ກະຊວງປ້ອງກັນປະເທດ ບຽດຊະນະ ຊາວໜຸ່ມແຂວງວຽງຈັນ ຄວ້າແຊັມບານເຕະຊີງຂັນຊາວໜຸ່ມ 2019

ການແຂ່ງຂັນຊີງຂັນ ທ່ານເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ 2019 ມີ 19 ທີມເຂົ້າຮ່ວມການແຂ່ງຂັນ ໂດຍແບ່ງອອກເປັນ 4 ກຸ່ມແຂ່ງພົບກັນໝົດ ເພື່ອຄັດເອົາທີມອັນດັບ 1 ແລະ 2 ເຂົ້າຮອບ 8 ທີມສຸດທ້າຍ, ເຊິ່ງໃຊ້ສະໜາມ ລ້ານຊ້າງ ສະເຕດ້ຽມ ບ້ານໜອງໄຮ ເມືອງຫາດຊາຍຟອງນະຄອນຫຼວງວຽງຈັນ ເປັນສະໜາມແຂ່ງຂັນ ໂດຍເມື່ອວັນທີ 30 ສິງຫາ ທີ່ຜ່ານມາ ເປັນການແຂ່ງຂັນມື້ສຸດທ້າຍ.

ຄູ່ທໍາອິດເປັນການແຂ່ງຂັນນັດຊີງອັນດັບ 3 ລະຫວ່າງ ຄະນະຊາວໜຸ່ມ ນະຄອນຫຼວງວຽງຈັນ ພົບກັບກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ໃນທ້າຍອາທິດນີ້ ປາກົດວ່າ: ໃນເວລາປົກກະຕິ 90 ນາທີສະເໝີກັນ 1-1 ກ່ອນມາຕັດສິນດ້ວຍການດວນຈຸດໂທດເປັນ ກະຊວງໄປສະນີ, ໂທລະຄົມມະນາຄຍົມ ແລະ ການສື່ສານ ເອົາຊະນະໄປ 5-4 ຄວ້າອັນດັບ 3 ໄປຄອງ.

ສ່ວນຄູ່ຊີງຊະນະເລີດຈັດຂຶ້ນເປັນຄູ່ທີ ຊາວໜຸ່ມ ກະຊວງປ້ອງກັນປະເທດ ພົບກັບ ຄະນະຊາວໜຸ່ມ ແຂວງວຽງຈັນ ຜ່ານການແຂ່ງຂັນປາກົດວ່າ: ກະຊວງປ້ອງກັນປະເທດ ຂຶ້ນນໍາໄປກ່ອນ 2-0 ໃນເຄິ່ງເວລາທໍາອິດ, ສ່ວນເຄິ່ງເວລາທີ 2 ແຂວງວຽງຈັນ ສາມາດຕີສະເໝີເປັນ 2-2, ແຕ່ໄລຍະທ້າຍເກມ ກະຊວງ ປ້ອງກັນປະເທດ ມາໄດ້ປະຕູໄຊ ບຽດເອົາຊະນະໄປ 3-2 ຄວ້າແຊັມໄປຄອງໄດ້ສໍາເລັດ.

ຫຼັງຈາກຈົບການແຂ່ງຂັນ ທ່ານ ບຸນຕາ ເທບພະວົງ ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນປະຕິວັດລາວ ທັງເປັນປະທານຈັດການແຂ່ງຂັນໄດ້ຂຶ້ນກ່າວລາຍງານຜົນສໍາເລັດຂອງການແຂ່ງຂອນ ກ່ອນຈະມີພິທີມອບຂັນລາງວັນ ແລະ ປິດການແຂ່ງຂັນຢ່າງເປັນທາງການ

ສໍາລັບ ເງິນລາງວັນຊະນະເລີດຈະໄດ້ຮັບເງິນລາງວັນ 10 ລ້ານກີບພ້ອມຂັນລາງມູນຄ່າ 3 ລ້ານກີບ ແລະ ຫຼຽນລາງວັນ, ອັນດັບ 2 ໄດ້ 7 ລ້ານກີບ ພ້ອມຫຼຽນລາງວັນ, ອັນດັບ 3 ໄດ້ 5 ລ້ານກີບພ້ອມຫຼຽນລາງວັນ ແລະ ອັນດັບ 4 ໄດ້ 3 ລ້ານກີບພ້ອມຫຼຽນລາງວັນ. ນອກນັ້ນ, ກໍ່ຍັງມີລາງວັນດາວຍິງສູງສຸດ, ນັກເຕະດີເດັ່ນ ແລະ ລາງວັນອື່ນໆອີກ.

(ຄໍາສອນ; ຮູບຈາກ: ສອນໄຊ)

%d bloggers like this: