ໃນວັນທີ 17 ສິງຫາ 2023 ສະພາປະຊາຊົນແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ ປະທານສະພາປະຊາຊົນແຂວງວຽງຈັນ ພ້ອມບັນດາສະມາຊິກສະພາແຫ່ງຊາດປະຈຳເຂດເລືອກຕັ້ງທີ 10 ແຂວງວຽງຈັນ ໄດ້ພ້ອມກັນປະເມີນຄວາມໄວ້ວາງໃຈ ໃນການປະຕິບັດໜ້າທີ່ຂອງບຸກຄະລາກອນທີ່ສະພາປະຊາຊົນແຂວງ ເລືອກຕັ້ງ ຫຼື ຮັບຮອງເອົາການແຕ່ງຕັ້ງ.
ທ່ານ ລຳໄມ ກູດລາວົງ ຄະນະປະຈຳພັກແຂວງ ຮອງປະທານສະພາປະຊາຊົນແຂວງວຽງຈັນໄດ້ກ່າວວ່າ: ກອງປະຊຸມເທື່ອນີ້ໄດ້ດໍາເນີນການໃຫ້ຄະແນນ, ປະເມີນຄວາມໄວ້ວາງໃຈ ໃນການປະຕິບັດໜ້າທີ່ຂອງບຸກຄະລາກອນທີ່ສະພາປະຊາຊົນແຂວງ ເລືອກຕັ້ງ ຫຼື ຮັບຮອງເອົາການແຕ່ງຕັ້ງ, ໃນການປະເມີນຄັ້ງນີ້ ກໍ່ເພື່ອເປັນການປະຕິບັດຕາມກົດໝາຍ,ອີກດ້ານໜຶ່ງ ເພື່ອເຮັດໃຫ້ບັນດາທ່ານບຸກຄະລາກອນ ທີ່ສະພາປະຊາຊົນ ເລືອກຕັ້ງ ແລະ ຮັບຮອງເອົາການແຕ່ງຕັ້ງ ເຫັນໄດ້ດ້ານດີ, ດ້ານອ່ອນ-ຂໍ້ຄົງຄ້າງ, ມີວິທີການປັບປຸງ,ແກ້ໄຂດ້ານອ່ອນ, ຂໍ້ຄົງຄ້າງແລະ ເສີມຂະຫຍາຍດ້ານດີ, ດ້ານຕັ້ງໜ້າ ເຮັດໃຫ້ການຄຸ້ມຄອງ, ບໍລິຫານວຽກງານໃນອົງການລັດ ມີການພັດທະນາດີຂຶ້ນເທື່ອລະກ້າວ.
ການໃຫ້ຄະແນນປະເມີນຄວາມໄວ້ວາງໃຈ ໃນການປະຕິບັດໜ້າທີ່ ຂອງບຸກຄະລາກອນທີ່ສະພາປະຊາຊົນແຂວງເລືອກຕັ້ງ ຫຼື ຮັບຮອງເອົາການແຕ່ງຕັ້ງ ໃນຄັ້ງນີ້ ຖືວ່າເປັນການປະເມີນຜົນທີ່ມີຄວາມສຳຄັນຫຼາຍ ເພາະມັນແມ່ນການປະເມີນຄວາມໄວ້ວາງໃຈ ໃນການປະຕິບັດໜ້າທີ່ສໍາລັບພະນັກງານການນໍາລະດັບສູງ, ທັງເປັນການຮຽກຮ້ອງໃຫ້ສະມາຊິກສະພາປະຊາຊົນແຂວງ ໄດ້ຍົກສູງຄວາມຮັບຜິດຊອບ ຕໍ່ໜ້າທີ່ການເມືອງຂອງຕົນ ໃນຖານະທີ່ເປັນຕົວແທນຂອງປະຊາຊົນບັນດາເຜົ່າ.
ທ່ານ ລຳໄມ ກູດລາວົງ ກ່າວອີກວ່າບຸກຄະລາກອນທີ່ຖືກປະເມີນຄວາມໄວ້ວາງໃຈ ແມ່ນຜູ້ທີ່ດໍາລົງຕຳແໜ່ງ ຄື :1. ສະພາປະຊາຊົນແຂວງມີ ປະທານສະພາປະຊາຊົນແຂວງ;ຮອງປະທານ ແລະ ກໍາມະການຄະນະປະຈໍາສະພາປະຊາຊົນແຂວງ,ເລຂາທິການສະພາປະຊາຊົນແຂວງ,ຮອງປະທານຄະນະກໍາມະການ 2. ອົງການປົກຄອງແຂວງມີເຈົ້າແຂວງ,ຮອງເຈົ້າແຂວງ,ຫົວໜ້າພະແນກການ, ອົງການຂອງແຂວງ,ເຈົ້າເມືອງ 11 ເມືອງ,3. ອົງການໄອຍະການປະຊາຊົນແຂວງ, ສານປະຊາຊົນແຂວງມີ ຫົວຫນ້າອົງການໄອຍະການປະຊາຊົນແຂວງ,ປະທານສານປະຊາຊົນແຂວງແລະປະທານສານປະຊາຊົນແຂວງເຂດ I, II, III ເຊິ່ງບຸກຄະລາກອນທີ່ຈະຖືກປະເມີນຄວາມໄວ້ວາງໃຈ ແມ່ນຜູ້ທີ່ດຳລົງຕຳແໜ່ງດັ່ງກ່າວຢ່າງໜ້ອຍ 1 ປີຂຶ້ນໄປນັບແຕ່ວັນໄດ້ຮັບການເລືອກຕັ້ງ ຫຼື ແຕ່ງຕັ້ງ ເຖິງວັນປະເມີນຜົນ.
ພ້ອມນີ້ ທ່ານບຸນສອນ ເພັດລາວັນ ຮອງເລຂາພັກແຂວງ ປະທານສະພາປະຊາຊົນແຂວງວຽງຈັນກໍ່ໄດ້ເນັ້ນຫນັກໃຫ້ສະມາຊິກສະພາປະຊາຊົນທຸກທ່ານຈົ່ງເອົາໃຈໃສ່ ແລະ ເພີ່ມທະວີຄວາມຮັບຜິດຊອບສູງຕໍ່ການປະເມີນໃນຄັ້ງນີ້ເພື່ອໃຫ້ມີຜົນສຳເລັດຕາມລະດັບຄາດຫມາຍ.
ຂ່າວ: Media Laos
