ສະຫວັນນະເຂດເປັນແຂວງທີ່ໃຫຍ່ສຸດຂອງປະເທດລາວ, ມີພົນລະເມືອງຫຼາຍ ແລະໄປເຮັດວຽກຢູ່ຕ່າງຖິ່ນຕ່າງປະເທດກໍ່ຫຼາຍ ດັ່ງນັ້ນ ເພື່ອປົກປ້ອງປະຊາຊົນພາຍໃນແຂວງໃຫ້ປອດໄພຈາກຂະບວນການສວຍໃຊ້ຕ່າງໆ ແຂວງສະຫວັນນະເຂດໄດ້ຮ່ວມປະຊຸມກັບທຸກພາກສ່ວນກ່ຽວຂ້ອງໃຫ້ມີສ່ວນຮ່ວມນຳກັນໃນການຊ່ວຍໃຫ້ຄວາມຮູ້ແກ່ທຸກຄົນທີ່ຢູ່ໃຕ້ການປົກຄອງຂອງຕົນ ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີ ແລະ ບໍ່ໃຫ້ອັບປະໂຫຍດຈາກການເຮັດວຽກໃນທຸກຮູບການ.
ກອງປະຊຸມ ເພື່ອປົກປ້ອງ ແລະ ໃຫ້ການຊ່ວຍເຫຼືອແຮງງານເຄື່ອນຍ້າຍໂດຍສະເພາະແຮງງານເຄື່ອນຍ້າຍເພດຍິງ ໄດ້ຈັດຂຶ້ນໃນວັນທີ 25 ມີນາຜ່ານມາ ທີ່ຫ້ອງປະຊຸມວ່າການປົກຄອງ ເມືອງ ໄຊພູທອງ ແຂວງ ສະຫວັນນະເຂດ ໂດຍພາຍໃຕ້ການເຂົ້າຮ່ວມຂອງ ທ່ານ ສົມໃຈ ສີສົມພອນ ປະທານຄະນະບໍລິຫານງານສະຫະພັນກຳມະບານແຂວງ, ມີທ່ານ ພົມມາສົງວິໄລຄະນະປະຈໍາພັກເມືອງຜູ້ຊີ້ນຳອົງການຈັດຕັ້ງມະຫາຊົນຂັ້ນເມືອງ, ພ້ອມດ້ວຍ 3 ອົງການຈັດຕັ້ງມະຫາຊົນ, ຫ້ອງການແຮງງານ, ຫ້ອງການຍຸຕິທຳ, ຫ້ອງການ ປກສ, ໜ່ວຍໄກ່ເກ່ຍຂັ້ນບ້ານ, ຫ້ອງການສາທາລະນະສຸກ, ຫ້ອງການສຶກສາທິການ ແລະ ກິລາ ຂອງ ເມືອງ ໄຊພູທອງ ແລະ ເມືອງ ສອງຄອນ ເຂົ້າຮ່ວມຈຳນວນ 38 ທ່ານ, ຍິງ 15ທ່ານ.
ໃນໂອກາດດັ່ງກ່າວພະນັກງານສູນ MRC ກໍ່ໄດ້ຍົກໃຫ້ເຫັນເຖິງຄວາມເປັນມາ, ທີ່ຕັ້ງ, ສິດ ແລະພາລະບົດບາດຂອງສູນໃຫ້ຄຳປຶກສາສຳລັບແຮງງານເຄື່ອນຍ້າຍ ແຂວງ ສະຫວັນນະເຂດ, ທີ່ເຮັດໜ້າທີ່ໃນການໂຄສະນາເຜີຍແຜ່ຂໍ້ມູນ-ຂ່າວສານ ແລະ ການສຶກສາອົບຮົມຜູ້ອອກແຮງງານເຄື່ອນຍ້າຍພາຍໃນປະເທດ ແລະ ຜູ້ທີ່ຕ້ອງການໄປອອກແຮງງານຢູ່ຕ່າງປະເທດໃຫ້ມີການເຄື່ອນຍ້າຍແຮງງານທີ່ຖືກຕ້ອງຕາມກົດໝາຍເພື່ອຫຼີກເວັ້ນຈາກການຖືກກົດຂີ່ຂູດຮີດທາງດ້ານແຮງງານ ແລະ ການຕົກເປັນເຫຍື່ອຂອງການຄ້າມະນຸດ.
ພ້ອມດຽວກັນນີ້ກໍ່ຍັງໄດ້ຮັບຟັງການນຳສະເໜີກ່ຽວກັບສິດທິພື້ນຖານ ແລະ ພັນທະຂອງພົນລະເມືອງລາວ ຈາກຫ້ອງການສະຫະພັນແມ່ຍິງ ເມືອງ ໄຊພູທອງ ແລະ ວຽກງານຕ້ານການຄ້າມະນຸດຈາກເຈົ້າໜ້າທີ່ ປກສ ເມືອງ ໄຊພູທອງທີ່ໄດ້ໃຫ້ຮູ້ວ່າອົງປະກອບຂອງການຄ້າມະນຸດມີ 3 ອົງປະກອບທີ່ສຳຄັນຄື: 1 ການກະທຳ ທີ່ສະແດງອອກດ້ວຍການຊອກຫາ, ລັກພາຕົວ, ການເຄື່ອນຍ້າຍ, ການຂົນສົ່ງຫຼືນຳສົ່ງ, ການຮັບເອົາຄົນຢູ່ພາຍໃນຫຼືຕ່າງປະເທດ, ການໃຫ້ບ່ອນພັກເຊົາ, ລີ້ຊ່ອນ ຫຼື ການກະທຳອື່ນ ທີ່ພົວພັນເຖິງການຄ້າມະນຸດ. 2 ວິທີການ ທີ່ສະແດງອອກດ້ວຍການຂົນຂວາຍ, ແນະນຳ, ຕົວະຍົວະ, ຫຼອກລວງ, ຊື້ຈ້າງ, ຈອບອອຍ, ຍຸຍົງ, ສວຍໃຊ້ອຳນາດ, ບັງຄັບ, ນາບຂູ່, ຜູກມັດດ້ວຍໜີ້ສິນ, ເອົາເດັກມາລ້ຽງ ຫຼື ເອົາເດັກເປັນລູກລ້ຽງແອບແຝງ, ໝັ້ນໝາຍແອບແຝງ, ແຕ່ງດອງແອບແຝງ, ໃຫ້ຖືພາ, ຂໍທານ ແລະ ຖ່າຍຮູບພາບ, ສະແດງ, ເຜີຍແຜ່ສິ່ງລາມົກ ແລະ ວິທີການອື່ນໆ. 3 ຈຸດປະສົງ ທີ່ສະແດງອອກດ້ວຍການຂູດຮີດແຮງງານ, ຂູດຮີດທາງເພດ, ເອົາເປັນຂ້າທາດ, ຄ້າໂສເພນີ, ບັງຄັບໃຫ້ເປັນໂສເພນີ, ເອົາອະໄວຍະວະຕ່າງໆຂອງຮ່າງກາຍໄປຂາຍ ແລະ ຈຸດປະສົງອື່ນໆທີ່ຂັດກັບລະບຽບກົດໝາຍ ແລະ ວັດທະນະທຳອັນດີງາມຂອງຊາດ.
ທັງໝົດເຫຼົ່ານີ້ ລ້ວນເປັນຂະບວນການຂອງຜູ້ບໍ່ຫວັງດີ ແລະຈະເຮັດໃຫ້ຜູ້ຫຼົງເຊື່ອໄດ້ຮັບຄວາມເດືອດຮ້ອນໃນພາຍຫຼັງ ສະນັ້ນ ເພື່ອເປັນການປ້ອງກັນບໍ່ໃຫ້ເກີດຂຶ້ນກັບປະຊາຊົນ, ຊາວໜຸ່ມເຍົາວະຊົນ ຂອງຊາວແຂວງສະຫວັນນະເຂດແມ່ນໃຫ້ທຸກພາກສ່ວນເປັນເຈົ້າການແນະນຳແກ່ກຸ່ມເປົ້າໝາຍທີ່ຕົນຮູ້ຈັກ ແລະຢູ່ໃຕ້ການປົກຄອງຂອງຕົນບໍ່ໃຫ້ຕົກເປັນເຫຍື່ອ ບັນດາອົງການຈັດຕັ້ງຕ້ອງຊອກທຸກວິທີທາງໃນການປົກປ້ອງ ແລະ ໃຫ້ການຊ່ວຍເຫຼືອແຮງງານເຄື່ອນຍ້າຍໂດຍສະເພາະແຮງງານເຄື່ອນຍ້າຍເພດຍິງໃຫ້ມີປະສິດທິຜົນທີ່ສູງຂຶ້ນ.
ຂ່າວຈາກ ສະຫະພັນກຳມະບານແຂວງສະຫວັນນະເຂດ
ພາບ-ຂ່າວ: ວັນນະເລດ ມະນີວົງ
