ມາທໍາຄວາມຮູ້ຈັກກັບອີກໜຶ່ງໜຸ່ມຜູ້ຜ່ານເຂົ້າຮອບ 12 ຄົນມາໝາດໆເລີຍ ໃນເວທີ Mister Global Laos 2021 ດອນສະຫວັນ ໄຊມົນຕີ ຫຼື ດອນ ໝາຍເລກMGL11 ປັດຈຸບັນອາຍຸ 27 ປີ ມາຈາກແຂວງ ຈຳປາສັກ ຈົບການສຶກສາມາຈາກ ສສ ຫວຽດນາມ ຕອນນີ້ກຳລັງເຮັດວຽກເປັນພະນັກງານເອກະຊົນ.
ໜຸ່ມດອນ ໄດ້ໃຫ້ສໍາພາດກັບທີມຂ່າວບັນເທີງວ່າ: ທີ່ຜ່ານມາແມ່ນເຄີຍປະກວດເປັນງານຂອງໂຮງຮຽນໃນໄລຍະຮຽນມະຫາວິທະຍາໄລ ແລະ ສາມາດໄດ້ທີ 1ມາ ເຖິງຈະເປັນເວທີນ້ອຍແຕ່ກໍເປັນຄວາມພາກພູມໃຈຫຼາຍ ເພາະເປັນຜູ້ຊາຍລາວຄົນດຽວທີ່ເຂົ້າຮ່ວມປະກວດໃນເວທີນັ້ນ ແລະ ໄດ້ຕໍາແໜ່ງ, ຄວາມໃຝ່ຝັນເວທີນີ້ແນ່ນອນເລີຍ ນອກຈາກຢາກໄດ້ມິດຕະພາບຈາກຜູ້ເຂົ້າປະກວດນຳກັນແລ້ວ ຄວາມໃຝ່ຝັນສູງສຸດກໍຄືຢາກເປັນຕົວແທນໜຸ່ນລາວໄປປະກວດຕໍ່ໃນເວທີສາກົນ ສ່ວນເລື່ອງວົງການບັນເທີງແມ່ນມັກທຸກຢ່າງເລີຍ ບໍ່ວ່າຈະເປັນການເດີນແບບ, ການສະແດງ, ພິທີກອນ ຖ້າມີໂອກາດກໍຢາກເຮັດທັງໝົດ.
ສຳລັບຄະຕິປະຈຳໃຈຂອງດອນແມ່ນ: “ ເຮັດໃນສິ່ງທີ່ມັກ ຮັກໃນສິ່ງທີ່ເຮັດ ” ເພາະເຊື່ອວ່າຖ້າເຮົາເຮັດໃນສິ່ງທີ່ມັກ ແລະ ຮັກ ຜົນຈະອອກມາດີແນ່ນອນ.
ຄວາມສາມາດທີ່ຮູ້ສຶກວ່າຕົນເອງຖະໜັດເລີຍ ອາດຈະເປັນການເວົ້າ ນັ້ນກໍຄືການເປັນພິທີກອນ, ໂຄສົກໃນງານຕ່າງໆ ເພາະເຄີຍເຮັດມາໃນໄລຍະຮຽນມະຫາໄລ ແລະ ອີກສິ່ງໜຶ່ງທີ່ຄິດວ່າຈະສາມາດໄດ້ໃຈຄະນະກໍາມະການໄດ້ ດອນຄິດວ່າແມ່ນຄວາມມຸ່ງໝັ້ນ, ຄວາມເປັນຕົວຂອງຕົວເອງ, ຄວາມພ້ອມ ພ້ອມທີ່ຈະສູ້ ພ້ອມທີ່ຈະພັດທະນາຕົວເອງຢູ່ຕະຫຼອດເວລາ ພ້ອມຮຽນຮູ້ຈາກທຸກປະສົບການໃໝ່ໆຢູ່ສະເໝີ.
ໃນການກຽມຕົວກ່ອນເຂົ້າປະກວດ ແນ່ນອນເລີຍຄືການເບິ່ງແຍງຕົວເອງບໍ່ວ່າຈະເປັນຮູບຮ່າງ ຫຼື ທາງດ້ານທັດສະນະຄະຕິ ອາດຈະມີການອ່ານຂ່າວ ແລະ ຕິດຕາມການປະກວດໃນປີທີ່ຜ່ານມາ ເພື່ອນຳມາພັດທະນາຕົວເອງໃຫ້ດີຂຶ້ນໄປເລື້ອຍໆ.
ສຳລັບວຽກງານໃນການຊ່ວຍສັງຄົມ ທີ່ຜ່ານມາກໍມີການຊ່ວຍເປັນທາງອອນລາຍ ເຊັ່ນ: ການຊ່ວຍແຊຣ໌ຂ່າວສານ ແລະ ມີການຊ່ວຍນໍ້າໃຈເລັກໜ້ອຍໃຫ້ກັບຜູ້ທີ່ໄດ້ຮັບຜົນກະທົບຕາມທີ່ກຳລັງແຮງເຮົາສາມາດຊ່ວຍໄດ້.
ກິດຈະກຳຍາມວ່າງ ດອນມັກຟັງເພງ, ອອກກໍາລັງກາຍ ແລະ ສຳລັບສະຕາຍການແຕ່ງຕົວແມ່ນຢາກວ່າເປັນຄົນຊິວໆ, ແຕ່ງຕົວສະບາຍມັກໃສ່ເສື້ອຢືດດຳ, ຂາວ ກັບໂສ້ງຢີນ. ສຸດທ້າຍນີ້ຂໍຝາກທຸກຄົນຊ່ວຍເປັນກໍາລັງແຮງເຊຍແຮງໃຈໃຫ້ກັບບ່າວລາວໃຕ້ ໝາຍເລກ MGL11 ແດ່ເດີ ສັນຍາຈະເຕັມທີ່ໃນການປະກວດຄັ້ງນີ້ແນ່ນອນ ສາມາດຕິດຕາມການອັບເດດຜົນງານ ແລະ ການເຄື່ອນໄຫວຕ່າງໆໄດ້ ຜ່ານທາງເຟສບຸ໊ກສ່ວນຕົວ D’Done Xmt.
ຮູບ: D’Done Xmt