ສຳນັກຂ່າວຕ່າງປະເທດລາຍງານວ່າ ບໍລິສັດຟາຍເຊີ ໄດ້ອອກມາເປີດເຜີຍວ່າ ຖ້າຜູ້ໃດສັກວັກຊີນປ້ອງກັນໂຄວິດ-19 ຂອງຟາຍເຊີ 3 ເຂັມຈະສາມາດມີພູມຄຸ້ມກັນເຊື້ອໄວຣັສກາຍພັນໂອໄມຄຣອນໄດ້, ສ່ວນຜູ້ທີ່ສັກ 2 ເຂັມ ຈະມີພູມຄຸ້ມກັນໂຄວິດ-19 ສາຍພັນອື່ນໆໄດ້.
ຖະແຫຼງການຂອງຟາຍເຊີລະບຸວ່າ: ການຕ້ານທານໄວຣັສໂອໄມຄຣອນ ຈະເພີ່ມຂຶ້ນດ້ວຍການສັກເຂັມກະຕຸ້ນ (ເຂັມທີ 3), ພ້ອມລະບຸວ່າ ການສັກວັກຊີນໃຫ້ຄົບ 2 ໂດສ ໃຫ້ຄອບຄຸມຫຼາຍທີ່ສຸດ ເທົ່າທີ່ຈະຫຼາຍໄດ້ ລວມທັງສັກເຂັມກະຕຸ້ນ ເປັນວິທີທາງທີ່ດີທີ່ສຸດໃນການຢັບຢັ້ງການແຜ່ລະບາດຂອງພະຍາດໂຄວິດ-19.
ແນວໃດກໍຕາມ ຟາຍເຊີ/ໄບອອນເທັກ ລະບຸວ່າ: ຜົນການສຶກສາດັ່ງກ່າວ ເປັນພຽງຜົນເບື້ອງຕົ້ນ ແລະ ຍັງມີການເກັບກຳ ລວບລວມຂໍ້ມູນອີກຕໍ່ໄປ ເພື່ອປະເມີນປະສິດທິພາບຕາມຄວາມເປັນຈິງ ແລະ ຂະນະນີ້ ບໍລິສັດກຳລັງພັດທະນາວັກຊີນ ເພື່ອຮັບມືກັບໂອໄມຄຣອນໂດຍສະເພາະ ເຊິ່ງໜ້າຈະພ້ອມສົ່ງມອບພາຍໃນ 100 ວັນຂ້າງໜ້າ ຖ້າໜ່ວຍງານກ່ຽວຂ້ອງຮັບຮອງໃຫ້ນຳໃຊ້ສຸກເສີນທັນທີທີ່ທົດລອງຄັ້ງສຸດທ້າຍແລ້ວ.
