ໄຂສົກຮຽນໃໝ່ຈົ່ງຕັ້ງໃຈຮຽນຮູ້

ເລີ່ມແຕ່ 7:00 ໂມງເຊົ້າ ຂອງວັນທີ 2 ກັນຍາຜ່ານມາ ນ້ອງນັກຮຽນທັງຫຼາຍທີ່ຮຽນຢູ່ ມສ ວຽງຈັນ ກໍພາກັນມາເຖິງໂຮງຮຽນຢ່າງພ້ອມພຽງ ເພື່ອກຽມເຄົາລົບທຸງ ແລະ ເຂົ້າຮຽນເປັນປົກກະຕິໃນມື້ໄຂສົກຮຽນໃໝ່ 2019 – 2020 ເຊິ່ງເຫັນວ່ານ້ອງນັກຮຽນແຕ່ລະຄົນກໍມີຄວາມເບີກບານມ່ວນຊື່ນທີ່ໄດ້ມາຮຽນອີກວາລະໜຶ່ງ, ຮຽນໃນຊັ້ນຮຽນທີ່ສູງກວ່າປີຜ່ານມາອີກຂັ້ນ ແລະ ພ້ອມທີ່ຈະຕັ້ງໃຈຮຽນ, ສູ້ຊົນພະຍາຍາມຮຽນໃຫ້ເກັ່ງຂຶ້ນ. ສຳລັບນັກຮຽນ ມ 7 ກໍພ້ອມທີ່ຈະສູ້ຊົນຕັ້ງໃຈສຶກສາຄົ້ນຄວ້າບົດຮຽນເພື່ອກຽມສອບເສັງນັກຮຽນເກັ່ງໃນຂັ້ນຕ່າງໆ.

ທ່ານ ນາງ ວຽງສຸວັນ ພະໄຊສົມບັດ ຜູ້ອຳນວຍການໂຮງຮຽນ ມສ ວຽງຈັນ ໃຫ້ສຳພາດວ່າ: ສຳລັບສົກ 2019 – 2020 ນີ້ ມສ ວຽງຈັນ ຈະປະຕິບັດລະບຽບການຮຽນ – ການສອນ ແລະ ການໄປ – ມາໂຮງຮຽນຂອງນັກຮຽນຢ່າງເຄັ່ງຄັດ ເຊິ່ງຈະເລີ່ມເຂົ້າຮຽນໃນເວລາ 7:30 ໂມງທຸກໆມື້ ແຕ່ວັນຈັນ – ສຸກ ແລະ ຈະເລີກໂຮງຮຽນ ເວລາ 17:30 ໂມງ ເພື່ອອຳນວຍຄວາມສະດວກໃນການຈະລາຈອນ ແລະ ຫຼຸດຜ່ອນບັນຫາລົດແອອັດໃນຂອບເຂດໂຮງຮຽນ. ພ້ອມທັງເປັນການສອນບໍາລຸງໃຫ້ບັນດານັກຮຽນທີ່ເຫັນວ່າຕົນເອງຍັງອ່ອນໃນວິຊາໃດໄດ້ຮຽນເພີ່ມຕື່ມວິຊານັ້ນເພື່ອຍົກລະດັບຄວາມສາມາດ ແລະ ຮຽນເກັ່ງ – ຮຽນດີຂອງນັກຮຽນແຕ່ລະຄົນ.

ນາງ ສຸພາພອນ ທຳມະວົງສາ ນັກຮຽນຫ້ອງ ມ 7/1 ຫ້ອງພອນສະຫວັນ ມສ ວຽງຈັນ ໃຫ້ສຳພາດວ່າ: ໃນສົກຮຽນ 2019 – 2020 ນີ້ ນ້ອງພ້ອມທີ່ຈະຕັ້ງໃຈສຶກສາຮໍ່າຮຽນ ແລະ ເຄື່ອນໄຫວກິດຈະກຳນອກຫຼັກສູດຕ່າງໆຂອງໂຮງຮຽນ, ໃນປີນີ້ນ້ອງເອງເປັນນັກຮຽນຊັ້ນ ມ 7 ຖືເປັນປີສຸດທ້າຍຂອງຊັ້ນມັດທະຍົມ. ສະນັ້ນ, ຈະຕັ້ງໃຈບຸກບືນສຶກສາຮໍ່າຮຽນໃຫ້ບັນລຸເປົ້າໝາຍທີ່ຄາດຫວັງໄວ້ ພ້ອມທັງເຄື່ອນໄຫວກິດຈະກຳຕ່າງໆຢ່າງຕັ້ງໜ້າ ເພື່ອໃຫ້ສົກປີ    2019 – 2020 ນີ້ ໄດ້ຮັບຜົນອັນສູງສຸດ.

ນາງ ປາລິນາ ຈັນທະວົງ ນັກຮຽນ ມ 7/5 ຫ້ອງ ICT ມສ ວຽງຈັນ ໃຫ້ສຳພາດວ່າ: ນ້ອງມີຄວາມຮູ້ສຶກຕື່ນເຕັ້ນ ແລະ ດີໃຈທີ່ໄດ້ມາເຫັນໝູ່ເພື່ອນ, ຄູ – ອາຈານທັງຫຼາຍ, ຮູ້ສຶກພູມໃຈທີ່ໄດ້ເປັນນັກຮຽນ ມສ ວຽງຈັນ ປີສຸດທ້າຍ ດ້ວຍຄວາມຕື່ນເຕັ້ນ ແລະ ດີໃຈ, ນ້ອງໄດ້ມາຮອດໂຮງຮຽນ ແຕ່ເວລາ 7:00 ໂມງ, ໃນສົກປີ 2019 – 2020 ນີ້ ນ້ອງຈະພະຍາຍາມຕັ້ງໃຈສຶກສາຄົ້ນ ຄວ້າບົດຮຽນໃຫ້ຮຽນເກັ່ງຂຶ້ນ ແລະ ພ້ອມທີ່ຈະໄປເສັງນັກຮຽນເກັ່ງຂັ້ນຕ່າງໆໃນວິຊາພາສາລາວ – ວັນນະຄະດີ ເພາະເປັນວິຊາທີ່ນ້ອງມັກ ແລະ ເຫັນວ່າຮຽນໄດ້ດີ.

ທ້າວ ຈະເລີນຊັບ ບຸນອ່ອນ ນັກຮຽນຫ້ອງ ມ 5/7 ຫ້ອງ ICT ມສ ວຽງຈັນ ໃຫ້ສຳພາດວ່າ: ນ້ອງຮູ້ສຶກຕື່ນເຕັ້ນ ແລະ ດີໃຈຫຼາຍ ທີ່ປີນີ້ໄດ້ເປັນນັກຮຽນຊັ້ນ ມ 5 ຂອງ ມສ ວຽງຈັນ ເຊິ່ງເປັນໂຮງຮຽນຕົວແບບໃນນະຄອນຫຼວງວຽງຈັນ ມື້ນີ້ເປັນມື້ໄຂສົກຮຽນໃໝ່ ເຫັນວ່າໝູ່ເພື່ອນທຸກຄົນໃຜໆກໍຮູ້ສຶກເບີກບານມ່ວນຊື່ນ, ຍິ້ມແຍ້ມແຈ່ມໃສ ແລະ ມາໂຮງຮຽນແຕ່ເຊົ້າ ສຳລັບນ້ອງເອງແມ່ນມາຮອດແຕ່ 7:00 ໂມງ ເພື່ອກຽມເຄົາລົບທຸງ ແລະ ຮຽນເປັນປົກກະຕິ, ໃນສົກປີ 2019 – 2020 ນີ້ ນ້ອງຈະພະຍາຍາມຕັ້ງໃຈສຶກສາຮໍ່າຮຽນໃຫ້ດີກວ່າເກົ່າ ໃຫ້ກາຍເປັນນັກຮຽນດີເດັ່ນ ແລະ ເປັນແບບຢ່າງຂອງໂຮງຮຽນ.

[ ຂ່າວ: ກາວຊົ່ງ; ຮູບ: ສຸກສະຫວັນ ]

%d bloggers like this: