ພິທີເປີດງານມະຫາກໍາສີມືຫັດຖະກໍາລາວ ຄັ້ງທີ 21 ປີ 2022 ໄດ້ໄຂຂຶ້ນຢ່າງເປັນທາງການ ໃນຕອນແລງວັນທີ 17 ຕຸລາ 2022 ທີ່ສູນການຄ້າລາວ-ໄອເຕັກ (ຫຼັງເກົ່າ) ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ທ່ານ ນາງ ນາລີ ສີສຸລິດ ພັນລະຍາ ທ່ານປະທານປະເທດ, ປະທານຄະນະທີ່ປືກສາ ສະມາຄົມ ຫັດຖະກຳລາວ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກໍາແຫ່ງຊາດ, ມີບັນດາທູດຕານຸທຸດ, ສະມາຊິກສະມາຄົມຫັດຖະກຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ນາງ ສຸວິຕາ ປະເສີດ ປະທານສະມາຄົມຫັດຖະກໍາລາວ ກ່າວວ່າ: ງານມະຫາກໍາສີມືຫັດຖະກໍາລາວ ຄັ້ງທີ 21 ປະຈໍາປີ 2022 ແມ່ນຈັດຂຶ້ນພາຍໃຕ້ຄໍາຂວັນ ສືໄມ້ລາຍມື ຄື ອຸທິຍານແຫ່ງການທ່ອງທ່ຽວ ເຊິ່ງຈຸດປະສົງຫຼັກຂອງງານແມ່ນເພື່ອສະເຫຼີມສະຫຼອງ “ວັນຫັດຖະກໍາລາວ ວັນທີ 1 ພະຈິກ” ແລະ ເພື່ອສະເຫຼີມສະຫຼອງ ວັນສ້າງຕັ້ງສະມາຄົມຫັດຖະກໍາລາວ ຄົບຮອບ 25 ປີ.
ທ່ານ ພູທອງ ໄຊສະນິດ ຮອງປະທານ ສະມາຄົມ ຫັດຖະກຳລາວ, ຮອງປະທານຄະນະກະກຽມງານ ກ່າວວ່າ: ງານຄັ້ງນີ້ຈັດຂຶ້ນເປັນເວລາ 9 ວັນ ລະຫວ່າງວັນທີ 15-23 ຕຸລາ 2022 ເຊິ່ງຈະເປັນການສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົົມ, ທ່ຽວຊື້ ໄດ້ພົບ-ໄດ້ເຫັນຄວາມຫຼາກຫຼາຍຂອງເຄື່ອງຫັດຖະກໍາລາວ, ສ້າງຄວາມປະທັບໃຈ ແລະ ຫລົງໄຫຼ ໃນຄວາມມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກໍາລາວເຮົາ, ເພື່ອເຕົ້າໂຮມຄວາມສາມັກຄີ ບັນດາຊາວຊ່າງຫັດຖະກຳທຸກໆທ້ອງຖິ່ນໃນທົ່ວປະເທດ ພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກໍາ ທີ່ມີລັກສະນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນທ່າແຮງທາງດ້ານຫັດຖະກຳຢູ່ທຸກທ້ອງຖິ່ນ ປະກອບສ່ວນເຂົ້າໃນການສ້າງລາຍຮັບ ແລະ ພັດທະນາຊີວິດການເປັນຢູ່ ຂອງທ້ອງຖິ່ນໃຫ້ນັບມື້ດີຂຶ້ນ, ເພື່ອໃຫ້ບັນດາຊາວຊ່າງ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດເຂົ້າເຖິງການຕະຫຼາດ (ຫຼື ມີບ່ອນຂາຍ) ຜະລິດຕະພັນຫັດຖະກໍາຂອງຕົນ. ພ້ອມທັງ, ໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ການວາງສະແດງ ແລະ ການຂາຍ ແລະ ເພື່ອປະກອບສ່ວນສ້າງເປັນສະຖານທີ່ທ່ອງທ່ຽວດ້ານຫັດຖະກໍາ ດັ່ງຄໍາຂັວນ ທີ່ວ່າ: “ສີໄມ້ລາຍມື ຄືອຸທິຍານແຫ່ງການທ່ອງທ່ຽວ”
ງານມະຫາກໍາສີມືຫັດຖະກໍາລາວ ຄັ້ງນີ້ ມີການເຂົ້າຮ່ວມຂອງຫຼາຍພາກສ່ວນຫັດຖະກໍາທີ່ມາຈາກທຸກໆແຂວງໃນທົ່ວປະເທດ ເປັນຕົ້ນແມ່ນ: ພາກສ່ວນ ແຜ່ນແພ ຜ້າໄໝຜ້າຝ້າຍພື້ນເມືອງ, ເຄື່ອງປະດັບ, ເຄື່ອງຈັກສານ, ຜະລິດຕະພັນວັດທະນະທໍາ ເຄື່ອງປັ້ນດິນເຜົາ, ໄມ້ແກະສະຫຼັກ, ເຟີ້ນີເຈີ, ອາຫານສໍາເລັດຮູບພື້ນເມືອງ, ກາເຟ, ສະໝູນໄພ ແລະ ອື່ນໆ. ນອກຈາກນີ້, ຍັງມີພາກສ່ວນ ສາທິດ ຫຼື ສະແດງ ການຜະລິດຕົວຈິງ ເປັນຕົ້ນແມ່ນ: ສາທິດການແສ່ວຜ້າ, ແກະສະຫຼັກຫີນ, ເຂັນຝ້າຍ, ສາວໄໝ, ປັກດິ້ງ, ຈັກສານ ຈາກຊາວຊ່າງແຂວງຜົ້ງສາລີ, ຫຼວງນໍ້າທາ, ຫຼວງພະບາງ,ຊຽງຂວາງ, ແຂວງວຽງຈັນ, ຈໍາປາສັກ, ສາລະວັນ, ອັດຕະປື ເຊິ່ງລວມຈໍານວນຮ້ານເຂົ້າຮ່ວມວາງສະແດງ ແລະ ຂາຍ ທັງໝົດ 230 ຮ້ານ.
ພ້ອມກັນນັ້ນທ່ານທີ່ເຂົ້າມາທ່ຽວຊົມ-ທ່ຽວຊື້ ໃນງານມະຫາກໍາສີມືຫັດຖະກໍາລາວຄັ້ງນີ້ ນອກຈາກຈະໄດ້ຊົມການຈັດວາງສະແດງ ແລະ ຂາຍສິນຄ້າຫັດຖະກໍາຕ່າງໆຂອງຊາວຊ່າງຫັດຖະກຳລາວ ຕາມທີ່ໄດ້ກ່າວມາຂ້າງເທິງນັ້ນແລ້ວ, ໃນງານບັນດາທ່ານຍັງສາມາດເຂົ້າຮ່ວມ ແລະ ຊົມກິດຈະກໍາຕ່າງໆ ໄດ້ຕື່ມອີກ ເປັນຕົ້ນແມ່ນ: ການເສວະນາ (Panel Discussion) ໃນຫຼາຍຫົວຂໍ້ ເປັນຕົ້ນສະເໜ່ຜ້າບ່ຽງລາວ, ການອອກແບບຜະລິດຕະພັນ, ຫຸ້ມຫໍ່ ແລະ ວິທີສົ່ງອອກສິນຄ້າຫັດຖະກຳສູ່ຕະຫຼາດສາກົນ, ນະວັດຕະກຳການຜະລິດທີ່ເປັນມິດກັບສິ່ງແວດລ້ອມ, ກິດຈະກໍາປະກວດ ການແຂ່ງຂັນຜະລິດຕະພັນດີເດັ່ນ: “ສະເໜ່ຜ້າບ່ຽງລາວ, ກິດຈະກໍາສາທິດ ຂັ້ນຕອນການຜະລິດຕົວຈິງ ບວກກັບການຝຶກອົບຮົມຍົກລະດັບສີມືຫັດຖະກຳ ພ້ອມທັງຊົມກິດຈະກຳປະຈຳວັນເຊັ່ນ: ການສະແດງສິລະປະ, ເດີນແບບ ແລະ ອື່ນໆ.
