ທ່ານ ນາງ ຣີແບັກກາ ແອນນີ ເລດເວີນ ( Rebecca Anne Letven ) ຫົວໜ້າອົງການແມັກ ປະຈຳ ສປປ ລາວ ຄົນໃໝ່ ພ້ອມດ້ວຍຄະນະ ໄດ້ເຂົ້າພົບປະ ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງ ຂວາງ ພ້ອມດ້ວຍຄະນະ ໃນວັນທີ 22 ມີນາ 2021 ທີ່ຫ້ອງວ່າການແຂວງ.
ທ່ານຮອງເຈົ້າແຂວງ ໄດ້ກ່າວສະແດງຄວາມຂອບໃຈຕໍ່ການຊ່ວຍເຫຼືອ, ການເກັບກູ້ ແລະ ທຳລາຍລະເບີດທີ່ບໍ່ທັນແຕກອອກຈາກເນື້ອທີ່ຕ່າງໆ ເປັນຕົ້ນແມ່ນເນື້ອທີ່ທຳການຜະລິດຂອງປະຊາຊົນ ເຮັດໃຫ້ການດຳລົງຊີວີດມີຄວາມປອດໄພຂຶ້ນ ປະຊາຊົນໄດ້ຮູ້ເຖິງຜົນຮ້າຍຂອງລະເບີດບໍ່ທັນແຕກ ເຮັດໃຫ້ອຸບັດເຫດທີ່ເກີດຈາກລະເບີດຫຼຸດຜ່ອນລົງເລື້ອຍໆ.
ໂອກາດນີ້, ທ່ານຫົວໜ້າອົງການແມັກ ປະຈຳລາວ ກໍໄດ້ແນະນຳຕົວການປະຕິບັດວຽກງານເກັບກູ້ ແລະ ທຳລາຍລະເບີດມາໄດ້ຫຼາຍປີໃນຫຼາຍປະເທດມາແລ້ວ ໂອກາດທີ່ມາຮັບໜ້າທີ່ໃໝ່ນີ້ ຈະສືບຕໍ່ຮັກສາ ຄວາມສຳພັນ, ຮ່ວມມືກັບອຳນາດການປົກຄອງແຂວງ, ຂະແໜງການທີ່ກ່ຽວຂ້ອງ, ປະຊາຊົນ ເພື່ອໃຫ້ການຈັດຕັ້ງປະຕິບັດວຽກງານໂປ່ງໃສ, ສືບຕໍ່ຂົນຂວາຍຜູ້ໃຫ້ທຶນ ເພື່ອນຳເອົາທຶນຮອນມາເກັບກູ້ ແລະ ທຳລາຍລະເບີດນັບມື້ໃຫ້ໝົດໄປເລື້ອຍໆ.
[ ຂ່າວ: ບຸນມີ ແສງທຸມມີ ]
