ພາກລັດ ແລະ ທຸລະກິດ ປະຊຸມປຶກສາຫາລື 3 ບັນຫາ ເພື່ອອໍານວຍຄວາມສະດວກໃນການດໍາເນີນທຸລະກິດ

ຄວາມຫຍຸ້ງຍາກໃນການສ້າງຕັ້ງທຸລະກິດມີຫຼາຍຂັ້ນຕອນ, ການດຳເນີນທຸລະກິດຄ້າຂາຍ – ບໍລິການທີ່ບໍ່ຖືກຕ້ອງ ແລະ ການບໍລິການຂໍ້ມູນກ່ຽວກັບວິສາຫະກິດ ໄດ້ຖືກຍົກຂຶ້ນມາຫາລືໃນກອງປະຊຸມ ລະຫວ່າງພາກລັດ ແລະ ທຸລະກິດ ເພື່ອຊອກທາງອອກຮ່ວມກັນກ່ອນຈະເປີດກອງປະຊຸມທຸລະກິດລາວ ຄັ້ງທີ 12 ໃນເດືອນຕຸລາທີ່ຈະມາເຖິງ.
ກອງປະຊຸມປຶກສາຫາລືລະຫວ່າງຂະແໜງການກ່ຽວຂ້ອງຂອງພາກລັດ ແລະ ພາກທຸລະກິດ ບັນຫາທີ່ຕິດພັນກັບການກໍ່ຕັ້ງ ແລະ ດຳເນີນທຸລະກິດໃນ ສປປ ລາວ ຈັດຂຶ້ນໃນວັນທີ 30 ສິງຫາ 2019 ທີ່ໂຮງແຮມແລນມາກ ໂດຍການເປັນປະທານຮ່ວມຂອງ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ນາງ ວາລີ ເວດສະພົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ມີບັນດາທ່ານຜູ້ຕາງໜ້າຈາກກະຊວງ, ພາກທຸລະກິດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້ໄດ້ເນັ້ນປຶກສາຫາລືບັນຫາທີ່ຕິດພັນກັບການກໍ່ຕັ້ງ ແລະ ດຳເນີນທຸລະກິດໃນ ສປປ ລາວ 3 ບັນຫາ ຄື: 1). ບັນຫາການກໍ່ຕັ້ງທຸລະກິດມີຂັ້ນຕອນຫຍຸ້ງຍາກ;2). ບັນຫາການດຳເນີນທຸລະກິດຄ້າຂາຍ ແລະ ບໍລິການທີ່ບໍ່ຖືກຕ້ອງຕາມລະບຽບກົດໝາຍ ຫຼື ບໍ່ມີໃບອະນຸຍາດດຳເນີນທຸລະກິດ;3). ບັນຫາການບໍລິການຂໍ້ມູນກ່ຽວກັບວິສາຫະກິດໃນ ສປປ ລາວ ທີ່ໄດ້ສະຫຼຸບ ແລະ ສັງລວມຈາກການສະເໜີຂອງພາກທຸລະກິດຕໍ່ພາກລັດ ໃນກອງປະຊຸມທຸລະກິດລາວ ຄັ້ງທີ 11 ຜ່ານມາ ແລະ ຈະສະເໜີຕໍ່ພາກລັດແກ້ໄຂໃນກອງປະຊຸມທຸລະກິດລາວ ຄັ້ງທີ 12 ທີ່ຈະຈັດຂຶ້ນໃນເດືອນຕຸລາທີ່ຈະມາເຖິງນີ້.

ທ່ານ ສົມຈິດ ອິນທະມິດ ກ່າວວ່າ: ໃນເວທີກອງປະຊຸມນີ້ຄວາມຈິງແລ້ວບໍ່ແມ່ນຄັ້ງທຳອິດທີ່ພາກລັດຮ່ວມກັບພາກທຸລະກິດ ຈັດຂຶ້ນເພື່ອແກ້ໄຂບັນຫາຂໍ້ຫຍຸ້ງຍາກໃນການດຳເນີນທຸລະກິດຫາແນວທາງ ເພື່ອເຮັດແນວໃດຈຶ່ງຈະອຳນວຍ ຄວາມສະດວກໃຫ້ທັງພາກທຸລະກິດ ແລະ ລັດຖະບານມີບັນຍາກາດທີ່ສ້າງສັນ ແລະ ເປັນມິດຊ່ວຍຊີ້ແນະເບື້ອງລັດຖະບານ ວ່າລະບຽບ, ກົນໄກອັນໃດທີ່ຍັງບໍ່ທັນຄົບຖ້ວນ, ຊ່ວຍຊີ້ແນະລັດຖະບານເພື່ອເຮັດໃຫ້ບັນຍາກາດການດຳເນີນທຸລະກິດ, ການສົ່ງເສີມການຄ້າ, ການລົງທຶນ ຢູ່ ສປປ ລາວ ໃຫ້ດຳເນີນໄປຕ່າງຝ່າຍຕ່າງໄດ້ຮັບຜົນປະໂຫຍດ, ມີຄວາມສະຫງົບ, ມີຄວາມໝັ້ນຄົງຢູ່ພາຍໃນປະເທດ ເຊິ່ງພາກລັດເຮົາກໍຍິນດີຮັບຂໍ້ສະເໜີ ແລະ ຫາວິທີທາງແກ້ໄຂ.


ໃນຂະນະທີ່ກອງປະຊຸມທຸລະກິດລາວ 2 ຄັ້ງຜ່ານມາ ກໍສາມາດແກ້ໄຂໄດ້ຫຼາຍບັນຫາ ເຊັ່ນ: ບັນຫາອາກອນຊົມໃຊ້ອິນເຕີເນັດ, ອາກອນມູນຄ່າເພີ່ມ, ເລື່ອງການຂົນສົ່ງຜ່ານແດນ, ແກ້ໄຂອາກອນມູນຄ່າເພີ່ມຕໍ່ການບໍລິການຂອງທະນາຄານທຸລະກິດ, ເລື່ອງການສົ່ງອອກຜະລິດຕະພັນໄມ້, ການຈັດລະບຽບທຸລະກິດໂຮງພິມ ແລະ ນອກຈາກນີ້, ຍັງມີຫຼາຍປະເດັນທີ່ຍັງຈະໄດ້ສືບຕໍ່ແກ້ໄຂ ເນື່ອງຈາກວ່າເປັນນະໂຍບາຍທີ່ຕ້ອງໄດ້ມີການສ້າງ, ບາງອັນຍັງຕິດພັນກັບລະບຽບກົດໝາຍ ຕ້ອງໄດ້ໃຊ້ເວລາເພື່ອຈະໄປດັດແກ້, ປັບປຸງນຳເຂົ້າຜ່ານສະພາແຫ່ງຊາດ, ບາງບັນຫາຢູ່ໃນກະຊວງດຽວ ແຕ່ວ່າມີຫຼາຍກົມຮັບຜິດຊອບ. ນອກຈາກນັ້ນ, ຍັງຕິດພັນກັບກະຊວງອື່ນ. ສະນັ້ນ, ການປະສານງານ, ການສ້າງຄວາມກົມກ່ຽວແມ່ນມີຄວາມຈຳເປັນທີ່ຕ້ອງໄດ້ເຮັດ.

ທ່ານ ນາງ ວາວີ ເວດສະພົງ ກ່າວວ່າ: ປັດຈຸບັນພາກລັດ ໄດ້ມີຄວາມພະຍາຍາມແກ້ໄຂສິ່ງກີດຂວາງໃນການດຳເນີນທຸລະກິດ ແຕ່ວ່າໃນໄລຍະຂອງການປັບປຸງປ່ຽນແປງຂອງພາກລັດຍັງຂາດການເຜີຍແຜ່, ເຮັດດີແຕ່ບໍ່ເຜີຍແຜ່ໃຫ້ທົ່ວເຖິງ ເຊິ່ງຍັງເປັນຈຸດອ່ອນ, ຖ້າໃຫ້ພາກທຸລະກິດເຂົ້າໄປເອງທັງໝົດຫາຂໍ້ມູນຕ່າງໆໃນກົດລະບຽບໃໝ່ໆ ຫຼື ວ່າຕົວໃດທີ່ກຳລັງປັບປຸງນັ້ນມີຄວາມຫຍຸ້ງຍາກ ເນື່ອງຈາກທຸລະກິດຢູ່ ສປປ ລາວ ເຮົາສ່ວນໃຫຍ່ແມ່ນທຸລະກິດ SME ແລະ ເລື່ອງການນຳໃຊ້ເຕັກໂນໂລຊີຍັງບໍ່ຫຼາຍ ຖ້າທຽບໃສ່ບັນດາປະເທດອ້ອມຂ້າງ ອີກຢ່າງເນື່ອງຈາກເຕັກໂນໂລຊີມັນມີການພັດທະນາໄວ.


%d bloggers like this: