ເປີດໃຈ! ຄໍາປານ ຫຼັງຄວ້າສິດໄປຝຶກຊ້ອມກັບຄູຝຶກບາເຢິນ ທີ່ ເຢຍລະມັນ ຈາກໂຄງການຂອງ ອາລິອັນສ໌

ຄໍາປານ ດວງວິໄລ ອາຍຸ 15 ຈາກເມືອງສະໝ້ວຍ ແຂວງສາລະວັນ ແລະ ສຸລິໂຍ ອິນທະວົງ ອາຍຸ 14 ປິ ຈາກ ນະຄອນຫຼວງວຽງຈັນ ສັງກັດສະໂມສອນ ວຽງຈັນ ເອັຟທີ ກາຍເປັນຜູ້ທີ່ມີຄະແນນສູງສຸດອັນດັບ 1 ແລະ ອັນດັບ 2 ຕາມລໍາດັບ ໃນການການຄັດເລືອກນັກກີລາເຍົາວະຊົນ ຮຸ່ນອາຍຸລະຫວ່າງ 14 – 16 ທີ່ສປປ ລາວ ຄວ້າສິດເຂົ້າຮ່ວມຄ້າຍຝືກຊ້ອມກັບຄູຝຶກ ບາເຢິນ ມິກ ໃນໂຄງການ Allianz Explorer Camp 2019 ທີ່ປະເທດສິງກະໂປ.

ໂດຍທັງ 2 ເຍົາວະຊົນຈາກ ສປປ ລາວ ໄດ້ເຂົ້າໂຄງການ Allianz Explorer Camp 2019 ສິງກະໂປ ຮ່ວມກັບຜູ້ຊະນະຈາກບັນດາປະເທດອາຊຽນ ໃນລະຫວ່າງວັນທີ 23-26 ກໍລະກົດ 2019 ໂດຍມີນັກກີລາທັງໝົດ 43 ຄົນຈາກ 8 ປະເທດ ໄດ້ມີການເຮັດກິດຈະກໍາຕ່າງ ແລະ ຝຶກຊ້ອມຮ່ວມກັນຢ່າງເບີກບານມ່ວນຊື່ນ ຕະຫຼອດໄລຍະ 4 ວັນດັ່ງກ່າວປາກົດວ່າ: ຄໍາປານ ຖືກຄັດເລືອກໃຫ້ເປັນ 1 ໃນ 6 ຄົນທີ່ຄວ້າສິດໄປຮ່ວມກິດຈະກໍາ ແລະ ຝຶກຊ້ອມບານເຕະກັບໂຄງການດັ່ງກ່າວຕໍ່ທີ່ປະເທດເຢຍລະມັນ ແລະ ຄໍາປານ ຈະໄດ້ໄປສໍາຜັດກັບບັນດານັກເຕະ ແລະ ຄູຝຶກຂອງສະໂມສອນ ບາເຢິນ ມິວນິກ.

ທ່ານ ວັນສະເຫຼີມ ຈອນດາວົງ ຕົວແທນຈາກ ບໍລິສັດ ອາລິອັນສ໌ ປະກັນໄພລາວ ທີ່ຕິດຕາມໄປກັບ 2 ເຍົາວະຊົນ ລາຍງານຈາກສິງກະໂປ ວ່າ: ໃນຄ້າຍຝຶກຊ້ອມທີ່ ປະເທດສິງກະໂປ ຂອງໂຄງການ Allianz Explorer Camp Football Edition Asia 2019, ເຊິ່ງຄັ້ງນີ້ມີ 43 ຄົນຈາກ 8 ປະເທດເຂົ້າຮ່ວມ ແລະ ໃນທຸກໆມື້ໄດ້ມີຮ່ວມກິດຈະກໍາຕ່າງ ແລະ ໄດ້ຝຶກຊ້ອມກັບຄະນະຄູຝຶກຂອງ ບາເຢິນ ມິວນິກ ລວມເຖິງແລກປ່ຽນປະສົບການເຊິ່ງກັນແລະກັນ ຜ່ານ 4 ວັນດັ່ງກ່າວຕ້ອງຂໍສະແດງຄວາມຍິນດີນຳ ຄຳປານ ດວງວິໄລ ທີ່ຕິດ 1 ໃນ 6 ປະກອບມີ ລາວ 1 ຄົນ, ສີລັງກາ 1 ຄົນ, ສິງກະໂປ 2 ແລະ ມາເລເຊຍ 2 ທີ່ໄດ້ຮັບການຄັດເລືອກໄປຕາມຫາປະສົບການທີ່ ບາເຢິນ ມິວນິກ ຈາກໂຄງການ Allianz Explorer Camp Football Edition 2019, ສ່ວນ ສຸລິໂຍ ອິນທະວົງ ກໍ່ບໍ່ນ້ອຍໜ້າຄ້ວາລາງວັນດີເດັ່ນ ໃນການເຂົ້າຄັ້ງນີ້.

ຂະນະທີ່ ທ້າວ ຄໍາປານ ດວງວິໄລ ກ່າວວ່າ: ດັ່ງທີ່ຮູ້ນ້ອງເປັນເດັກບ້ານນອກ ແລະ ຄອບຄົວກໍ່ຂາດເຂີນ ແຕ່ເປັນຄົນທີ່ມັກກີລາບານເຕະເປັນຊີວິດຈິດໃຈ ແລະ ເປັນຄວາມຝັນ ຈົນມາຮອດມື້ນີ້ເອງຄວາມມັນຂອງນ້ອງເປັນຈິງແລ້ວ ແລະ ບໍ່ມີຫຍັງຈະມາດີໃຈເທົ່ານີ້ ຫຼັງຈາກທີ່ຈະໄດ້ໄປຮ່ວມກິດຈະກໍາ ແລະ ຝຶກຊ້ອມກັບຄູຝຶກບາເຢິນ ມິວນິກ ເຖິງປະເທດເຢຍລະມັນ ມັນເປັນໂອກາດອັນລໍ້າຄ່າທີ່ສຸດຂອງນ້ອງ ຕ້ອງຂໍຂອບໃຈ ບໍລິສັດ ອາລິອັນສ໌ ປະກັນໄພລາວ ທີ່ໃຫ້ໂອກາດອັນຍິ່ງໃຫຍ່ກັບນ້ອງ.

“ ການເຂົ້າຮ່ວມຄັ້ງໂຄງການດັ່ງກ່າວ ມື້ທໍາອິດທີ່ໄປຮອດແມ່ນຮູ້ສຶກຕື່ນເຕັ້ນທີ່ສຸດ ທີ່ໄດ້ພົບຫໝູ່ເພື່ອນຊາວຕ່າງຊາດ ທີ່ມີຄວາມສາມາດຫຼາກຫຼາຍ. ຢ່າງໃດກໍຕາມ ພວກເຮົາໄດ້ເຮັດກິດຈະກຳລວມ, ສ່ວນມື້ທີ່ສອງແມ່ນໄດ້ຊ້ອມບານເຕະນຳກັນ ໂດຍມີຄະນະຄູຝຶກຈາກສະໂມສອນ ບາເຢິນ ມິວນິກ ມາສອນເທັກນິກຕ່າງໆໃຫ້ ແນ່ນອນມັນມ່ວນຫຼາຍ ແລະ ໄດ້ໄປທ່ຽວນໍາອີກ, ສ່ວນມື້ທີ 3 ແມ່ນຊ້ອມແລ້ວເຮັດກິດຈະກຳ ແລະ ຝຶກຊ້ອມບານເຕະເຊັ່ນກັນ ແຕ່ໃນຕອນມື້ແລງມີການປະກວດ ແຕ່ລະປະເທດ ແລະ ພວກນ້ອງແມ່ນເລືອກແມ່ນຮ້ອງເພງ ເຜົ່າລາວເອີຍ ລວມທັງຍັງໄດ້ແຕ່ງໂຕຊຸດຊົນເຜົ່າທັງສອງຄົນ. ຂະນະທີ່ ມື້ທີ 4 ວັນສຸດທ້າຍທາງຄະນະຄູຝຶກບາເຢິນ ໄດ້ໃຫ້ເຕະກັນເປັນທີມ ແລະ ເບິ່ງທັກສະ ກ່ອນທີ່ນ້ອງຈະໄດ້ຮັບເລືອກໄປ ເຢຍລະມັນ ຕໍ່” ຄໍາປານ ກ່າວ.

ສໍາລັບ ຄໍາປານ ແລະ ອີກ 5 ຄົນ ກາຍເປັນຜູ້ຊະນະຈາກຄ້າຍຝືກຊ້ອມຢູ່ ສິງກະໂປ ຈະໄດ້ສິດເໄປຮ່ວມຄ້າຍຝືກຊ້ອມກັບ ສະໂມສອນ ບາເຢິນ ມິວນິກ ທີ່ປະເທດເຢຍລະມັນ ກັບຜູ້ຊະນະຈາກທົ່ວໂລກ ໃນວັນທີ 22-27 ສິງຫາ 2019 ຕໍ່ໄປ.
(ຄໍາສອນ; ຮູບຈາກ: Allianz General Laos-AGL)

%d bloggers like this: