ການເພີ່ມທັກສະໃນການເຮັດວຽກເປັນສິ່ງສໍາຄັນທີ່ບໍ່ອາດຈະຂາດໄດ້ ເພາະຍິ່ງມີການພັດທະນາໃນສ່ວນນີ້ຫຼາຍເທົ່າໃດ ໂອກາດທີ່ຈະເຕີບໂຕ ຫຼື ກ້າວໜ້າກໍຍິ່ງມີຫຼາຍຂຶ້ນ. ສໍາລັບນັກການຕະຫຼາດ ເປັນອາຊີບທີ່ຕ້ອງມີການຝຶກຝົນ ແລະ ພັດທະນາທັກສະຢູ່ສະເໝີ ເພາະວ່າມີການປ່ຽນແປງຢູ່ເລື້ອຍໆ ແລະ ທາງດຽວທີ່ຈະກ້າວໜ້າໃນສາຍງານນີ້ໄດ້ບໍ່ພຽງແຕ່ຕ້ອງ “ ທັນ ” ຕໍ່ການປ່ຽນແປງຂອງຕະຫຼາດຫາກຕ້ອງ “ ນໍາ ” ແລະ ສ້າງ ” ກະແສຕະຫຼາດໃຫ້ໄດ້.
ຄໍລໍາຕະຫຼາດວັນນີ້ ຈະນໍາສະເໜີ 9 ທັກສະທີ່ນັກການຕະຫຼາດຕ້ອງມີ ເພື່ອຈະກ້າວໄປສູ່ຄວາມສໍາເລັດ ດັ່ງນີ້:
1 ທັກສະການສື່ສານ: ຖ້າທ່ານສາມາດສື່ສານກັບທຸກຄົນໃນທຸກລະດັບໃນອົງກອນໄດ້ເປັນຢ່າງດີ ຖືເປັນການຝຶກເລື່ອງການສື່ສານເບື້ອງຕົ້ນທີ່ດີກ່ອນໜ້າທີ່ຈະໄປຮັບມືກັບລູກຄ້າ ແລະ ບຸກຄົນພາຍນອກອົງກອນໄດ້ທຸກຮູບແບບ.
2 ທັກສະການຂຽນ: ການຂຽນນັ້ນມີຜົນຫຼາຍໃນການປະສານງານລະຫວ່າງພາກສ່ວນຕ່າງໆ, ການເວັ້ນວັກຜິດພຽງບ່ອນດຽວອາດໝາຍເຖິງການສື່ສານທີ່ຜິດພາດຄັ້ງໃຫຍ່ໄດ້. ດັ່ງນັ້ນ, ທັກສະການຂຽນຈຶ່ງເປັນສິ່ງທີ່ບໍ່ຄວນປະປ່ອຍ.
3 ທັກສະດ້ານການຄິດວິເຄາະ: ນັກການຕະຫຼາດຄວນມີທັດສະນະທີ່ກວ້າງໄກ ໂດຍມີຈຸດເລີ່ມຕົ້ນຈາກການພັດທະນາທັກສະໃນການຄິດວິເຄາະຂໍ້ມູນຕ່າງໆ ກ່ຽວກັບແຜນການຕະຫຼາດຂອງຕົນເອງໄດ້ຢ່າງມີປະສິດທິພາບ.
4 ທັກສະດ້ານສ້າງສັນສິ່ງໃໝ່: ແນວຄິດສ້າງສັນເປັນທັກສະທີ່ນັກການຕະຫຼາດບໍ່ອາດຈະຂາດໄດ້ ເພາະການສ້າງກົນລະຍຸດການຕະຫຼາດທີ່ແຕກຕ່າງ ບໍ່ຄືໃຜຈະເຮັດໃຫ້ສິນຄ້າ ແລະ ບໍລິການໂດດເດັ່ນອອກມາຈາກຄູ່ແຂ່ງຂັນໄດ້ ເຊິ່ງການພັດທະນາທັກສະສ່ວນນີ້ຕ້ອງອາໄສການຮຽນຮູ້ຈາກຂໍ້ມູນຂ່າວໃໝ່ໆຢູ່ສະເໝີ.
5 ທັກສະການເຈລະຈາຕໍ່ລອງ: ນັກການຕະຫຼາດບໍ່ຈຳເປັນຕ້ອງເວົ້າເກັ່ງເປັນນ້ຳຖ້ວມທົ່ງ ແຕ່ທຸກຄຳເວົ້າທີ່ອອກມາໃນລະຫວ່າງການຕິດຕໍ່ທຸລະກິດຕ້ອງເນັ້ນໄປທີ່ເປົ້າໝາຍ ແລະ ກໍ່ໃຫ້ເກີດປະໂຫຍດຕໍ່ວຽກທີ່ເຮັດຢູ່ ເຊິ່ງມີສ່ວນສຳຄັນທີ່ເຮັດໃຫ້ການເຈລະຈານັ້ນປະສົບຜົນສຳເລັດໄດ້.
6 ທັກສະການເຮັດວຽກເປັນທີມ: ດ້ວຍແນວທາງການເຮັດວຽກການຕະຫຼາດນັ້ນບໍ່ອາດຈະຈົບວຽກໄດ້ດ້ວຍຕົວຄົນດຽວ, ການຮູ້ຈັກເຮັດວຽກເປັນທີມຈະສົ່ງຜົນໃຫ້ຄວາມສຳເລັດຍິ່ງໃກ້ເຂົ້າມາ.
7 ທັກສະທາງຄອມພິວເຕີ: ໃນຍຸກໂຊຊຽວມີເດຍຄືແບບທຸກວັນນີ້ ເຕັກໂນໂລຊີເປັນປັດໄຈສຳຄັນທີ່ບໍ່ອາດຈະຂາດໄປໄດ້ໃນການເຮັດວຽກ, ການຮູ້ຈັກໃຊ້ປະໂຫຍດຈາກຄອມພິວເຕີ ແລະ ເຕັກໂນໂລຊີໃຫ້ເກີດປະໂຫຍດສູງສຸດ ຈະຊ່ວຍເຮັດໃຫ້ ວຽກຂອງທ່ານງ່າຍຂຶ້ນ.
8 ທັກສະດ້ານການຄ້າ: ພຽງແຕ່ຕຳແໜ່ງທີ່ຄວບຄຸມກັບເລື່ອງ “ ການຕະຫຼາດ ” ແລ້ວຫາກຂາດເຊິ່ງທັກສະດ້ານນີ້ໄປ ໂອກາດທີ່ຈະເລີນກ້າວໜ້າຄົງເປັນໄປໄດ້ຍາກ, ກະແສ ຫຼື ທ່າອ່ຽງທີ່ກຳລັງໄດ້ຮັບຄວາມນິຍົມເປັນສິ່ງທີ່ຊ່ວຍໃຫ້ທ່ານສາມາດວິເຄາະໄດ້ວ່າທ່າອ່ຽງການຕະຫຼາດໃນຕອນນີ້ໄປຮອດໃສແລ້ວ ແລະ ແນ່ນອນວ່າຈະເຮັດໃຫ້ທ່ານສາມາດຂາຍສິນຄ້າໄດ້ຖືກທີ່ຖືກທາງ.
9 ຄວາມພະຍາຍາມໃນ ຄວາມສຳເລັດ: ຂໍ້ນີ້ອາດຈະບໍ່ແມ່ນທັກສະຢ່າງດຽວ ແຕ່ຫາກນັກການຕະຫຼາດບໍ່ມີຄວາມພະຍາຍາມທີ່ຈະກ້າວໄປໃຫ້ເຖິງ ຄວາມສຳເລັດແລ້ວ ຄວາມກ້າວໜ້າໃນໜ້າທີ່ວຽກງານຄົງເກີດຂຶ້ນໄດ້ຍາກ.
( ຮຽບຮຽງຈາກ: newtv.co.th, ໂດຍ: ສັນຕິ )
