ເກີດແຜ່ນດິນໄຫວຮຸນແຮງ ວັດແທກໄດ້ 6,3 ແມກນິຈູດ ສ້າງຄວາມສັ່ນສະເທືອນໃຫ້ກັບພື້ນທີ່ບາງສ່ວນ ທາງພາກຕາເວັນຕົກສຽງໃຕ້ ຂອງຍີ່ປຸ່ນ ແຕ່ຍັງບໍ່ມີລາຍງານຄວາມເສຍຫາຍ.
ສໍານັກຂ່າວເອພີລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນສຸກ ທີ 10 ພຶດສະພາ ວ່າ ເກີດແຜ່ນດິນໄຫວຮຸນແຮງ ວັດແທກໄດ້ 6,3 ແມັກນິຈູດ ສ້າງແຮງສັ່ນສະເທືອນໃຫ້ກັບພື້ນທີ່ບາງສ່ວນ ທາງພາກຕາເວັນຕົກສຽງໃຕ້ຂອງຍີ່ປຸ່ນ ແຕ່ເບື້ອງຕົ້ນຍັງບໍ່ມີລາຍງານຄວາມເສຍຫາຍ ໂດຍສໍານັກງານອຸຕຸນິຍົມວິທະຍາຂອງຍີ່ປຸ່ນ ຖະແຫຼງການວ່າ ບໍ່ມີການປະກາດເຕືອນໄພເຖິງຄື້ນສຶນາມິຈາກຜົນກະທົບຂອງແຜ່ນດິນໄຫວຮຸນແຮງຄັ້ງນີ້ ເຖິງວ່າຈະມີການປ່ຽນແປງແດ່ໜ້ອຍໜຶ່ງຂອງລະດັບນໍ້າທະເລ.
ແຜ່ນດິນໄຫວຮຸນແຮງເມື່ອໄລຍະເຊົ້າວັນສຸກ ທີ່ຜ່ານມາ ເກີດຂຶ້ນນອກເມືອງມິຢາຊາກິ ເມືອງທີ່ມີປະຊາກອນອາໄສ 400.000 ຄົນ ແລະ ຍັງເປັນເມືອງເອກຂອງແຂວງມິຢາຊາກິອີກດ້ວຍ ໂດຍສູນກາງແຜ່ນດິນໄຫວ ຢູ່ເລິກລົງໄປໃຕ້ດິນ ພຽງ 23 ກິໂລແມັດ ເທົ່ານັ້ນ.