍ ທ່ານ ນາງ ອາເດລີນາ ກາເມວ (Adelina Kamal) ຫົວໜ້າສູນປະສານງານຊ່ວຍເຫຼືອດ້ານມະນຸດສະທຳອາຊຽນ ແລະ ຕາງໜ້າລັດຖະບານລາວກ່າວຮັບໂດຍ ທ່ານ ວິໄລພົງ ສີສົມຫວັງ ວ່າການຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ.
ສຳລັບເຄື່ອງຊ່ວຍເຫຼືອ ແມ່ນຈະໄດ້ນຳໄປມອບໃຫ້ບັນດາແຂວງທີ່ໄດ້ຮັບຜົນກະທົບເຊິ່ງປະກອບມີ: ແຂວງຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື.