ວັນທີ 5 ເດືອນສິງຫາ 2021 ສປປ ລາວ ໄດ້ຮັບວັກຊີນປ້ອງກັນພະຍາດ ໂຄວິດ-19 ຈາກການຊ່ວຍເຫຼືອຂອງລັດຖະບານຍີ່ປຸ່ນ ໂດຍຜ່ານໂຄງການ COVAX Facility.
ພິທີມອບຮັບວັກຊິນດັ່ງກ່າວ ເຈັດຂຶ້ນຢູ່ທີ່ສະໜາມບິນສາກົນວັດໄຕ ດ້ວຍການເຂົ້າຮ່ວມຂອງທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ, ທ່ານ ເຄໂຊ ທາເກວະກະ ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ທ່ານ ດຣ. ກາວ ຈູນວ່າການແທນຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ເເລະ ທ່ານນາງ ດຣ ເພຍ ເຣເບນໂຣ ບຣິໂຕ ຜູ້ຕາງໜ້າອົງການຢູນິເຊັບ ປະຈໍາ ສປປ ລາວ.
ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ກ່າວວ່າ: “ລັດຖະບານແຫ່ງ ສປປ ລາວ ຕີລາຄາສູງຕໍ່ການຊ່ວຍເຫຼືອວັກຊີນ ແອັສຕຣາເຊເນກາ ໃຫ້ແກ່ ສປປ ລາວ ໃນຄັ້ງນີ້ ຊຶ່ງເປັນການສະແດງເຖິງຄວາມພະຍາຍາມຂອງລັດຖະບານ ແລະ ປະຊາຊົນ ຍີ່ປຸ່ນ ເພື່ອຊ່ວຍ ລັດຖະບານ ແລະ ປະຊາຊົນລາວ ໃນການສະກັດກັ້ນ ແລະ ຄວບຄຸມການແຜ່ລະບາດຂອງພະຍາດ ໂຄວິດ -19 ຢູ່ ສປປ ລາວ. ວັກຊີນຊຸດນີ້ ຈະຊ່ວຍຂັບເຄື່ອນຄວາມພະຍາຍາມສັກວັກຊີນກັນພະຍາດຂອງ ສປປ ລາວ ໃຫ້ກ້າວໄປຂ້າງໜ້າ ແລະ ເຮັດໃຫ້ພວກເຮົາຫຍັບເຂົ້າໃກ້ເປົ້າໝາຍການສັກວັກຊີນກັນພະຍາດ ໂຄວິດ-19 ໃຫ້ໄດ້ 50% ຂອງປະຊາກອນພາຍໃນປີນີ້.”
ລັດຖະບານແຫ່ງ ສປປ ລາວ ຈະນໍາໃຊ້ການບໍລິຈາກຄັ້ງລ້າສຸດນີ້ ເພື່ອສືບຕໍ່ສັກວັກຊີນໃຫ້ແກ່ກຸ່ມບູລິມະສິດ, ລວມທັງຜູ້ທີ່ມີອາຍຸ 60 ປີຂຶ້ນໄປ, ຜູ້ທີ່ມີພະຍາດປະຈໍາຕົວ ແລະ ພະນັກງານສາທາລະນະສຸກໃນຂອບເຂດທົ່ວປະເທດ, ໂດຍສອດຄ່ອງກັບແຜນປະຕິບັດການສັກວັກຊີນກັນພະຍາດ ໂຄວິດ-19 ແຫ່ງຊາດ ແລະ ເພື່ອສະໜັບສະໜູນເປົ້າໝາຍຂອງລັດຖະບານແຫ່ງ ສປປ ລາວ ໃນການສັກວັກຊີນກັນພະຍາດໃຫ້ໄດ້ 50% ຂອງປະຊາກອນພາຍໃນທ້າຍປີ 2021.
ທ່ານ ເຄໂຊ ທາເກວະກະ ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ ກ່າວວ່າ: “ລັດຖະບານຍີ່ປຸ່ນເປັນຜູ້ສະໜັບສະໜູນ ທີ່ໃກ້ຊິດຂອງລັດຖະບານແຫ່ງ ສປປ ລາວ ໃນການຕອບໂຕ້ກັບພະຍາດ ໂຄວິດ-19 ນັບຕັ້ງແຕ່ການລະບາດຂອງເຊື້ອໄວຣັສໃນເບື້ອງຕົ້ນ ເເລະ ຍັງໄດ້ສະໜັບສະໜູນ ສປປ ລາວ ດ້ວຍອຸປະກອນປ້ອງກັນສ່ວນຕົວ (PPE) ສໍາລັບພະນັກງານແພດໝໍຢູ່ແຖວໜ້າ ແລະ ອຸປະກອນອົກຊີເພື່ອປິ່ນປົວຄົນເຈັບທີ່ຕິດເຊື້ອພະຍາດ ໂຄວິດ-19, ພ້ອມທັງສ້າງຄວາມເຂັ້ມແຂງຂອງອຸປະກອນລະບົບຄວາມເຢັນໃນປະເທດພາຍໃຕ້ແຜນງານ “Last One Mile Support”.
ຂ້າພະເຈົ້າຫວັງວ່າ ການບໍລິຈາກວັກຊີນຄັ້ງລ້າສຸດນີ້ ຈະຊ່ວຍໃຫ້ ສປປ ລາວ ບັນລຸເປົ້າໝາຍການສັກວັກຊີນໃນປີ 2021.”
