ວັນທີ 21 ເມສາ 2022 ທີ່ກະຊວງໂຍທາທິການ ແລະ ຂົນສົ່ງ ນະຄອນຫຼວງວຽງຈັນ, ທ່ານ ວຽງສະຫວັດ ສີພັນດອນ ລັດຖະມົນຕີ ກະຊວງໂຍທາທິການ ແລະ ຂົນສົ່ງ(ຍທຂ), ພ້ອມດ້ວຍບັນດາທ່ານ ຜູ້ຊ່ວຍລັດຖະມົນຕີ, ຫົວໜ້າກົມຂົນສົ່ງ, ຫົວໜ້າກົມທາງລົດໄຟ, ວ່າການຫົວໜ້າຫ້ອງການກະຊວງ, ຕາງໜ້າກົມແຜນການ ແລະ ການເງິນ ໄດ້ເຂົ້າຮ່ວມກອງປະຊຸມເວທີປຶກສາຫາລືໂບອາວປະຈຳປີ 2022 (Boao Forum for Asia 2022) , ໃນຫົວຂໍ້ເສວະນາ ກ່ຽວກັບ ຂໍ້ລິເລີ່ມໜຶ່ງແລວໜຶ່ງເສັ້ນທາງ : ຮູບແບບວິທີການໃໝ່ໃນການຮ່ວມມືເພື່ອການພັດທະນາ (Belt and Road Initiative: A New Practice of Cooperation Development) ຜ່ານຮູບແບບວີດີໂອທາງໄກ.
ກອງປະຊຸມໂບອາວ ປະຈຳປີ 2022 ໄດ້ຈັດຂຶ້ນ ລະຫວ່າງ ວັນທີ 20-22 ເມສາ 2022 ທີ່ແຂວງ ຫາຍນານ ສປ ຈີນ ມີຈຸດປະສົງແນໃສ່ປຶກສາຫາລື ເພື່ອລະດົມຄວາມຄິດ ແລະ ແລກປ່ຽນຄຳຄິດເຫັນ ກ່ຽວກັບ ການໝູນໃຊ້ທ່າແຮງທັນສະໄໝ ເພື່ອຟື້ນຟູເສດຖະກິດພາຍຫຼັງການແຜ່ລະບາດຂອງເຊື້ອພະຍາດໂຄວິດ-19. ນອກຈາກນີ້ ກໍເພື່ອສົ່ງເສີມ ແລະ ແລກປ່ຽນບົດຮຽນໃນການດຳເນີນທຸລະກິດໃນຍຸກດິຈີຕອນ ເພື່ອຊອກຮູ້ກາລະໂອກາດ ແລະ ສິ່ງທ້າທາຍໃນການພັດທະນາເສດຖະກິດໃຫ້ມີຄວາມຈະເລີນກ້າວໜ້າ ແລະ ທັນສະໄໝ ແລະ ເພື່ອສ້າງຄວາມສາມັກຄີປອງດອງ ໃຫ້ມີຄວາມແໜ້ນແຟ້ນຂຶ້ນກ່ວາເກົ່າ.
ເວທີດັ່ງກ່າວ ແມ່ນເປັນໂອກາດໃນການລະດົມແນວຄວາມຄິດ (Think Tanks) ທີ່ເຕົ້າໂຮມເອົາບັນດາຜູ້ນຳ, ອະດີດຜູ້ນຳ, ບຸກຄົນທີ່ມີຊື່ສຽງ ແລະ ມີຄຸນວຸດທິ ທັງພາກລັດ ແລະ ເອກະຊົນ ເພື່ອແລກປ່ຽນວິໄສທັດຕໍ່ບັນຫາຮີບດ່ວນຂອງພາກພື້ນ ແລະ ໃນໂລກ ໂດຍສະເພາະບັນຫາພົ້ນເດັ່ນໃນອາຊີ. ເວທີໂບອາວຍັງເປັນເວທີສົ່ງເສີມການເຊື່ອມໂຍງເສດຖະກິດພາກພື້ນ ແລະ ເຕົ້າໂຮມບັນດາປະເທດໃນທະວີບອາຊີ ໃນການບັນລຸເປົ້າໝາຍດ້ານການພັດທະນາ.
ໃນນາມທີ່ຖືກຮັບເຊີນເປັນໜຶ່ງໃນ ເສວະນາກອນ ພາຍໃຕ້ຫົວຂໍ້ ຂໍ້ລິເລີ່ມໜຶ່ງແລວໜຶ່ງເສັ້ນທາງ : ຮູບແບບວິທີການໃໝ່ໃນການຮ່ວມມືເພື່ອການພັດທະນາ ສິ່ງທ້າທາຍຈາກສະພາບຂອງໂລກໃນປັດຈຸບັນ ທີ່ກະທົບໃສ່ ໂຄງການ BRI ໃນ ສປປ ລາວ, ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ມີຄໍາເຫັນແລກປ່ຽນ, ເຊິ່ງມີບາງຕອນທີ່ສຳຄັນ ດັ່ງນີ້: ສະພາບການສະລໍຕົວຂອງເສດຖະກິດໂລກ ແມ່ນສົ່ງຜົນກະທົບບໍ່ໜ້ອຍກໍ່ຫຼາຍ ຕໍ່ບັນດາໂຄງການລົງທຶນໃນກອບ BRI, ທັງໂຄງການທີ່ກຳລັງກໍ່ສ້າງ ແລະ ຢູ່ໃນແຜນ. ສາເຫດກໍເນື່ອງມາຈາກ ຄວາມຕ້ອງການໃນການລົງທຶນໃນຫຼາຍປະເທດຖືກສະລໍຕົວ. ສະນັ້ນ, ມັນມີຄວາມຈໍາເປັນທີ່ສຸດວ່າບັນດາປະເທດສະມາຊິກ BRI ຈະຕ້ອງໄດ້ສຸມໃສ່ສ້າງຜົນປະໂຫຍດສູງສຸດຈາກໂຄງການທີ່ສຳເລັດແລ້ວ ເພື່ອສະໜັບສະໜູນການເຕີບໂຕຂອງບັນດາກິດຈະກຳດ້ານເສດຖະກິດ.
ໃນກໍລະນີຂອງໂຄງການຍຸດທະສາດ, ສັນຍາລັກການຮ່ວມມືຂອງ 2 ຊາດລາວ-ຈີນ ກໍຄືໂຄງການລົດໄຟລາວ-ຈີນນັ້ນ, ສິ່ງທ້າທາຍ ກໍຄືກາລະໂອກາດ ເຊັ່ນດຽວກັນແມ່ນການຮ່ວມມືກັບບັນດາປະເທດໃນຂອບພະວິພາຄີ ແລະ ພະຫຸພາຄີ ເພື່ອຈັດຕັ້ງປະຕິບັດຂະບວນການຂົນສົ່ງຂ້າມແດນ ແລະ ຜ່ານແດນ ໃຫ້ມີປະສິດທິພາບສູງກວ່າເກົາ ເພື່ອຮັບມືກັບຄວາມຕ້ອງການຂົນສົ່ງຜ່ານເສັ້ນທາງລົດໄຟລາວ-ຈີນ ທີ່ນັບມື້ນັບຫຼາຍຂຶ້ນ ເພື່ອໃຫ້ບັນລຸຄາດໝາຍການຫຼຸດຜ່ອນເວລາ ແລະ ຕົ້ນທຶນໃນການຂົນສົ່ງ ຂອງອະນຸພາກພື້ນ ແລະ ພາກພື້ນຜ່ານ ສປປ ລາວ.
ຖ້າເຮັດໄດ້ແນວນັ້ນ, ຂ້າພະເຈົ້າເຊື່ອວ່າ ໂຄງການລົດໄຟລາວ-ຈີນ ຈະບໍ່ພຽງແຕ່ສ້າງຜົນປະໂຫຍດດ້ານເສດຖະກິດໃຫ້ກັບຂະແໜງການບໍລິການໂລຊິດສະຕິກ ແລະ ຜູ້ບໍລິໂພກ, ແຕ່ຍັງຈະຊ່ວຍກະຕຸ້ນການຂະຫຍາຍຕົວຂອງການຄ້າ ລະຫວ່າງ ສປ ຈີນ, ສປປ ລາວ, ສສ ຫວຽດນາມ, ໄທ ແລະ ປະເທດສະມາຊິກອາຊຽນອື່ນໆ.