ນອຍເອີ ຄວ້າລາງວັນຜູ້ຮັກສາປະຕູດີເດັ່ນຂອງ ໄອເອັຟເອັຟເອຊເອັສ 4 ປີຕິດຕໍ່ກັນ

ມານູເອລ ນອຍເອີ ຜູ້ຮັກສາປະຕູທີມຊາດເຢຍລະມັນ ຄວ້າລາງວັນຜູ້ຮັກສາປະຕູດີເດັ່ນຂອງສະຫະພັນປະຫວັດສາດ ແລະ ສະຖິຕິບານເຕະລະຫວ່າງປະເທດ ຫຼື ໄອເອັຟເອັຟເອຊເອັສ ( IFFHS ) ເປັນປີທີ 4 ຕິດຕໍ່ກັນ ຫຼັງຈາກສ້າງຜົນງານຢ່າງໜ້າປະທັບໃຈຕະຫຼອດໄລຍະທີ່ຜ່ານມາ ຕາມການປະກາດເມື່ອວັນທີ 26 ທັນວາ ທີ່ຜ່ານມາ ຜູ້ຮັກສາປະຕູທີມຊາດເຢຍລະມັນ ຂອງ ບາເຢິນ ມິວນິກ ທີມໃນ ບຸນເດສລີກາ ເຢຍລະມັນ ເຊິ່ງຄວ້າລາງວັນນີ້ເປັນປີທີ 4 ຕິດຕໍ່ກັນ ໄດ້ຮັບຄະແນນໂຫວດ 156 ຄະແນນ ຊະນະ ຈານລຸຍຈິ ບຸຟຟອນ ຜູ້ຮັກສາປະຕູຂອງ ຢູເວນຕຸສ ແລະ ຣຸຍ ປາທຣິຊິໂອ ຜູ້ຮັກສາປະຕູຂອງທີມຊາດປ໊ອກຕຸຍການ ຊຸດຄວ້າແຊັມບານເຕະຊີງແຊັມແຫ່ງຊາດເອີຣົບ ຫຼື ຢູໂຣ 2016 ຕາມມາເປັນອັນດັບ 2 ແລະ ອັນດັບ 3 ທີ່ໄດ້ຮັບຄະແນນ 91 ຄະແນນ ແລະ 50 ຄະແນນ ຕາມລໍາດັບ.

ສໍາລັບລາງວັນດັ່ງກ່າວມາຈາກການລົງຄະແນນຂອງຜູ້ຊ່ຽວຊານທາງດ້ານກີລາບານເຕະ ໂດຍສະເພາະຈາກ 50 ປະເທດທົ່ວໂລກ, ຂະນະທີ່ຜູ້ຮັກສາປະຕູຄົນອື່ນໆທີ່ຕິດ 1 ໃນ 10 ອັນດັບທໍາອິດ ປະກອບມີ:

– ອັນດັບ 4 ເຄລາດິໂອ ບຣາໂວ ຈາກ ແມນເຊັສເຕີ ຊິຕີ້

– ອັນດັບ 5 ດາບິດ ເດ ເຄອາ ຈາກ ແມນເຊັສເຕີ ຢູໄນເຕັດ;

– ອັນດັບ 6 ຢານ ໂອບລັກ ຈາກ ແອັດເລຕິໂກ ມາດຣິດ;

– ອັນດັບ 7 ອູໂກ້ ໂຢຣິສ ຈາກ ທ໊ອດແນມຮ໊ອດສະເປີ;

– ອັນດັບ 8 ເຄເລີ ນາບາສ ຈາກ ຣິລ ມາດຣິດ;

– ອັນດັບ 9 ຕິໂບ ກູກຕົວ ຈາກ ເຊລຊີ;

– ອັນດັບ 10 ເດນິສ ໂອຢ໊ອງໂກ ຈາກ ເມໂລດີ້ ຊັນດາວສ໌.

%d bloggers like this: