ເປັນປະຈຳທຸກປີ ກ່ອນຮອດລະດູເກັບກ່ຽວອ້ອຍຈາກຊາວສວນ ບໍລິສັດນ້ຳຕານມິດລາວ ແຂວງສະຫວັນນະເຂດກໍ່ຈະໄດ້ທຳການກວດເຊັກຊີງຊັ່ງນ້ຳໜັກຂອງບໍລິສັດ ໂດຍຊ່ອງໜ້າຫຼາຍພາກສ່ວນ ເພື່ອຮັບປະກັນມາດຕະຖານ ແລະເພື່ອຄວາມສະບາຍໃຈຂອງລູກ້າຜູ້ມາຂາຍອ້ອຍ.
ສຳລັບປີນີ້ໃນວັນທີ 22 ພະຈິກ 2023 ທີ່ ຈຸດກວດກາຊິງຊັ່ງນ້ຳໜັກບໍລິສັດ ນ້ຳຕານມິດລາວ ຈຳກັດ ແຂວງສະຫວັນນະເຂດ, ກົມມາດຕະຖານ ແລະວັດແທກ ກະຊວງອຸດສາຫະກຳ ແລະການຄ້າ, ກໍໄດ້ລົງກວດກາຊິງຊັ່ງນ້ຳໜັກປະຈຳປີ 2023-2024 ຂອງບໍລິສັດນ້ຳຕານມິດລາວ ຈຳກັດ, ໂດຍການ ເຂົ້າຮ່ວມຂອງ ທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ, ທ່ານ ສະອາດ ປັນຍາດິດວົງ ຜູ້ອຳນວຍການດ້ານອ້ອຍ ບໍລິສັດນ້ຳຕານມິດລາວ ຈຳກັດ, ມີບັນດາການນຳຂອງເມືອງໄຊບູລີ, ພະນັກງານວິຊາການຈາກກົມມາດຕະຖານ ແລະວັດແທກ, ຂະແໜງການກ່ຽວຂ້ອງ, ພະນັກງານວິຊາການບໍລິສັດ ແລະອຳນາດການປົກຄອງບ້ານແກ້ງແຮດ, ຊາວສວນຜູ້ປູກອ້ອຍ ເຂົ້າຮ່ວມເປັນສັກຂີພະຍານ.
ທ່ານ ສະອາດ ປັນຍາດິບວົງ ກ່າວວ່າ: ການກວດກາຊິງຊັ່ງນ້ຳໜັກ ຂອງບໍລິສັດແມ່ນມີຂຶ້ນທຸກໆປີ ກ່ອນຈະມີການໜີບອ້ອຍໃນຕົ້ນເດືອນທັນວາ, ເພື່ອສ້າງຄວາມໝັ້ນໃຈໃຫ້ແກ່ຊາວສວນອ້ອຍ ທີ່ສະໜອງອ້ອຍໃຫ້ບໍລິສັດ ແລະ ເພື່ອສ້າງຄວາມຍຸຕິທຳ, ຈະແຈ້ງຕໍ່ຜູ້ຊື້-ຜູ້ຂາຍ, ເຊິ່ງກົມມາດຕະຖານ ແລະວັດແທກກະຊວງອຸດສາຫະກຳ ແລະການຄ້າ ສົມທົບກັບພະນັກງານວິຊາການຂັ້ນແຂວງ ແລະເມືອງໄດ້ລົງມາກວດກາຊິງຊັ່ງນ້ຳໜັກຢູ່ແຕ່ລະຈຸດ ຂອງບໍລິສັດປີລະໜຶ່ງຄັ້ງ, ທັງນີ້ ກໍ່ເພື່ອໃຫ້ປະຊາຊົນຊາວສວນອ້ອຍ ມີຄວາມໝັ້ນໃຈ ໃນການຕິດນຳ້ໜັກອ້ອຍສົ່ງໃຫ້ບໍລິສັດ.
ທ່ານ ສະອາດ ປັນຍາດິບວົງ ຍັງແຈ້ງໃຫ້ ຮູ້ຕື່ມວ່າ: ສຳລັບການນຳລົດບັນທຸກອ້ອຍເຂົ້າຊິງຊັ່ງ, ລົດບັນທຸກອ້ອຍທຸກຄັນ ຕ້ອງປະຕິບັດຕາມລະບຽບຂອງໂຮງງານວາງອອກຢ່າງເຂັ້ມງວດ, ເປັນຕົ້ນ: ຄວາມສູງຂອງການບັນທຸກ, ຄວາມປອດໄພໃນການບັນທຸກອ້ອຍ ແລະຄວາມປອດໄພບົນທ້ອງຖະໜົນຫຼວງນຳອີກ.
ສຳລັບປີນີ້ ຄາດວ່າຈະມີອ້ອຍປ້ອນໂຮງງານ ປະມານ 550.000 ໂຕນ, ໃນນັ້ນອ້ອຍອິນຊີ ຫຼືອ້ອຍປອດສານເຄມີ 100.000 ໂຕນ ແລະອ້ອຍທົ່ວໄປ 450.000 ໂຕນ, ເຊິ່ງທາງບໍລິສັດນ້ຳຕານມິດລາວ ຮັບຊື້ໃນລາຄາ 820.000 ກີບຕໍ່ໂຕນ (ສຳລັບອ້ອຍອິນຊີ) ແລະ ອ້ອຍທົ່ວໄປໃນລາຄາ 720.000 ກີບຕໍ່ໂຕນ, ຄາດວ່າໃນປີ 2024-2025 ຈະມີອ້ອຍສົ່ງໃຫ້ບໍລິສັດເພີ່ມຂຶ້ນ 8 ແສນໂຕນ.
ທ່ານ ອ່ອນລຳພັນ ບົວສີແກ້ວ ໄດ້ມີຄຳເຫັນ ພ້ອມທັງກ່າວຍ້ອງຍໍຊົມເຊີຍ ຕໍ່ບໍລິສັດນ້ຳຕານມິດລາວ ທີ່ໄດ້ມີການສົ່ງເສີມພໍ່ແມ່ປະຊາຊົນ ຊາວເມືອງໄຊບູລີ ໃນການປູກອ້ອຍຢ່າງມີເຕັກນິກ ແລະໄດ້ຮັບຜົນດີ, ໃນແຕ່ລະປີເຫັນວ່າປະຊາຊົນມີ ຄວາມຕື່ນຕົວຫຼາຍສົມຄວນ ຫັນມາປູກອ້ອຍເພື່ອສົ່ງຂາຍໃຫ້ບໍລິສັດນ້ຳຕານມິດລາວ ເຮັດໃຫ້ຊີວິດການເປັນຢູ່ທີ່ດີຂຶ້ນ, ນອກນັ້ນ ທາງບໍລິສັດນ້ຳຕານມິດລາວ ຍັງໄດ້ຊ່ວຍພັດທະນາທ້ອງຖິ່ນຊ່ວຍເມືອງຕື່ມອີກ.
ຈາກນັ້ນ ກົມມາດຕະຖານ ແລະວັດແທກ ກໍ່ໄດ້ທຳການກວດກາ ພ້ອມທັງກວດສອບຊິງຊັ່ງ ໃຫ້ມີຄວາມຊື່ຕົງ ໃນລະດັບມາດຕະຖານສາກົນ, ເພື່ອຄວາມໂປ່ງໃສ, ຍຸດຕິທຳ ຕໍ່ຜູ້ຊື້ ແລະຜູ້ຂາຍ.
ຂ່າວຈາກ: ສະຫວັນພັດທະນາ