ໃນຫຼາຍປີຜ່ານມາພັກ-ລັດແມ່ນໄດ້ຈັດສັນງົບປະມານ ເພື່ອກໍ່ສ້າງຕາຝັ່ງກັນເຈື່ອນລຽບຕາມແຄມນ້ຳຂອງເປັນໄລຍະມາຢູ່ຫຼາຍແຂວງ, ໃນນັ້ນສະເພາະນະຄອນຫຼວງວຽງຈັນແມ່ນມີຄວາມຍາວ 182 ກິໂລແມັດ ມາຮອດປະຈຸບັນເຂດທີ່ກໍ່ສ້າງແລ້ວຍັງບໍ່ທັນໄດ້ເຄິ່ງໜຶ່ງຂອງລວງຍາວທີ່ມີ.
ຕາມຂໍ້ມູນລາຍງານໃນໂອກາດການລົງຕິດຕາມການເຊາະເຈື່ອນຂອງຕາຝັ່ງແມ່ນ້ຳຂອງໃນຄັ້ງວັນທີ 04 ມັງກອນ 2024 ທ່ານ ຮສ. ປອ. ລິນຄໍາ ດວງສະຫວັນ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ທ່ານ ພອນໄຊ ສຸລິຍະວົງ ຫົວໜ້າຂະແໜງການທາງນ້ຳ, ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ລາຍງານກ່ຽວກັບສະພາບການເຊາະເຈື່ອນຂອງຕາຝັ່ງແມ່ນໍ້າຂອງ ແລະ ການກໍ່ສ້າງປ້ອງກັນຕະຝັ່ງເຈື່ອນ ຂອບເຂດເມືອງສັງທອງ ວ່າ: ນະຄອນຫຼວງວຽງຈັນ ມີຂອບເຂດຊາຍແດນທີ່ຕິດກັບແມ່ນໍ້າຂອງນັບຕັ້ງແຕ່ປາກຫ້ວຍຈັນເມືອງສັງທອງ ຫາ ປາກຫ້ວຍສະພາຍ ເມືອງປາກງື່ມ ມີຄວາມຍາວທາງນໍ້າທັງໝົດ 182 ກິໂລແມັດ (ກມ), ການກໍ່ສ້າງປ້ອງກັນຕາຝັ່ງເຈື່ອນມາຮອດປັດຈຸບັນສຳເລັດ 73,9 ກມ ເທົ່າກັບ 40,6% (ໃນ 73,9 ກມ ແຍກເປັນສອງແບບການກໍ່ສ້າງຄື: ກໍ່ສ້າງແບບລຽນຫີນຕາມສະຫຼົບ RipRap 51,355 ກມ, ກໍ່ສ້າງແບບຄັນຄູຫີນ Groy ຈໍານວນ 280 ຄັນຄູ ເທົ່າກັບ 22,545 ກມ) ຍັງບໍ່ທັນໄດ້ກໍ່ສ້າງ 108 ກມ.
ສຳລັບຂອບເຂດເມືອງສັງທອງ ແມ່ນມີແມ່ນໍ້າຂອງໄຫຼຜ່ານປະມານ 49 ກມ ນັບຕັ້ງແຕ່ປາກຫ້ວຍຈັນ ຫາ ບ້ານອ່າງໃຫຍ່; ການກໍ່ສ້າງປ້ອງກັນຕາຝັ່ງເຈື່ອນໃນໄລຍະຜ່ານມາຮອດປັດ ຈຸບັນ ແມ່ນສາມາດຈັດຕັ້ງປະຕິບັດໄດ້ 11,64 ກມ ໃນນີ້ ກໍ່ສ້າງແບບລຽນຫີນສະຫຼົບ 5,71 ກມ, ກໍ່ສ້າງແບບຄັນຄູຫີນ ຈໍານວນ 75 ຄັນຄູ ເທົ່າກັບ 5,93 ກມ, ຍັງບໍ່ທັນໄດ້ຮັບການກໍ່ສ້າງ 37,36 ກມ; ເຂດເມືອງສັງທອງ ແມ່ນມີເກາະ ດອນຂະໜາດນ້ອຍຈຳນວນຫຼາຍ ແລະ ມີດອນຂະໜາດໃຫຍ່ 1 ດອນ ຄືດອນກາງຂອງ, ມີລວງຍາວອ້ອມຮອບດອນ 12 ກມ ເນື້ອທີ່ປະມານ 467 ເຮັກຕາ.
ຈາກນັ້ນ, ທ່ານ ຮສ. ປອ. ລິນຄຳ ດວງສະຫວັນ ໄດ້ມອບເຄື່ອງກອງນ້ຳສະອາດທີ່ໄດ້ຕິດຕັ້ງສຳເລັດແລ້ວຈາກການຊ່ວຍເຫຼືອຂອງບໍລິສັດ ທີປຶກສາ ດາຊານ ສ.ເກົາຫຼີ ໃຫ້ແກ່ອົງການປົກຄອງເມືອງສັງທອງ ແລະ ບ້ານນາຫອຍປັງ.
ພາບ ແລະ ຂ່າວ: ຂ່າວຜູ້ແທນປະຊາຊົນ
