ບໍລິສັດຟາຍເຊີ (Pfizer) ເປີດເຜີຍວ່າ ຜົນການທົດລອງທາງຄລີນິກ ຢາເມັດປິ່ນປົວພະຍາດໂຄວິດ-19 ທີ່ມີຊື່ວ່າ ຢາແພັກໂລວິດ (Paxlovid) ສາມາດຕ້ານທານກັບເຊື້ອໄວຣັສກາຍພັນໂອໄມຄຣອນ ຊ່ວຍຫຼຸດອັດຕາການເຂົ້າປິ່ນປົວຢູ່ໂຮງໝໍ ແລະ ຫຼຸດຜ່ອນຄວາມສ່ຽງຕໍ່ການເສຍຊີວິດຂອງຜູ້ຕິດເຊື້ອທີ່ມີພະຍາດປະຈຳຕົວລົງເກືອບ 90%.
ການທົດລອງຄັ້ງນີ້ ໄດ້ມີອາສາສະໝັກຫຼາຍກວ່າ 2.200 ຄົນ ເຊິ່ງບໍລິສັດຟາຍເຊີລະບຸວ່າ ການປິ່ນປົວຜູ້ຕິດເຊື້ອທີ່ນຳໃຊ້ຢາ Paxlovid ເຊິ່ງຍັງບໍ່ທັນໄດ້ຮັບການອະນຸຍາດນຳໃຊ້ ແຕ່ຜົນການທົດລອງອອກມາ ສະແດງໃຫ້ເຫັນວາ ຢາດັ່ງກ່າວສາມາດຮັບມືກັບເຊື້ອກາຍພັນໂອໄມຄຣອນໄດ້.
ຫຼັງຈາກຂໍ້ມູນຜົນການທົດລອງອອກມາ, ປະທານາທິບໍດີ ໂຈ ໄບເດັນຂອງສະຫະລັດອາເມຣິກາ ໄດ້ອອກມາກ່າວສະແດງຄວາມຍິນດີຕໍ່ຜົນການທົດລອງທາງຄລີນິກຂອງບໍລິສັດຟາຍເຊີ ແລະ ຮູ້ສຶກດີໃຈເປັນຢ່າງຍິ່ງ ເຊິ່ງຜົນການທົດລອງດັ່ງກ່າວ ໄດ້ສະແດງໃຫ້ເຫັນວ່າ ຢາດັ່ງກ່າວ ມີປະສິດທິພາບໃນການຕ້ານກັບໄວຣັສ, ຫຼຸດຜ່ອນຄວາມສ່ຽງການເຈັບປ່ວຍຮຸນແຮງຂອງຜູ້ຕິດເຊື້ອໂຄວິດ-19 ລວມທັງໄວຣັສກາຍພັນໂອໄມຄຣອນ ຖືວ່າເປັນເຄື່ອງມືທີ່ຊົງພະລັງອີກຊະນິດໜຶ່ງໃນການຕໍ່ສູ້ກັບໂຄວິດ-19.
ທັງນີ້ ບໍລິສັດຟາຍເຊີຄາດວ່າ ຢາດັ່ງກ່າວຈະໄດ້ຮັບອະນຸຍາດນຳໃຊ້ສຸກເສີນຈາກຄະນະກຳມະການອາຫານ ແລະ ຢາຂອງສະຫະລັດພາຍໃນເດືອນທັນວານີ້.
