ເພື່ອແກ້ໄຂບັນຫາປາກທ້ອງທີ່ກຳລັງສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນລາວບັນດາເຜົ່າ ໂດຍສະເພາະຊາວນະຄອນຫຼວງວຽງຈັນ ພະແນກອຸດສາຫະກຳ ແລະການຄ້າໄດ້ມອບໃຫ້ບໍລິສັດຄຳແພງເພັດແຈ້ງສະຫວ່າງສືບຕໍ່ຂາຍເຂົ້າແຊກແຊກລາຄາຕະຫຼາດຮັບໃໝ່ຈົນກວ່າຈະໝົດເດືອນກັນຍາ.
ໃນວັນທີ 11 ກັນຍາ 2023 ນີ້ພະແນກອຸດສາຫະກຳ ແລະການຄ້າ ນະຄອນຫຼວງວຽງຈັນໄດ້ເຮັດໜັງສືແຈ້ງການສະບັບເລກທີ 1463/ພອຄ.ນວ.ຄພນ ເຖິງທ່ານຜູ້ອໍານວຍການບໍລິສັດ ຄໍາແພງເພັດ ແຈ້ງສະຫວ່າງ ສົ່ງເສີມການກະເສດ ຂາອອກ-ຂາເຂົ້າ ຈໍາກັດຜູ້ດຽວ, ພະນັກງານ, ທະຫານ, ຕໍາຫຼວດ ແລະ ຕະຫຼອດຮອດພໍ່ແມ່ປະຊາຊົນ ໃນນະຄອນຫຼວງວຽງຈັນ ເລື່ອງສືບຕໍ່ຈໍາຫນ່າຍເຂົ້າສານຫນຽວ (ປະເພດ 2) ແຊກແຊງລາຄາ ແລະ ດັດສົມຕະຫຼາດ ຢູ່ນະຄອນຫຼວງວຽງຈັນ.
ທັ້ງນີ້ແມ່ນປະຕິບັດຕາມທິດຊີ້ນໍາຂອງຂັ້ນເທິງໃນການຈັດຕັ້ງປະຕິບັດວຽກງານຄຸ້ມຄອງຄັງແຮເຂົ້າແຊກແຊງລາຄາ ແລະ ດັດສົມຕະຫຼາດຂອງລັດຖະບານ ໃຫ້ມີປະສິດທິຜົນ ແລະ ຮັບປະກັນໃຫ້ມີສະຖຽນລະພາບທາງດ້ານລາຄາ, ມີ ຄວາມຫມັ້ນຄົງທາງດ້ານການສະຫນອງ, ຫຼີກລ້ຽງສະພາບຂາດເຂົ້າກິນ ແລະ ການເກງກໍາໄລ ໂດຍສະເພາະແມ່ນໄລຍະສະ ພາບເສດຖະກິດມີຄວາມຫຍຸ້ງຍາກ ແລະ ເປັນການປະກອບສ່ວນຂອງພາກທຸລະກິດ ເພື່ອເຮັດໃຫ້ຜູ້ຊົມໃຊ້ໄດ້ເຂົ້າເຖິງ ສິນຄ້າປະເພດເຂົ້າກິນຖືກກ່ວາລາຄາໃນທ້ອງຕະຫຼາດ.
ຫົວຫນ້າພະແນກ ອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ຈຶ່ງໄດ້ອອກແຈ້ງການ ໃຫ້ບໍລິສັດ ຄໍາແພງເພັດ ແຈ້ງສະຫວ່າງ ສົ່ງເສີມການກະເສດ ຂາອອກ-ຂາເຂົ້າ ຈໍາກັດຜູ້ດຽວ ສືບຕໍ່ນໍາເອົາເຂົ້າສານຫນຽວ (ປະເພດ 2) ອອກຈໍາຫນ່າຍແຊກແຊງລາຄາ ແລະ ດັດສົມຕະຫຼາດ ໃນລາຄາ 12.000 ກີບ/ກິໂລ ຢູ່ໃນນະຄອນຫຼວງ ວຽງຈັນ ມີຄືດັ່ງນີ້:
ສະຖານທີ່ຂາຍ: ຢູ່ທີ່ຕະຫຼາດແຈ້ງສະຫວ່າງ(ເກົ່າ), ບ້ານ ນາສ້ຽວ, ເມືອງ ນາຊາຍທອງ, ນະຄອນຫຼວງວຽງຈັນ ເລີ່ມ ແຕ່ວັນທີ 11 ຫາ 29 ກັນຍາ 2023(ເປີດຂາຍວັນຈັນ ຫາ ວັນເສົາ, ເວລາ 08:00 ໂມງ – 17:00 ໂມງ)
ເງື່ອນໄຂຂອງຜູ້ຊື້: ຜູ້ທີ່ມາຊື້ຕ້ອງໄດ້ລົງທະບຽນລາຍຊື່ກ່ອນຊື້ສິນຄ້າ ແລະ ສາມາດຊື້ເຂົ້າສານຫນຽວ (ປະເພດ ຂ) ບໍ່ ໃຫ້ກາຍ 50 ກິໂລ/ຄົນ/ຄັ້ງ;
ມອບໃຫ້ຂະແຫນງການຄ້າພາຍໃນຕິດຕາມ, ຊຸກຍູ້ວຽກງານດັ່ງກ່າວໃຫ້ມີປະສິດທິຜົນ ແລະ ລາຍງານສະພາບການຈັດ ຕັ້ງປະຕິບັດໃຫ້ຂັ້ນເທິງຊາບທ່ວງທັນເວລາ.
