ໃນວັນທີ 11 ກໍລະກົດ 2023 ທີ່ຜ່ານມາ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ແລະ ພົຈວ ຄໍາແພງ ເພັດ ຫົວໜ້າກອງບັນຊາການ ປກສ ແຂວງໄຊຍະບູລີ ພ້ອມດ້ວຍຄະນະ ໄດ້ລົງກວດກາສະຖານທີ່ທີ່ຈະກໍ່ສ້າງ ສະໜາມບິນຢູ່ເມືອງທົ່ງມີໄຊ.
ໂດຍສະຖານທີ່ຈະກໍ່ສ້າງສະໜາມບິນຕັ້ງຢູ່ຂອບເຂດ ບ້ານໃຫຍ່ ເມືອງທົ່ງມີໄຊ ແຂວງໄຊຍະບູລີ ມີເນື້ອທີ່ 19.739 ຕາແມັດ, ພື້ນທີ່ດິນດັ່ງກ່າວເປັນດິນທີ່ລັດຄຸ້ມຄອງ, ໂດຍມີຈຸດປະສົງເພື່ອຈະສ້າງໃຫ້ເປັນສະໜາມບິນຮອງຮັບການຂຶ້ນ-ລົງຂອງຍົນໃນການຂົນສົ່ງອຸປະກອນທາງການທະຫານໄດ້ສະດວກ ແລະ ວ່ອງໄວ.
ຫຼັ້ງຈາກນັ້ນ, ທ່ານເຈົ້າແຂວງ ພ້ອມດ້ວຍຄະນະ ໄດ້ສືບຕໍ່ກວດກາເບິ່ງນໍ້າລິນຢູ່ຄ້າຍທະຫານກອງຮ້ອຍ 2 ຂຶ້ນກັບກອງພັນ 411 ກອງບັນຊາການທະຫານແຂວງໄຊຍະບູລີ, ການກໍ່ສ້າງໄດ້ເລີ່ມລົງມືແຕ່ທ້າຍເດືອນ ພຶດສະພາ 2023 ຮອດປະຈຸບັນການກໍ່ສ້າງແມ່ນສໍາເລັດ 100%, ມີຄວາມຍາວແຕ່ຫົວງານຫາອ່າງເກັບນໍ້າ 1.000 ກວ່າແມັດ, ມີ 2 ອ່າງເກັບນໍ້າ, ແຕ່ລະອ່າງ ມີຂະໜາດ 2 ຄູນ 2,5 ແມັດ, ສູງ 1,5 ແມັດ, ນໍ້າດັ່ງກ່າວແມ່ນພຽງພໍກັບຄວາມຕ້ອງການຂອງຄ້າຍທະຫານ, ນອກຈາກນໍາໃຊ້ເຂົ້າໃນການບໍລິໂພກແລ້ວຍັງສາມາດນໍາໃຊ້ເຂົ້າໃນການຜະລິດໄດ້ຕື່ມອີກ, ມູນຄ່າການກໍ່ສ້າງທັງໝົດເກືອບ 60 ລ້ານກີບ.
ໂດຍ: ວາລະສານຄວາມສະຫງົບ
