ໃນວັນທີ 4 ກໍລະກົດ 2024 ກະຊວງອຸດສາຫະກໍາ ແລະ ການຄ້າ(ອຄ)ໄດ້ ຈັດພິທີປະກາດພະນັກງານອອກພັກການຮັບອຸດໜູນບໍານານ 2 ທ່ານ.
ໃນພິທີ ທ່ານ ດາວເພັດ ເມືອງໂພນທອງ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງ ອຄ ໄດ້ຜ່ານດຳລັດ ແລະ ຂໍ້ຕົກ ວ່າດ້ວຍການອະນຸມັດ ໃຫ້ທ່ານ ແກ້ວມໍລະກົດ ສິດລາກອນ ຫົວໜ້າສະຖາບັນອຸດສາຫະກໍາ ແລະ ການຄ້າ, ທ່ານ ມາຄະ ຈັນທະລາ ຮອງຫົວໜ້າກົມຊັບສິນທາງປັນຍາ ອອກພັກການ-ຮັບອຸດໜູນບໍານານ ນັບແຕ່ວັນທີ 1 ກໍລະກົດ 2024 ເປັນຕົ້ນໄປ.
ໃນພິທີ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງ ອຄ ໄດ້ກ່າວ ສະແດງຄວາມຍ້ອງຍໍຊົມເຊີຍຕໍ່ທ່ານທີ່ໄດ້ອອກພັກຜ່ອນ ຮັບອຸດໜູນບໍານານ ທີ່ໄດ້ເຮັດສໍາເລັດໜ້າທີ່ການເມືອງທີ່ພັກ-ລັດ ມອບໝາຍໃຫ້ຢ່າງສໍາເລັດຜົນ, ບັນດາທ່ານເປັນຜູ້ທີ່ມີບົດບາດສໍາຄັນ ແລະ ເປັນຜູ້ທີ່ໄດ້ຮັບຄວາມເຊື່ອໝັ້ນໄວ້ວາງໃຈຈາກການຈັດຕັ້ງພັກ ແລະ ລັດ ເຊິ່ງໃນໄລຍະຜ່ານມາທັງສອງທ່ານ ໄດ້ຮັບຕຳແໜ່ງສຳຄັນເບື້ອງພັກ-ເບື້ອງລັດ ໃນຫຼາຍຂົງເຂດວຽກງານ. ບັນດາທ່ານ ໄດ້ສຸມສະຕິປັນຍາ, ເຫື່ອແຮງ ໃນການປະຕິບັດໜ້າທີ່ການເມືອງ ທີ່ພັກ ແລະ ລັດ ມອບໃຫ້, ບັນດາທ່ານເປັນຜູ້ທີ່ມີນ້ຳໃຈປະຕິວັດ, ມີຄຸນທາດການເມືອງຢ່າງໜັກແໜ້ນຕໍ່ການນໍາພາຂອງພັກ, ມີຄຸນສົມບັດສິນທຳປະຕິວັດ, ເປັນຜູ້ທີ່ມີແບບແຜນການນຳພາ, ແບບວິທີເຮັດການວຽກ ແລະ ມີແບບແຜນການດຳລົງຊີວິດ ປອດໃສຂາວສະອາດ, ບໍ່ມີແນວຄິດສໍ້ລາດບັງຫຼວງ, ບໍ່ເອົາໜ້າທີ່ຕໍາແໜ່ງຫາຜົນປະໂຫຍດໃຫ້ແກ່ຕົນເອງ ແລະ ຄອບຄົວ ເປັນຜູ້ມີຄວາມຮູ້ຄວາມສາມາດ, ເປັນຜູ້ທີ່ມີຄວາມເສຍສະຫຼະ, ມີມະນຸດສໍາພັນ, ມີທັດສະນະມະຫາຊົນທີ່ດີ ເປັນຜູ້ທີ່ເປັນແບບຢ່າງ ໃນການຄົ້ນຄວ້າຊີ້ນໍາວຽກງານ, ເປັນການນໍາມີທັດສະນະເບິ່ງກວ້າງມອງໄກ.
ຕະຫລອດໄລຍະຫຼາຍປີທີ່ຜ່ານມາ ແລະ ຈາກການປະກອບສ່ວນ ຂອງທັງສອງທ່ານ ໄດ້ເຮັດໃຫ້ບົດບາດການນຳພາຂອງພັກ ແລະ ວຽກງານຂອງຂະແໜງການ ອຄ ໄດ້ຮັບການພັດທະນາ ແລະ ມີການປັບປຸງດີຂຶ້ນເປັນກ້າວໆ ໂດຍສະເພາະ ແມ່ນຂົງເຂດວຽກງານ ທີ່ສອງທ່ານໄດ້ຮັບຜິດຊອບ ເຊັ່ນ: ວຽກງານການສ້າງຮ່າງກົດໝາຍຂົງເຂດການຄ້າພາຍໃນ – ການຄຸ້ມຄອງສິນຄ້າ – ລາຄາ, ວຽກງານສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ, ວຽກງານການນໍາເຂົ້າ-ສົ່ງອອກ, ວຽກງານຄົ້ນຄວ້າ, ວຽກຊັບສິນທາງປັນຍາ, ວຽກງານກອບການຮ່ວມມືສາກົນ ແລະ ການເຈລະຈາໃນລະດັບຊາດ ແລະ ສາກົນຕ່າງໆ ແລະ ບັນດາວຽກງານອື່ນໆ ທີ່ປີ່ນອ້ອມວຽກງານຂອງຂະແໜງອຸດສາຫະກໍາ ແລະ ການຄ້າ ຢ່າງມີອັນຕັ້ງໜ້າ ແລະ ມີຜົນສໍາເລັດອັນໃຫຍ່ຫຼວງ.
ໃນໂອກາດນີ້ ຕາງໜ້າຄະນະພັກ-ຄະນະນໍາ ກໍຄືຕາງໜ້າ ພະນັກງານຫຼັກແຫຼ່ງຮຸ່ນສືບທອດ ຂໍສະແດງຄວາມຮູ້ບຸນຄຸນ ແລະ ຂໍຈົດຈໍາຜົນງານ ແລະ ຄຸນງາມຄວາມດີຂອງບັນດາທ່ານ ທີ່ໄດ້ອຸທິດເຫື່ອແຮງໃນພາລະກິດປະກອບສ່ວນເຂົ້າໃນວຽກງານຂອງພັກ ແລະ ລັດ ໃນໄລຍະທີ່ຜ່ານມາ ເວົ້າລວມ, ເວົ້າສະເພາະ ແມ່ນການປະກອບສ່ວນ ໃນວຽກງານຂອງຂະແໜງອຸດສາຫະກໍາ ແລະ ການຄ້າ, ພວກເຮົາຈະຮໍ່າຮຽນເອົາແບບຢ່າງອັນທີ່ດີຂອງສະຫາຍເຂົ້າໃນການພັດທະນາວຽກງານຂະແໜງອຸດສາຫະກຳ ແລະ ການຄ້າ ກ້າວຂຶ້ນຕາມຈຸດໝາຍ ທີ່ໄດ້ກຳນົດໄວ້.
