ສະຖານີໂທລະພາບຫວຽດນາມ ລາຍງານວ່າ: ມີຜູ້ເສຍຊີວິດຢ່າງໜ້ອຍ 17 ຄົນ ແລະ ມີຜູ້ສູນຫາຍອີກ 13 ຄົນ ຈາກພິດພະຍຸໝຸນເຂດຮ້ອນ ລິນຟາ ພັດເຂົ້າແຂວງກວາງຈິ ສສ ຫວຽດນາມ ເມື່ອທ້າຍອາທິດຜ່ານມາ ເຮັດໃຫ້ຝົນຕົກໜັກ ແລະ ເກີດມີນ້ຳຖ້ວມເປັນວົງກວ້າງ, ເຈົ້າໜ້າທີ່ຕ້ອງລະດົມກຳລັງເພື່ອເຂົ້າຊ່ວຍເຫຼືອຊາວປະມົງທີ່ຖືກລົມພັດເຮືອ ເຮັດໃຫ້ເຮືອຫຼົ້ມກາງທະເລ. ນອກຈາກນີ້, ຍັງອົບພະຍົບປະຊາຊົນອອກຈາກພື້ນທີ່ສ່ຽງໄພ.
ລາຍງານລະບຸວ່າ: ນ້ຳໄດ້ໄຫຼເຂົ້າຖ້ວມບ້ານເຮືອນປະຊາຊົນເປັນວົງກວ້າງ ເຮັດໃຫ້ຫຼາຍພື້ນທີ່ຖືກຕັດຂາດຈາກໂລກພາຍນອກ, ບ້ານເຮືອນປະຊາຊົນຖືກນ້ຳຖ້ວມຢ່າງໜ້ອຍ 33.000 ຫຼັງຄາເຮືອນ, ເຈົ້າໜ້າທີ່ຕ້ອງໄດ້ເລັ່ງອົບພະຍົບປະຊາຊົນ ປະມານ 31.100 ຄົນ ໄປຢູ່ບ່ອນປອດໄພ.
ທັງນີ້, ສສ ຫວຽດນາມ ມີແຄມຝັ່ງທະເລທີ່ຍາວຢຽດເຮັດໃຫ້ສ່ຽງຕໍ່ພະຍຸພັດຖະຫຼົ່ມ ແລະ ຖືກນ້ຳຖ້ວມ ເມື່ອປີຜ່ານມາໄດ້ຖືກນ້ຳຖ້ວມຫຼາຍຄັ້ງສົ່ງຜົນເຮັດໃຫ້ມີຜູ້ເສຍຊີວິດເຖິງ 132 ຄົນ ແລະ 207 ຄົນ ໄດ້ຮັບບາດເຈັບ.
