ໃນຕອນເຊົ້າວັນທີ 14 ມີຖຸນາ 2023ນີ້ ນ້ອງນັກຮຽນທົ່ວປະເທດໄດ້ເລີ່ມສອບເສັງຈົບຊັ້ນ ມ4 ສ່ວນວິຊາສອບເສັງມີ 6 ວິຊາຄື: ວິຊາພາສາລາວ-ວັນນະຄະດີ,ວິຊາ ວິທະຍາສາດສັງຄົມ,ວິຊາວິທະຍາສາດທໍາມະຊາດ,ວິຊາສຶກສາພົລະເມືອງ,ວິຊາຄະນິດສາດ ແລະວິຊາພາສາອັງກິດ .
ຕາມຂ່າວວິທະຍຸແຂວງສະຫວັນນະເຂດໃຫ້ຮູ້ວ່າ ສະເພາະໃນເມືອງໄຊພູທອງ ແຂວງສະຫວັນນເຂດ ໄດ້ເປີດການສອບເສັງຈົບຊັ້ນມັດທະຍົມຕົ້ນ (ມ4) ສົກຮຽນ 2022-2023, ໂດຍການເຂົ້າຮ່ວມ ແລະ ໃຫ້ກຽດຕັດຫົວບົດ ສອບເສັງຂອງທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ,ມີທ່ານຄໍາພູວີ ວຽງດາລາ ຮອງຫົວໜ້າຂະແໜງວິທະຍາສາດ ອະຊີວະ ແລະ ສຶກສາຊັ້ນສູງ ພະແນກສຶກສາທິການ ແລະ ກິລາແຂວງ,ທ່ານ ແສງທອນ ນັນທະວົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ ,ອໍານວຍການໂຮງຮຽນ,ຄູອາຈານ,ກໍາມະການຍາມຫ້ອງ ແລະ ນັກຮຽນຊັ້ນ ມ4 ພາຍໃນເມືອງເຂົ້າຮ່ວມ.
ສໍາລັບການສອບເສັງມີສູນສອບເສັງຈົບຊັ້ນ ມ4 ທົ່ວເມືອງໄຊພູທອງມີ 3 ສູນສອບເສັງຄື: ສູບສອບເສັງ ໄຊພູທອງ,ສູນສອບເສັງ ພູມມະເຈດີ ແລະ ສູນສອບເສັງນາຄໍາ ,ມີຈໍານວນນັກສອບເສັງທັງໝົດ 364 ຄົນ,ຍິງ171 ຄົນ, ມີ ຫ້ອງສອບເສັງ 19 ຫ້ອງ,ສະເລ່ຍນັກສອບຕໍ່ຫ້ອງ20-21 ຄົນ, ສ່ວນວິຊາສອບເສັງມີ 6 ວິຊາຄື: ວິຊາພາສາລາວ-ວັນນະຄະດີ,ວິຊາ ວິທະຍາສາດສັງຄົມ,ວິຊາວິທະຍາສາດທໍາມະຊາດ,ວິຊາສຶກສາພົລະເມືອງ,ວິຊາຄະນິດສາດ ແລະວິຊາພາສາອັງກິດ . ການສອບເສັງ ແມ່ນດໍາເນີນເປັນ ເວລາ 3 ວັນນັບ ແຕ່ວັນ ທີ 14-16 ມີຖຸນາ 2023 ຈຶ່ງສໍາເລັດ.
ໂອກາດດັ່ງກ່າວທ່ານ ນາງ ພູເງິນ ເທບພະນົນໄຊ ໄດ້ກ່າວວ່າ: ລູກຫຼານທຸກຄົນທີ່ມີໜ້າມາສອບເສັງ ບໍ່ຄວນກົດດັນຕົນເອງ, ຕ້ອງຕັ້ງໃຈສອບເສັງ,ຕ້ອງເຊື່ອໝັ້ນຕົນເອງ,ເຊື່ອໝັ້ນບົດຮຽນທີ່ໄດ້ຄົ້ນຄວ້າມາ,ຄຽງຄູ່ກັນນີ້ ທ່ານຍັງໄດ້ເນັ້ນໃຫ້ຄະນະກໍາມະການຍາມຫ້ອງສອບເສັງທຸກຄົນຕ້ອງຮັກສາລະບຽບຂອງການສອບເສັງທີ່ວາງອອກຢ່າງເຄັ່ງຄັດ, ພ້ອມດຽວກັນນັ້ນທ່ານກໍ່ຍັງໄດ້ຮຽກຮ້ອງມາຍັງ ຜູ້ປົກຄອງພໍ່ແມ່ນັກຮຽນ ຈົ່ງໄດ້ເອົາໃຈໃສ່ເບິ່ງແຍງລູກຫຼານ ບໍ່ໃຫ້ປະລະການສອບເສັງ,ຊຸກຍູ້ເຂົາເຈົ້າໄດ້ມາສອບເສັງໃຫ້ທັນເວລາຕາມທີ່ທາງຄະນະກໍາມະການກໍານົດໄວ້.
ພາບ-ຂ່າວ: ພັນທະມິດ ວົງສຸທິ