ໂຮງແຮມ ກະວິນບຸຣີ ເນັ້ນສ້າງໂຮງແຮມ ໃຫ້ລູກຄ້າມີຫຼາຍທາງເລືອກ

ເອອີຊີ ( AEC ) ຖືເປັນປະຕູສຳຄັນຂອງການຂະຫຍາຍທຸລະກິດຕ່າງໆໃນທຸກຮູບແບບ, ເວົ້າສະເພາະນັກທ່ອງທ່ຽວທີ່ເດີນທາງມາທ່ຽວໃນ 10 ປະເທດອາຊຽນໃນແຕ່ລະປີກໍ່ມີຫຼາຍສົມຄວນ ເຊິ່ງສະຖານທີ່ພັກແຮມ ເຊັ່ນ: ໂຮງແຮມ, ຣີສອດ ແລະ ອື່ນໆ ກໍ່ຖືວ່າມີຄວາມໄດ້ປຽບທາງດ້ານການບໍລິການ ເຊິ່ງສັງເກດເຫັນໄລຍະຜ່ານມານັກທ່ອງທ່ຽວເພີ່ມຂຶ້ນຈຶ່ງເຮັດໃຫ້ທຸລະກິດໂຮງແຮມ, ຮ້ານອາຫານກໍ່ເພີ່ມຂຶ້ນໄປຕາມກົນໄກຕະຫຼາດ. ໜັງສືພິມເສດຖະກິດການຄ້າຫຼາຍສະບັບທີ່ຜ່ານມາເຮົາໄດ້ນຳສະເໜີກ່ຽວກັບສະຖານທີ່ພັກຜ່ອນ ຫຼື ໂຮງແຮມ, ຮ້ານອາຫານທີ່ຢູ່ພາຍໃນປະເທດມາແລ້ວຢ່າງຫຼວງຫຼາຍ, ແຕ່ມາໃນສະບັບນີ້ ພວກເຮົາຈະນຳສະເໜີໃຫ້ທ່ານຜູ້ອ່ານໄດ້ຮູ້ກ່ຽວກັບສະຖານທີ່ບໍລິການດ້ານທີ່ພັກຂອງຕ່າງປະເທດ ໂດຍຈະເລີ່ມຕົ້ນຈາກປະເທດເພື່ອນບ້ານໃກ້ຄຽງຂອງພວກເຮົາ ນັ້ນກໍ່ຄືໂຮງແຮມ ກະວິນບຸຣີ, ຈັງຫວັດອຸດອນທານີ ຣາຊະອານາຈັກໄທ ນີ້ເອງ.
ທ່ານ ນາງ ເສົາວະນິດ ສິດທິເດດກຸນສິນ, ຜູ້ບໍລິຫານໂຮງແຮມ ກະວິນບຸຣີ ເປີດເຜີຍຕໍ່ກັບທີມຂ່າວພວກເຮົາວ່າ: ໂຮງແຮມ ກະວິນບຸຣີ ກຣີນໂຮແທວ ເປັນໂຮງແຮມທີ່ຜູ້ບໍລິຫານມີຄວາມມຸ່ງໝາຍທີ່ຈະໃຫ້ເປັນສະຖານທີ່ພັກຜ່ອນຄ້າຍຄືກັບຣີສອດແຕ່ຕັ້ງຢູ່ໃຈກາງເມືອງໃນເຂດທຸລະກິດ ໂດຍມີແນວຄິດໃນການຮັກສາສິ່ງແວດລ້ອມ, ຫຼຸດຜ່ອນການນຳໃຊ້ຊັບພະຍາກອນຕ່າງໆໂດຍມີການໃຊ້ຫຼອດໄຟປະຢັດພະລັງານ ( LED ) ທັງໝົດ; ບໍ່ມີເຄື່ອງເຮັດນ້ຳອຸ່ນ, ແຕ່ມີລະບົບການຈັດການໃຫ້ທ່ານໄດ້ໃຊ້ເປັນວິທີສະເພາະຂອງທາງໂຮງແຮມ, ມີການນຳໃຊ້ພະລັງງານໄຟຟ້າໂດຍອາໄສພະລັງງານແສງອາທິດ ແລະ ກົງຫັນລົມ ເນັ້ນການບໍລິການ ແລະ ນຳໃຊ້ວັດສະດຸຕ່າງໆໃນລາຄາທີ່ຄົນທົ່ວໄປສາມາດເຂົ້າເຖິງໄດ້.
ທ່ານກ່າວຕື່ມວ່າ: ໃນໄລຍະທີ່ຜ່ານມາການດຳເນີນທຸລະກິດຂອງພວກເຮົາກໍ່ໄດ້ຮັບຜົນເປັນທີ່ໜ້າພໍໃຈມີລູກຄ້າທັງຊາວໄທ, ຊາວລາວ ແລະ ຊາວຕ່າງປະເທດໃຫ້ຄວາມສົນໃຈເຂົ້າມາພັກ ໂດຍສະເພາະແມ່ນລູກຄ້າຈາກລາວ ແລະ ນັກທ່ອງທ່ຽວຕ່າງປະເທດ ປະມານ 60%, ສ່ວນອີກ 40% ເປັນລູກຄ້າພາຍໃນປະເທດໄທ. ໂຮງແຮມຂອງພວກເຮົາມີຫ້ອງພັກໄວ້ຄອຍບໍລິການຜູ້ທີ່ເຂົ້າມາພັກລວມທັງໝົດ 69 ຫ້ອງມີ 3 ແບບໃຫ້ເລືອກຄື: ແບບສະວີດຣູມ, ແບບເດິລັກຊ໌ ແລະ ແບບຊູພີເຣຍ໌ ເຊິ່ງມີທັງແບບຕຽງຄູ່ ແລະ ຕຽງດ່ຽວ, ມີອາຫານເຊົ້າແບບບຸບເຟ, ກາເຟສົດທີ່ຜະລິດຈາກອຳເພີນາຍູງ ຈັງຫວັດອຸດອນທານີ, ມີວາຍຟາຍ, ສະລອຍນ້ຳ ແລະ ສະຖານທີ່ອອກກຳລັງກາຍ, ຫ້ອງສຳມະນາ, ຫ້ອງສຳລັບຈັດງານລ້ຽງຂະໜາດນ້ອຍທີ່ສາມາດບັນຈຸໄດ້ປະມານ 50 ທ່ານ, ລະບົບຮັກສາຄວາມປອດໄພ, ມີກ້ອງວົງຈອນປິດ ແລະ ລະບົບເຕືອນໄພຄົບຊຸດ.
ໃນລະດູໜາວທຸກໆປີຈະມີນັກທ່ອງທ່ຽວຕ່າງປະເທດຈອງຫ້ອງພັກໄວ້ລ່ວງໜ້າຢ່າງຫຼວງຫຼາຍ ສ່ວນໃຫຍ່ແມ່ນລູກຄ້າທີ່ເຄີຍມາໃຊ້ບໍລິການແລ້ວກໍ່ຈະກັບມາອີກ ໂດຍຈະມາພັກເປັນໄລຍະຍາວປະມານ 2 ອາທິດ ຫາ 1 ເດືອນ. ສ່ວນພາບລວມຂອງທຸລະກິດເຫັນວ່າມີອັດຕາການຂະຫຍາຍຕົວປະມານ 15% ຕໍ່ປີ ສາມາດແຂ່ງຂັນກັບຕ່າງປະເທດໄດ້ ເນື່ອງຈາກວ່າໂຮງແຮມຂອງພວກເຮົາມີຈຸດແຂງ ໂດຍພະນັກງານທຸກຄົນລ້ວນແລ້ວແຕ່ມີຄວາມຊຳນານໃນເລື່ອງການບໍລິການທີ່ດີທີ່ສຸດ ແລະ ໂຮງແຮມເອງກໍ່ຕັ້ງຢູ່ໃນເຂດການຄ້າ ແລະ ທຸລະກິດ ເຊິ່ງຕັ້ງຢູ່ໃຈກາງເມືອງອຸດອນໃກ້ໆກັບຫ້າງສັບພະສິນຄ້າ ເຊັນທັນ ແລະ ສູນການຄ້າ ຢູດີທາວ.
ທ່ານ ນາງ ເສົາວະນິດ ຍັງຊີ້ໃຫ້ເຫັນວ່າ: ປັດຈຸບັນທຸລະກິດໂຮງແຮມມີການຂະຫຍາຍຕົວຢ່າງຫຼວງຫຼາຍມີການແຂ່ງຂັນສູງ ສຳລັບໂຮງແຮມຂອງພວກເຮົາກໍ່ໄດ້ຮັກສາມາດຖານຂອງການບໍລິການລູກຄ້າໃຫ້ດີທີ່ສຸດ, ປູກຝັງຈິດສຳນຶກໃຫ້ພະນັກງານມີຄວາມຊື່ສັດບໍລິການລູກຄ້າດ້ວຍຄວາມຈິງໃຈ ເຮັດໃຫ້ລູກຄ້າມີ ຄວາມອົບອຸ່ນໃຈ ແລະ ສະບາຍໃຈ ເມື່ອເຂົ້າມາພັກເໝືອນກັບວ່າພັກຢູ່ທີ່ເຮືອນຂອງຕົວເອງ. ພາຍຫຼັງປະຕູ ເອອີຊີ ເປີດຢ່າງເປັນທາງການໃນທ້າຍປີ 2015 ຜ່ານມາ ເຫັນວ່າທິຜົນດີຕໍ່ທຸລະກິດໂຮງແຮມຫຼາຍຢ່າງ ເພາະມີນັກທ່ອງທ່ຽວເດີນທາງເຂົ້າມາຈັງຫວັດອຸດອນທານີ ເພີ່ມຂຶ້ນ ບວກກັບຈັງຫວັດອຸດອນທານີ ມີສະໜາມບິນນາໆຊາດທີ່ເປັນສູນກາງການບິນຂອງພາກອີສານຕອນເໜືອ, ຄົນທີ່ຈະເດີນທາງໄປທ່ອງທ່ຽວຫຼື ຈະໄປດຳເນີນທຸລະກິດຢູ່ ສປປ ລາວ ກໍ່ອາດຈະມາແວ່ພັກຢູ່ທີ່ຈັງຫວັດອຸດອນທານີ ນີ້ກ່ອນ.
ໃນປີ 2020 ເຊື່ອວ່າທັງລາວ ແລະ ໄທ ກໍ່ຄືຈັງຫວັດອຸດອນທານີຈະມີຄວາມເຊື່ອມໂຍງກັນຫຼາຍຂຶ້ນທັງການເດີນທາງດ້ວຍລົດໄຟຄວາມໄວສູງທີ່ຈະເຊື່ອມຈາກພາກໃຕ້ຂອງໄທ ມາເຖິງ ສປປ ລາວ ແລະ ອອກສູ່ປະເທດຈີນ ເມື່ອເຖິງເວລານັ້ນເຊື່ອວ່າ: ການຕິດຕໍ່ຄ້າຂາຍ ແລະ ການເດີນທາງເພື່ອລົງທຶນເຮັດທຸລະກິດຂອງຫຼາຍໆຂະແໜງການຈະມີຄວາມໂດດເດັ່ນ ແລະ ການເດີນທາງຕິດຕໍ່ພົວພັນກໍ່ມີຄວາມສະດວກສະບາຍຫຼາຍຂຶ້ນກວ່າເກົ່າ ແລະ ໃນອະນາຄົດອັນໃກ້ນີ້ ທາງໂຮງແຮມມີແຜນທີ່ຈະເປີດສາຂາເພີ່ມອີກເຊິ່ງປັດຈຸບັນຍັງຢູ່ໃນຂັ້ນຕອນຂອງການອອກແບບສະຖານທີ່ແຫ່ງໃໝ່ນັ້ນຢູ່ໃກ້ໆກັບໜອງປະຈັກ ເຊິ່ງຈະເປັນລັກສະນະຂອງໂຮງແຮມບູຕິກ ຄາດວ່າຈະເລີ່ມເປີດໃຫ້ບໍລິການໃນປີ 2017 ທີ່ຈະມາເຖິງນີ້.

%d bloggers like this: