ເຊື່ອແນ່ວ່າ ຫຼາຍໆທ່ານທີ່ກຳລັງໄປຊອກເຮັດວຽກງານທຳ ຫຼື ເປັນນັກສຶກສາທີ່ຫາກໍ່ກຽມຈົບ ຕ່າງກໍ່ມີຄວາມກັງວົນວ່າ ຈະເຮັດແນວໃດເມື່ອຈົບອອກໄປແລ້ວມີວຽກເຮັດ ຈະໄດ້ຢຸດຂໍເງິນໃຊ້ມາເປັນມີເງິນໃຫ້ຄົນທີ່ຕົນຮັກໃຊ້ ອັນທີ່ຈິງກໍ່ບໍ່ແມ່ນເລື່ອງງ່າຍ ແລະ ບໍ່ຍາກເກີນຂໍພຽງໃຫ້ຮູ້ກຽມຕົວແຕ່ເນີ້ນໆແລ້ວທ່ານຈະບໍ່ວ່າງງານ.
ໃນຄວາມເປັນຈິງແລ້ວເວລາຮຽນໃນຫ້ອງ ກັບເວລາອອກໄປເຮັດວຽກແນ່ນອນວ່າມັນມີຄວາມແຕກຕ່າງກັນຫຼາຍ. ເຊິ່ງໄລຍະຜ່ານມາຈະສັງເກດເຫັນວ່າ ນັກສຶກສາທີ່ຈົບມາຈາກຫຼາຍໆສະຖາບັນ ບາງສ່ວນຕ້ອງວ່າງງານຫາວຽກເຮັດບໍ່ໄດ້ ທັງນີ້, ສາເຫດໜຶ່ງກໍ່ເນື່ອງມາຈາກ ຄວາມຕ້ອງການຂອງໜ້າທີ່ວຽກງານ ມັນບໍ່ກົງກັບສາຍທີ່ຮຽນມາ ແລະ ອີກປະການໜຶ່ງກໍ່ອາດແມ່ນເນື່ອງມາຈາກ ເຮົາຍັງບໍ່ທັນມີປະສົບການໃນການເຮັດວຽກໃດໆມາກ່ອນ. ສະນັ້ນ, ຫຼາຍໆຄົນຈິ່ງນັບສູນຈາກບ່ອນເຮັດວຽກບ່ອນທຳອິດ.
ຍຸກສະໄໝນີ້ແນ່ນອນວ່າ ທຸກໆບໍລິສັດບໍ່ວ່າພາກເອກກະຊົນ ຫຼື ພາກລັດ ກໍ່ລ້ວນມີຄວາມຕ້ອງການບຸກຄະລາກອນ ທີ່ມີຄວາມຮູ້, ຄວາມສາມາດ ທີ່ສຳຄັນຖ້າມີຄວາມພ້ອມລຸຍວຽກແຕ່ມື້ທຳອິດທີ່ເຂົ້າປະຈຳການຈະເປັນສິ່ງທີ່ນາຍມັກທີ່ສຸດ ເພາະສາມາດມາຊ່ວຍຂັບເຄື່ອນໜ້າທີ່ວຽກງານ ໄດ້ເລີຍໂດຍບໍ່ຈຳເປັນເສຍເວລາໄປຝຶກຫຍັງຕື່ມ. ສະນັ້ນ, ຈິ່ງພະຍາຍາມສັນຫາຜູ້ທີ່ມີປະສົບການເປັນບຸລິມະສິດຫຼັກ.
ສຳລັບນັກຮຽນ-ນັກສຶກສາຄົນໃດທີ່ຢາກຮູ້ການກຽມຕົວກ່ອນຈົບ ແລະ ບໍ່ໃຫ້ວ່າງງານພາຍຫຼັງທີ່ໄດ້ໃບປະກາດແລ້ວກໍ່ລອງຍາດໂອກາດມາຮ່ວມຮັບຟັງຫົວຂໍ້ບັນຍາຍນີ້ “ກຽມຕົວແນວໃດ ເມື່ອຈົບອອກໄປຈຶ່ງໄດ້ວຽກ” ຈາກອາຈານ ກາບແກ້ວ ທໍາມະວົງ, ນັກຂຽນລາງວັນນາກຄຳ, ລາງວັນ ວັນນະກຳແມ່ນ້ຳຂອງ ແລະ ນັກເວົ້າສ້າງແຮງບັນດານໃຈ. ພ້ອມນັ້ນ, ຍັງຈະໄດ້ສຶກສາ ແລະ ຮຽນຮູ້ເຄັດລັບ “ການເປັນເຈົ້າຂອງທຸລະກິດ ໂດຍເລີ່ມຕົ້ນຈາກ 0” ຈາກ ທ່ານວິທະຍາກອນ ທີ່ເປັນນັກທຸລະກິດແຖວໜ້າຂອງປະເທດລາວ.
ງານດັ່ງກ່າວ ແມ່ນຈະໄດ້ຈັດຂຶ້ນ ໃນວັນທີ 22 ພຶດສະພາ 2019 ເວລາ 13:00 ໂມງ ທີ່ສະໂມສອນ ມຊ (ຊັ້ນ 2) ໃຫ້ແກ່ນັກສຶກສາ ມຊ, ບໍ່ພຽງແຕ່ເທົ່ານັ້ນ ທ່ານໃດທີ່ຕ້ອງການເຂົ້າຮ່ວມງານກໍ່ສາມາດລົງທະບຽນໄດ້ ໂດຍບໍ່ເສຍຄ່າເພື່ອຮັບຟັງຮັບສະເພາະ 50 ທ່ານເທົ່ານັ້ນ.
