ທຸ່ມ 5 ຕື້ກວ່າ ປັບປຸງເສັ້ນທາງເມືອງພູຄູນເກືອບ 60 ກິໂລແມັດ ໃຫ້ໃຊ້ໄດ້ໃນລະດູຝົນນີ້

ນັບແຕ່ປີ 2018 ເປັນຕົ້ນມາ ທົ່ວປະເທດປະສົບກັບໄພພິບັດທາງທຳມະຊາດຢ່າງໜັກໜ່ວງ ໂດຍສະພາະແມ່ນບັນດາພື້ນຖານໂຄ່ງລາງເປ່ເພ ແລະ ເສຍຫາຍຈຳນວນໜຶ່ງ ອາຄານບ້ານເຮືອນຖືກນໍ້າຖ້ວມ, ຖະໜົນຫົນທາງເປ່ເພ, ດິນເຈື່ອນທັບຖົມທາງ, ຂົວຂາດ, ຕົ້ນໄມ້ຫັກທັບທາງ ເຮັດໃຫ້ການສັນຈອນລຳບາກ.

 

ສະນັ້ນ, ໃນລະດູຝົນນີ້ເພື່ອເຮັດໃຫ້ການສັນຈອນໄປ-ມາສະດວກ ແລະ ຮັບປະກັນຄວາມປອດໄພຂອງປະຊາຊົນ ຫຼາຍຂົງເຂດໄດ້ເອົາໃຈໃສ່ປັບປຸງສ້ອມແປງເສັ້ນທາງໃຫ້ສັນຈອນໄປມາງ່າຍຂຶ້ນ ສະເພາະຢູ່ເມືອງພູຄູນ ຢູ່ເສັ້ນທາງເລກທີ 3151 ກໍ່ໄດ້ມີການປັບປຸງສ້ອມແປງຄືນໃໝ່ ລວມໄລຍະທາງທັງໝົດ 58 ກິໂລແມັດ, ລວມມູນຄ່າ 5,2 ຕື້ກວ່າກີບ.

 

 

 

ໃນວັນທີ 8 ກໍລະກົດ 2019 ຜ່ານມາ ທີ່ໂຮງແຮມ ອະມາຣີ ວັງວຽງເດີແກຣນ ເມືອງວັງວຽງ ແຂວງວຽງຈັນ, ທ່ານ ວຽງທອງ ຫັດສະຈັນ ເຈົ້າເມືອງໆ ພູຄູນ ກໍ່ໄດ້ເຂົ້າຮ່ວມພິທີເຊັນສັນຍາໂຄງການສ້ອມແປງເສັ້ນທາງຫຼັງລະດູຝົນຈາກໄພພິບັດປີ 2018 ຮ່ວງງົບປະມານປີ 2019 ( ທຶນລັດຖະບານ ) ເສັ້ນທາງເລກທີ 3151 ແຕ່ບ້ານພູວຽງນ້ອຍ ຫາ ບ້ານດອນເງິນ ເຊິ່ງມີຄວາມຍາວທັງໝົດ 58 ກິໂລແມັດມີມູນຄ່າກໍ່ສ້າງ 5 ຕື້ 236 ລ້ານກວ່າກີບ ໂດຍແມ່ນ ບໍລິສັດ ແສງເພັດກໍ່ສ້າງ-ຂົວທາງຈຳກັດເປັນຜູ້ຮັບ ເໝົາກໍ່ສ້າງ.

 

 

ສຳລັບໜ້າວຽກທີ່ຈັດຕັ້ງປະຕິບັດປະກອບມີ: ກວດແປງຮູບທາງພ້ອມຮ່ອງລະບາຍນໍ້າ, ຍົກຍ້າຍດິນເຈື່ອນ, ຈົກດິນບວມໜ້າທາງຍຸບ, ຖົມດ້ວຍດິນດີໜ້າທາງຍຸບ, ຕິດຕັ້ງທໍ່ໃໝ່ ແລະ ທໍ່ຫັກຟີ 100, ອະນາໄມທໍ່ຕັນ, ປູດ້ວຍດິນດີ (ວັດສະດຸຄັດເລືອກ) ໜາ 15 ຊັງຕີແມັດ ພ້ອມໂລອັດແໜ້ນ, ແລະ ຕິດຕາມກວດກາໂຄງການ.

 

ໃນພິທີ ທ່ານ ແສງດາວ ຫຼວງວິເສດ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງພູຄູນ ເຊິ່ງເປັນເຈົ້າຂອງໂຄງການ ກໍ່ໄດ້ລົງນາມເຊັນສັນຍາ ຮ່ວມກັບ ທ່ານ ສອນເພັດ ເມືອງວົງ ອຳນວຍການບໍລິສັດ ແສງເພັດກໍ່ສ້າງ-ຂົວທາງຈຳກັດ ເຊິ່ງເປັນຜູ້ຮັບເໝົາກໍ່ສ້າງ ໂດຍຊ່ອງໜ້າກັບ ທ່ານ ວຽງທອງ ຫັດສະຈັນ ເຈົ້າເມືອງໆພູຄູນ ແລະ ທ່ານ ທອງຈັນ ແພງຈັນທີ ຮອງເຈົ້າເມືອງ ປະທານຊີ້ນຳໂຄງການ ແລະ ຄະນະກຳມະການຄຸ້ມຄອງໂຄງການຂັ້ນເມືອງເຂົ້າຮ່ວມເປັນສັກຂີພະຍານ.

 

%d bloggers like this: