ຊຽງຄານ ຣີເວີ ເມົາເທັນ ຣີສອດ ທາງເລືອກໃໝ່ຂອງການພັກຜ່ອນ

ທ່ານ ອາ​ຈານ ຣຽນ ສິ​ຣິ​ນັນ​ທະ​ນາ​ນົນ ຜູ້ບໍລິຫານ ຊຽງຄານ ຣີເວີ ເມົາເທັນ ຣີສອດ

ເພື່ອເປັນການຕອບສະໜອງໃຫ້ແກ່ຍຸກຂອງການເຊື່ອມໂຍງ ໃນສະບັບນີ້ຈຶ່ງຂໍສະເໜີສະຖານທີ່ພັກຜ່ອນທີ່ມີຄວາມເປັນສ່ວນຕົວ ແລະ ຍັງຄົງຮັກສາເອກະລັກຂອງຄວາມເປັນລ້ານຊ້າງ ແລະ ລ້ານນາ ປະສົມປະສານກັນຢ່າງທີ່ຫາໃສບໍ່ໄດ້ອີກແລ້ວ, ເມື່ອເວົ້າເຖິງ ຊຽງຄານ ຣີເວີ ເມົາເທັນ ຣີສອດ ຫຼາຍທ່ານອາດຈະບໍ່ເຄີຍໄດ້ຍິນ ແລະ ບໍ່ຮູ້ຈັກວ່າສະຖານທີ່ແຫ່ງນີ້ຕັ້ງຢູ່ໃສ ມີການບໍລິການແບບໃດ, ມີຄວາມສະດວກສະບາຍຄືແນວໃດ?. ສະນັ້ນ, ໃນມື້ນີ້ເຮົາມາທຳຄວາມຮູ້ຈັກນຳກັນເລີຍ.

ບັນ​ຍາ​ກາດ​ຍາມ​ເຊົ້າ ສຳ​ຜັດ​ກັບ​ອາຍ​ໝອກ

ທ່ານ ອາ​ຈານ ຣຽນ ສິ​ຣິ​ນັນ​ທະ​ນາ​ນົນ ຜູ້ບໍລິຫານ ໄດ້  ໃຫ້ສຳພາດກັບທີມງ
ານໜັງສືພິມເສດຖະກິດການຄ້າ ຂອງພວກເຮົາວ່າ: ຊຽງຄານ ຣີເວີ ເມົາເທັນ ຣີສອດ ເປັນໂຮງແຮມທີ່ມີຊື່ສຽງໃນ ແຂວງເລີຍ ຣາຊະອານາຈັກໄທ ໂດຍໄດ້ລົງມື້ກໍ່ສ້າງໃນປີ 2010 ແລະ ເປີດຢ່າງເປັນທາງການໃນທ້າຍປີ 2011 ໂດຍຄອບຄົວໄດ້ອອກແບບແຜນຜັງ ແລະ ຕົວອາຄານທັງໝົດດ້ວຍຕົນເອງ ເຊິ່ງເປັນອາຄານທີ່ພັກຫຼາກຫຼາຍຮູບແບບ ມີທັງແບບວິນລາແຄມທະເລ ແລະ ເປັນແບບເຮືອນທີ່ສາມາດພັກໄດ້ຫຼາຍຄົນ, ທຸກສິ່ງທຸກຢ່າງທີ່ນຳເຂົ້າມາໝູນໃຊ້ໃນໂຮງແຮມລ້ວນແລ້ວແຕ່ເກີດມາຈາກຈິນຕະນາການທັງໝົດ ເພາະວ່າພວກເຮົາກໍ່ດຳເນີນທຸລະກິດກ່ຽວກັບການກໍ່ສ້າງຢູ່ແລ້ວຈຶ່ງມີຄວາມສະດວກຕໍ່ວຽກງານດັ່ງກ່າວ, ລະບົບຕ່າງໆພາຍໃນໂຮງແຮມເນັ້ນຄວາມສະບາຍ ແລະ ເປັນມິດກັບສິ່ງແວດລ້ອມ, ທຸກຕົວອາຄານລ້ວນແລ້ວແຕ່ມີຄວາມໂລ່ງສາມາດລະບາຍອາກາດໄດ້ເປັນຢ່າງດີ, ສາມາດຢູ່ໄດ້ໂດຍບໍ່ຕ້ອງເປີດແອ, ຕັ້ງຢູ່ທ່າມກາງທຳມະຊາດທີ່ງຽບສະຫງົບ ແລະ ຄວາມຊຸ່ມຊື່ນ ເຮັດໃຫ້ແຂກທີ່ມາພັກຮູ້ສຶກຜ່ອນຄາຍ ໂດຍການຕົກແຕ່ງພາຍໃນເຮົາຈະເນັ້ນສິລະປະແບບຫຼວງພະບາງ ປະສົມປະສານກັບສິລະປະລ້ານນາ ເນື່ອງຈາກວ່າຢາກຮັກສາເອກະລັກຂອງຄວາມເປັນລາວໄວ້ເພາະວ່າບັນພະບຸລຸດຂອງພວກເຮົາມາຈາກຫຼວງພະບາງດິນແດນທີ່ອຸດົມສົມບູນ ແລະ ໄດ້ຂະໜານນາມວ່າ ອານາຈັກລ້ານຊ້າງ ໃນເມື່ອກ່ອນ. ພ້ອມນັ້ນ, ບັນດາອາຄານຕ່າງໆທີ່ຕັ້ງຢູ່ໃນຂອບເຂດໂຮງແຮມພວກເຮົາກໍ່ໄດ້ໃສ່ຊື່ຂອງສະຖານທີ່ຕ່າງໆພາຍໃນປະເທດລາວນຳອີກ ເຊັ່ນວ່າ: ເຮືອນຫຼວງພຣະບາງ, ເຮືອນຊຽງຂວາງ, ເຮືອນຈຳປາສັກ, ຫ້ອງອາຫານດວງຈຳປາ, ຫ້ອງສຳມະນານະຄອນວຽງຈັນ, ຫ້ອງປະຊຸມບໍ່ແກ້ວ, ຫ້ອງປະຊຸມໄຊຍະບູລີ ເຫຼົ່ານີ້ເປັນຕົ້ນ.
ທ່ານຍັງໃຫ້ຮູ້ອີກວ່າ: ການດຳເນີນທຸລະກິດຕະຫຼອດໄລຍະທີ່ຜ່ານມາມີການຕອບຮັບເປັນຢ່າງດີຈາກລູກຄ້າ ເຫັນໄດ້ຈາກການຂະຫຍາຍຕົວຂອງທຸລະກິດ, ການກັບມາພັກຂອງລູກຄ້າທີ່ເຄີຍມາແລ້ວ, ການບອກຕໍ່ຂອງລູກຄ້າ ຫຼື ການທີ່ໄດ້ຮັບຄວາມໄວ້ວາງໃຈຂອງລູກຄ້າທີ່ສຳຄັນບໍ່ວ່າຈະເປັນລະດັບປະເທດ ແລະ ລູກຄ້າສຳຄັນອື່ນໆຕື່ມອີກ.
ສຳລັບການບໍລິການຂອງໂຮງແຮມປະກອບມີ 4 ຮູບແບບ ເຊັ່ນ: ການບໍລິການດ້ານຫ້ອງພັກທີ່ສາມາດຮອງຮັບໄດ້ຫຼາກຫຼາຍຮູບແບບ ທັງແບບສ່ວນຕົວ, ຄອບຄົວ ແລະ ໝູ່ຄະນະ, ມີບໍລິການຈັດກອງປະຊຸມສຳມະນາ ເຊິ່ງມີສະຖານທີ່ຮອງຮັບໄດ້ເຖິງ 400 ຄົນ, ບໍລິການຈັດງານລ້ຽງສັງສັນຕ່າງໆໄປຈົນເຖິງງານແຕ່ງງານຂະໜາດນ້ອຍກໍ່ໄດ້ເຊັ່ນກັນ. ພ້ອມນັ້ນ, ທາງໂຮງແຮມຍັງມີບໍລິການການທ່ຽວທ່ຽວໃນແບບອະນຸລັກວັດທະນະທຳ, ທຳມະຊາດ ເຊັ່ນ: ການຂີ່ລົດຖີບ, ການເຮັດຜາສາດລອຍເຄາະ ( ເປັນປະເພນີຂອງຊາວຊຽງຄານ ), ທ່ຽວຊົມໝູ່ບ້ານວັດທະນະທຳໄທດຳ ແລະ ລ່ອງເຮືອຕາມລຳນ້ຳຂອງ. ໂດຍສະເພາະໃນລະດູໜາວ ເຊິ່ງເປັນລະດູແຫ່ງການທ່ອງທ່ຽວນີ້ເຫັນວ່ານັກທ່ອງທ່ຽວໄດ້ເຂົ້າມາທ່ຽວຊົມເມືອງຊຽງຄານເພີ່ມຂຶ້ນຢ່າງຫຼວງຫຼາຍເພື່ອສຳຜັດກັບອາກາດທີ່ໜາວເຢັນ ແລະ ທະເລໝອກທີ່ສວຍງາມ.
ສະພາບໂດຍລວມຂອງທຸລະກິດເຫັນວ່າມີການເຕີບໃຫຍ່ຂະຫຍາຍຕົວສະເລ່ຍປີລະ 10% ເນື່ອງຈາກວ່າມີນັກທ່ອງທ່ຽວທັງຈາກພາຍໃນ ແລະ ຕ່າງປະເທດເຂົ້າມາ

​ຫ້ອງ​ພັກ​ທີ່​ໄດ້​ມາດ​ຕະ​ຖານ

ທ່ອງທ່ຽວ ແລະ ມີທ່າອ່ຽງວ່າຈະເພີ່ມສູງຂຶ້ນ, ເມື່ອບໍ່ດົນມານີ້ໂຮງແຮມຍັງໄດ້ຮັບການປະສານງານຈາກອົງການທ່ອງທ່ຽວຂອງປະເທດຝຣັ່ງ ທີ່ໄດ້ໃຫ້ຜູ້ຕາງໜ້າຈາກປະເທດຝຣັ່ງມາສຳຫຼວດເສັ້ນທາງການທ່ອງທ່ຽວ ແລະ ສະຖານທີ່ຂອງໂຮງແຮມອີກດ້ວຍ.
ການທີ່ໄດ້ເຂົ້າຮ່ວມປະຊາຄົມເສດຖະກິດອາຊຽນ AEC ເປັນຜົນດີໃຫ້ກັບປະເທດ ແລະ ການທ່ອງທ່ຽວເປັນຢ່າງດີ ເພາະເປັນການເປີດໂອກາດ ແລະ ເຊີນຊວນໃຫ້ເພື່ອນບ້ານອ້ອມຂ້າງສາມາດເຂົ້າມາທ່ອງທ່ຽວໄດ້ງ່າຍຂຶ້ນ ສົ່ງຜົນຕໍ່ທຸລະກິດໂຮງແຮມຂອງພວກເຮົາ ເຮັດໃຫ້ຍອດຂອງການບໍລິການເພີ່ມຂຶ້ນ ເພາະມີການເປີດເສັ້ນທາງການທ່ອງທ່ຽວທີ່ຫຼາກຫຼາຍ ແລະ ຍັງສາມາດຊ່ວຍໃຫ້ເສດຖະກິດດ້ານການທ່ອງທ່ຽວດີຂຶ້ນເລື້ອຍໆ, ສ່ວນວ່າການດຳເນີນທຸລະກິດທາງດ້ານໂຮງແຮມທີ່ຈະຢັ້ງຍືນໄດ້ ເຮົາຈະຕ້ອງມີຄວາມແຕກຕ່າງຈາກໂຮງແຮມອື່ນ, ທີ່ຜ່ານມາໂຮງແຮມມີການສົ່ງເສີມອະນຸລັກວັດທະນະທຳທ້ອງຖິ່ນ ເປັນຕົ້ນແມ່ນພາສາປາກເວົ້າ, ການບໍລິການດ້ານຕ່າງໆທີ່ຍັງຄົງຄວາມເປັນເອກະລັກຂອງທ້ອງຖິ່ນໄວ້ ແລະ ໃນປັດຈຸບັນ ໂຮງແຮມພວກເຮົາກໍ່ໄດ້ເຂົ້າຮ່ວມໂຄງການໂຮງແຮມສີຂຽວ ເຊິ່ງມີນະໂຍບາຍດ້ານການບໍລິການທີ່ເປັນມິດກັບສິ່ງແວດລ້ອມສາມາດສ້າງຄວາມເພິ່ງພໍໃຈໃຫ້ກັບລູກຄ້າຄວບຄູ່ກັບການທ່ອງທ່ຽວໃນເຊີງອະນຸລັກສິ່ງແວດລ້ອມ ແລະ ວັດທະນະທຳທ້ອງຖິ່ນອີກດ້ວຍ, ທ່ານຜູ້ບໍລິຫານກ່າວ.
ການດຳເນີນທຸລະກິດມີທັງຂໍ້ດີ ແລະ ຂໍ້ເສຍ, ຄວາມຍາກງ່າຍທີ່ແຕກຕ່າງກັນ ທຸລະກິດດ້ານການໂຮງແຮມກໍ່ບໍ່ຕ່າງຈາກທຸລະກິດອື່ນທີ່ມີຄວາມສ່ຽງ, ຕ້ອງມີການສົ່ງເສີມການຂາຍພ້ອມທັງມີການວາງແຜນຮັບມື ແລະ ບໍລິຫານຈັດການຄວາມສ່ຽງໄວ້ໃຫ້ພ້ອມສຳລັບວິກິດການຕ່າງໆທີ່ອາດຈະເກີດຂຶ້ນ ເພາະສະນັ້ນຈຶ່ງພະຍາຍາມດຳເນີນທຸລະກິດດ້ວຍຄວາມເອົາໃຈໃສ່ໃຫ້ມີຄວາມໝັ້ນຄົງ ຕ້ອງລົງທຶນກ່ອນເພື່ອຫວັງຜົນຕອບຮັບໃນໄລຍະຍາວ

​ມີ​ສິ່ງ​ອຳ​ນວຍ​ຄວາມ​ສະ​ດວກ​ທີ່​ຄົບ​ຖ້ວນ

ແລະ ຕ້ອງມີຄວາມອົດທົນໃນການລໍຄອຍຜົນຕອບຮັບທີ່ຈະກັບມາຈາກການລົງທຶນໄປ, ເປັນການສ້າງພາບຫຼັ

ກທີ່ດີ ທີ່ສຳຄັນຍັງເປັນການເປີດກວ້າງໃຫ້ແກ່ການທ່ອງທ່ຽວ, ຫັນວິກິດໃຫ້ເປັນໂອກາດ ຫັນເອົາຄວາມອຸດົມສົມບູນທາງດ້ານຊັບພະຍາກອນທຳມະຊາດ ແລະ ມົນສະເໜ່ຂອງທ້ອງຖິ່ນທີ່ມີຢູ່ ສ້າງເປັນຄວາມປະທັບໃຈໃຫ້ກັບແຂກທີ່ເຂົ້າມາ, ອ້າແຂນຕ້ອນຮັບແຂກ ແລະ ບໍລິການດ້ວຍຄວາມເປັນກັນເອງ ເຮັດໃຫ້ແຂກທີ່ມາພັກມີຄວາມປະທັບໃຈ ໃຫ້ມີຄວາມຮູ້ສຶກເໝືອນກັບວ່າກຳລັງພັກຜ່ອນຢູ່ທີ່ບ້ານຂອງຕົນເອງ, ເຮັດໃຫ້ແຂກທີ່ເຂົ້າມາທ່ອງທ່ຽວຊຽງຄາ

​ບັນ​ຍາ​ກາດ​ທີ່​ເປັນ​ສ່ວນ​ຕົວ​ເໝາະ​ສຳ​ລັບ​ການ​ພັກ​ຜ່ອນ

ນ ແລະ ເຂົ້າມາພັກທີ່ ຊຽງຄານ ຣີເວີ ເມົາເທັນ ຣີສອດ ມີຄວາມປະທັບໃຈ ແລະ ຈົດຈຳຕະຫຼອດໄປ.
ຊຽງຄານ ຣີເວີ ເມົາເທັນ ຣີສອດ ຕັ້ງຢູ່ຄຸ້ມ 1 ເມືອງຊຽງຄານ ແຂວງເລີຍ ປະເທດໄທ ຫ່າງ​ຈາກ​ຖະ​ໜົນ​ສາຍ​ວັດ​ທະ​ນະ​ທຳ​ປະ​ມານ 1.5 ກິ​ໂລ​ແມັດ, ຖ້າເດີນທາງມາຈາກຕົວເມືອງເລີຍ ມາຕາມເສັ້ນທາງເລກທີ 201 ລວມໄລຍະທາງ 48 ກິໂລແມັດ ໃຊ້ເວລາປະມານ 45 ນາທີ ແລະ ຖ້າເດີນທາງມາຈາກຂົວມິດຕະພາບ ລາວ – ໄທ ແຫ່ງທີໜຶ່ງ ( ວຽງຈັນ – ໜອງຄາຍ ) ຕາມເສັ້ນທາງເລກທີ 211 ລຽບແຄມຂອງ ລວມໄລຍະທາງປະມານ 200 ກິໂລແມັດ ຫຼື ຖ້າຫາກທ່ານໃດສົນໃຈກໍ່ສາມາດເຂົ້າໄປຊົມ ແລະ ຈອງທີ່ພັກໄດ້ຕາມທີ່ຢູ່ www.chiangkhanriver mountain.com; Email: chiangkhanriver@gmail.com.

 

[ ຂ່າວ: ເດດດາພອນ ມະທຸຈັນ ]

%d bloggers like this: