ຄິດຜິດຊີວິດປ່ຽນ!!! ໝຸ່ມຮັບສົ່ງຢາຖືກຈັບພ້ອມຂອງກາງ 52.000 ເມັດ

ເຖິງບໍ່ຄ້າ ຮັບສົ່ງກໍ່ຕິດຄຸກຄືກັນ ສຳຄັນຢູ່ທີ່ວ່າຂອງກາງຢູ່ນຳໃຜ, ເມື່ອທ້າຍເດືອນ ສິງຫາ ທີ່ຜ່ານມາ, ເຈົ້າໜ້າທີ່ຕຳຫຼວດ ປກສ ແຂວງສະຫວັນນະເຂດ ໄດ້ຈັບກຸມເປົ້າໝາຍຄ້າຂາຍຢາເສບຕິດພ້ອມ ຂອງກາງຢາບ້າຈຳນວນ 26 ມັດ, ເທົ່າກັບ 52.000 ກວ່າເມັດ, ລົດໃຫຍ່ວີໂກ້ໝາຍເລກ ທະບຽນ ກຄ 0414 ສະຫວັນນະເຂດ, ລົດເກັ໋ງອີເລັນຕ້າບໍ່ມີປ້າຍທະບຽນ, ໂທລະສັບຈຳ ນວນ 10 ໜ່ວຍ ແລະ ລົດຈັກ 2 ຄັນ.

 

 

ອີງຕາມການເປີດເຜີຍຂອງເຈົ້າໜ້າທີ່ ປກສ ໃຫ້ຮູ້ວ່າ: ເວລາ ປະມານ 23:00 ໂມງ, ເຈົ້າໜ້າທີ່ຕຳຫຼວດຢູ່ຈຸດກວດກາ ດ່ານໂນນສັນ ເຂດ ເມືອງ ໄຊບູລີ ແຂວງສະຫວັນນະເຂດ ໄດ້ກັກລົດເກັ໋ງອີເລັນຕ້າ ບໍ່ຕິດປ້າຍທະບຽນ ທີ່ແລ່ນມາຕາມສາຍທາງເລກທີ 13 ໃຕ້ ເພື່ອຂໍກວດກາເບິ່ງເອກະສານ ລົດຄັນດັ່ງກ່າວ ແຕ່ເຫັນວ່າຜູ້ຂັບຂີ່ລົດນັ້ນມີທ່າທາງພິລຸດ ສົງໄສ ຈຶ່ງໄດ້ເຂົ້າກວດຄົ້ນພາຍໃນລົດ ແລະ ໄດ້ພົບເຫັນຢາບ້າ ຈຳນວນ 26 ມັດ ທີ່ຜູ້ກ່ຽວຊຸກເຊື່ອງໃສ່ໄວ້ໃນກະເປົ໋າເຄື່ອງ.

ດັ່ງນັ້ນ, ຈຶ່ງໄດ້ກັກຕົວ ທ້າວ ວັນໄຊ ໄຊຍະບານ ອາຍຸ 19 ປີ, ອາຊີບ ເຮັດນາຢູ່ບ້ານ ຫຼັກ 7 ເມືອງ ຄຳເກີດ ແຂວງ ບໍລິຄຳໄຊ ແລ້ວຈຶ່ງໄດ້ປະສານ ສົບທົບກັບເຈົ້າໜ້າທີ່ຕຳຫຼວດດສະກັດກັ້ນ ແລະຕ້ານ ຢາເສບຕິດ ປກສ ແຂວງສະຫວັນນະເຂດເພື່ອນຳໄປທຳການສອບສວນ.

 

 

ຜ່ານການສອບສວນຜູ້ກ່ຽວໃຫ້ການຮັບສາລະພາບວ່າ: ຢາບ້າຈຳນວນດັ່ງກ່າວ ແມ່ນໄດ້ເອົາມາຈາກພວກຮ່ວມຂະບວນການຢູ່ແຂວງ ບໍລິຄຳໄຊ ເຊິ່ງແມ່ນ ທ້າວໄຂ ມູນວົງສາ ອາຍຸ 27 ປີ ແລະ ທ້າວ ຫອມແພງ ມູນວົງສາ ອາຍຸ 33 ປີ ທັງ ສອງຄົນ ອາຊີບເຮັດນາ ຢູ່ບ້ານຫຼັກ 7 ເມືອງຄໍາເກີດ ແຂວງ   ບໍລິຄໍາໄຊ ເຊິ່ງເປັນຄົນບອກໃຫ້ເອົາ ໄປສົ່ງໃຫ້ທ້າວ ແຕ້ນ ວົງຄີລີ ອາຍຸ 22 ປີ, ອາຊີບວ່າງງານ ຢູ່ບ້ານສະໝູນ ເມືອງ ພະລານໄຊ ແຂວງ ສະຫວັນນະເຂດ ແລະ ທ້າວ ສຸກສະໝອນ ແສງດາລາ ອາຍຸ 19 ປີ, ອາຊີບກຳມະກອນຢູ່ ນະຄອນໄກສອນ ພົມວິຫານ.

 

ຈາກນັ້ນ, ຕົກມາຮອດເວລາ ປະມານ 6 ໂມງຂອງວັນທີ 1 ກັນຍາ 2019 ເຈົ້າໜ້າທີ່ ຈຶ່ງສາມາດກັກຕົວຜູ້ຮ່ວມຂະບວນ ການໄດ້ທັງໝົດ 4 ຄົນ, ຢູ່ທີ່ໂຮງແຮມຂອບເຂດບ້ານໂພນສະຫວ່າງໃຕ້ ນະຄອນໄກສອນ ພົມວິຫານ ເພື່ອນຳໄປຂະຫຍາຍ ຜົນສືບຫາຜູ້ຮ່ວມຂະບວນການ ເພື່ອນຳມາລົງໂທດຕາມລະບຽບກົດໝາຍຕໍ່ໄປ.

%d bloggers like this: