ແຫຼ່ງຂ່າວຈາກທ້ອງຖິ່ນລາຍງານວ່າ ແຂວງເຊກອງ ປະກາດບົ່ງຕົວແຕ່ງຕັ້ງກໍາມະການພັກແຂວງເພີ່ມເຕີມ 3 ສະຫາຍ ໃນວັນທີ 13 ທັນວານີ້, ທີ່ສະໂມສອນຫ້ອງວ່າການແຂວງ ໂດຍການເຂົ້າຮ່ວມຂອງ ສະຫາຍ ເຫລັກໄຫລ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ, ບັນດາສະຫາຍໃນຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ເລຂາຄະນະພັກຮາກຖານ, ໜ່ວຍພັກຮາກຖານ, ເຈົ້າເມືອງ, ຫົວໜ້າ ແລະ ຮອງຫົວໜ້າພະແນກ ເຂົ້າຮ່ວມ.
ໃນພິທີ, ສະຫາຍ ນາງ ເພັດດາວອນ ວາດສະຫງ່າ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 469, ສະບັບເລກທີ 470 ແລະ ສະບັບເລກທີ 471/ຄລສພ, ລົງວັນທີ 2 ພະຈິກ 2023 ວ່າດ້ວຍການບົ່ງຕົວແຕ່ງຕັ້ງກໍາມະການພັກແຂວງເຊກອງ. ໃນນີ້, ບົ່ງຕົວແຕ່ງຕັ້ງສະຫາຍ ເພັງນາ ຈັນທະພອນ, ສະຫາຍ ບຸນເລີຍ ນັນທະວົງ ແລະ ສະຫາຍ ຄໍາແສນ ພະສະແຫວງ ເປັນກໍາມະການພັກແຂວງເຊກອງ.
ໂອກາດນີ້, ສະຫາຍ ເຫລັກໄຫລ ສີວິໄລ ໄດ້ມີຄໍາເຫັນຊີ້ນໍາຜູ້ທີ່ໄດ້ຮັບການແຕ່ງຕັ້ງໃໝ່ ຕ້ອງເພີ່ມທະວີຄວາມເປັນແບບຢ່າງນໍາໜ້າ, ສ້າງຄວາມເຊື່ອໝັ້ນໄວ້ວາງໃຈ, ເສີມຂະຫຍາຍມູນເຊື້ອຜົນງານ-ຜົນສໍາເລັດທີ່ພົ້ນເດັ່ນ, ແກ້ໄຂຈຸດອ່ອນ-ຂໍ້ຄົງຄ້າງ; ເອົາໃຈໃສ່ສຶກສາອົບຮົມການເມືອງແນວຄິດ, ປຸກລະດົມສະມາຊິກພັກ-ພະນັກງານ, ປະຕິບັດ ແລະ ຜັນຂະຫຍາຍມະຕິຄໍາສັ່ງຂອງພັກ, ຂໍ້ກໍານົດ, ກົດລະບຽບ ແລະ ກົດໝາຍຂອງລັດ ໂດຍສະເພາະແມ່ນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ແລະ ແຜນພັດທະນາເສດຖະກິດ-ສັງຄົມຂອງແຂວງ ດ້ວຍບາດກ້າວບຸກທະລຸ ເພື່ອແນໃສ່ສ້າງການຫັນປ່ຽນຢ່າງແຂງແຮງ ເລິກເຊິ່ງ ແລະ ຮອບດ້ານໃນເງື່ອນໄຂໃໝ່.
ສະຫາຍ ເພັງນາ ຈັນທະພອນ ຕາງໜ້າບັນດາສະຫາຍທີ່ໄດ້ຮັບການແຕ່ງຕັ້ງໃໝ່ ໄດ້ຂຶ້ນມີຄໍາເຫັນໂດຍສັນຍາວ່າ ຈະສືບຕໍ່ສຸມສະຕິປັນຍາ, ເຫື່ອແຮງ ແລະ ຄວາມຮູ້ຄວາມສາມາດເຂົ້າໃນການປະຕິບັດໜ້າທີ່ການເມືອງ, ນໍາພາ-ຊີ້ນໍາສຶກສາອົບຮົມການເມືອງແນວຄິດ, ປຸກລະດົມເຕົ້າໂຮມຄວາມສາມັກຄີສະມາຊິກພັກ-ພະນັກງານ, ເດັດດ່ຽວຕ້ານ ແລະ ແກ້ໄຂບັນຫາປະກົດການຫຍໍ້ທໍ້ຕ່າງ, ເພີ່ມທະວີການປັບປຸງກໍ່ສ້າງພັກ-ກໍ່ສ້າງພະນັກງານໃຫ້ໄດ້ທັງດ້ານປະລິມານ ແລະ ຄຸນນະພາບ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນເປັນກ້າວໆ.
ຂ່າວຈາກ: ເຊກອງ
