ສຳນັກຂ່າວຣອຍເຕີ ລາຍງານວ່າ: ແຮງງານກວ່າ 20% ໃນເນຊີເຣຍ (ໄນເຈເຣຍ) ຕ້ອງຕົກງານ ເນື່ອງຈາກການລະບາດຂອງພະຍາດໂຄວິດ-19 ເຮັດໃຫ້ທຸລະກິດບາງສ່ວນຕ້ອງປິດກິດຈະການ.
ສູນສະຖິຕິແຫ່ງຊາດ ເນຊີເຣຍ ແລະ ໂຄງການພັດທະນາແຫ່ງສະຫະປະຊາຊາດ (ສປຊ) ໄດ້ສຳຫຼວດພາກທຸລະກິດຫຼາຍກວ່າ 3 ພັນແຫ່ງ ທັງໃນ ແລະ ນອກລະບົບຢູ່ໃນເນຊີເຣຍ ເຊິ່ງຜົນການສຳຫຼວດພົບວ່າ ແຮງງານ 1/3 ຕ້ອງຕົກງານຕັ້ງແຕ່ໄຕມາດ 4 ຂອງປີ 2020 ເປັນຕົ້ນມາ. ທັງນີ້ ຜົນການສຳຫຼວດລະບຸວ່າ ເຖິງແມ່ນວ່າຈະມີສັນຍານການຟື້ນຕົວດ້ານເສດຖະກິດຈະດີຂຶ້ນໃນປີນີ້ ແຕ່ການລະບາດຂອງໂຄວິດ-19 ຍັງສົ່ງຜົນກະທົບຢ່າງໃຫຍ່ຫຼວງຕໍ່ເສດຖະກິດ-ສັງຄົມຂອງ ນີເຊເຣຍ.
ລາຍງານລະບຸວ່າ: ຫົວໜ່ວຍທຸລະກິດຕ່າງໆຢູ່ໃນເນຊີເຣຍ ມີລາຍໄດ້ຫຼຸດລົງ ຕົ້ນທຶນສູງຂຶ້ນ ແລະ ມີບໍ່ພໍເທົ່າໃດແຫ່ງທີ່ຕອບວ່າມີຜົນກຳໄລຈາກການດຳເນີນທຸລະກິດໃນປີ 2020 ຜ່ານມາ.
ທັງນີ້ ເສດຖະກິດຂອງ ເນຊີເຣຍ ເຊິ່ງເປັນຂະໜາດໃຫຍ່ທີ່ສຸດຂອງທະວີບອາຟຣິກກາໃຕ້ ໄດ້ຮັບຜົນກະທົບຈາກລາຄານ້ຳມັນດິບໃນຕະຫຼາດໂລກຫຼຸດລົງ ໄດ້ສົ່ງຜົນຕໍ່ລາຍຮັບຂອງລັດຖະບານ ເນື່ອງຈາກ ເນຊີເຣຍ ເປັນປະເທດທີ່ເພິ່ງພາການສົ່ງອອກນ້ຳມັນດິບ ກວມເອົາ 70% ຂອງລາຍຮັບລັດຖະບານ.
ທະນາຄານໂລກລາຍງານວ່າ: ວິກິດໂຄວິດ-19 ອາດຈະເຮັດໃຫ້ຊາວເນຊີເຣຍປະມານ 11 ລ້ານຄົນຕ້ອງກັບເຂົ້າສູ່ຄວາມທຸກຍາກໃນປີ 2022 ສົ່ງຜົນໃຫ້ມີຄົນທີ່ຈັດຢູ່ໃນປະເພດທຸກຍາກຂອງເນຊີເຣຍທັງໝົດປະມານ 100 ກວ່າລ້ານຄົນ, ຈາກປະຊາກອນທັງໝົດ 200 ກວ່າລ້ານຄົນ.
