ໄຊຍະບູລີ ຊື້ກະແສໄຟຟ້າ 86.744 ລ້ານກິໂລວັດໂມງ

ພຽງເຄິ່ງປີໄຊຍະບູລີ ຊື້ກະແສໄຟຟ້າ 86.744 ລ້ານກິໂລວັດໂມງ ເພີ່ມຂຶ້ນຈາກປີຜ່ານມາກວ່າ 50% ດ້ານການຈຳໜ່າຍ ຈຳນວນ 76.205 ລ້ານກິໂລວັດໂມງ ມູນຄ່າ 48 ຕື້ກວ່າກີບ ເພີ່ມຂຶ້ນຈາກປີຜ່ານມາ 4%.

ທ່ານ ຄຳເຫຼັກ ແກ້ວວິໄລພອນ ຮອງຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊຍະບູລີ ໄດ້ກ່າວຕໍ່ນັກຂ່າວແຂວງໄຊຍະບູລີ ໃນຕົ້ນອາທິດທີ່ຜ່ານມາວ່າ: ໃນ 6 ເດືອນຕົ້ນປີ 2019 ແຂວງໄຊຍະບູລີ ຊື້ກະແສໄຟຟ້າໄດ້ທັງໝົດ 86.744 ລ້ານກິໂລວັດໂມງ ທຽບໃສ່ໄລຍະດຽວກັນຂອງສົກປີຜ່ານມາ ເພີ່ມຂຶ້ນ 52,29% ມູນຄ່າເທົ່າກັບ 51,08 ຕື້ກີບ ເມື່ອທຽບໃສ່ແຜນການສົກປີປະຕິບັດໄດ້ 59,43% ລາຄາຊື້ສະເລ່ຍ 588,89 ກີບຕໍ່ກິໂລວັດໂມງ ແລະ ຈຳໜ່າຍກະແສໄຟຟ້າຂາຍໄດ້ທັງໝົດ 76.205 ລ້ານກິໂລວັດໂມງ ທຽບໃສ່ໄລຍະດຽວກັນຂອງສົກປີຜ່ານມາ ເພີ່ມຂຶ້ນ 4,11% ມູນຄ່າເທົ່າກັບ 48,69 ຕື້ກີບ ທຽບໃສ່ແຜນການປີປະຕິບັດໄດ້ 57,94% ລາຄາຂາຍສະເລ່ຍ 639,06 ກີບຕໍ່ກິໂລວັດໂມງ.

ຄຽງຄູ່ກັນນັ້ນ, ພວກເຮົາຍັງໄດ້ຕໍ່ໃບອະນຸຍາດໃຫ້ບໍລິສັດທີ່ດຳເນີນກ່ຽວກັບໄຟຟ້າທົ່ວໄປ ເຂື່ອນຂະໜາດນ້ອຍ ແລະ ບໍລິການອາຍແກ໊ສ – ອົກຊີແຊນ ພາຍໃນແຂວງ ໄດ້ທັງໝົດ 26 ຫົວໜ່ວຍ. ໃນນີ້, ມີ 1 ບໍລິສັດທີ່ຍົກລະດັບປະຕັງປະເພດ III ມາເປັນປະເພດ II ມູນຄ່າການລົງທຶນ ( ທຶນຈົດທະບຽນ ) ລວມທັງໝົດ 87,67 ຕື້ກີບ.

ໃນນີ້, ດຳເນີນການໄຟຟ້າທົ່ວໄປ ປະຕັງຊັ້ນ II ຈຳນວນ 24 ຫົວໜ່ວຍ ມູນຄ່າການລົງທຶນຈົດທະບຽນທັງໝົດ 62,27 ຕື້ກີບ ແລະ ບໍລິການອາຍແກ໊ສ – ອົກຊີແຊນ ມີ 2 ຫົວໜ່ວຍ ມູນຄ່າການລົງທຶນທັງໝົດ 25 ຕື້ກີບ ແລະ ໄດ້ອອກໃບອະນຸຍາດຢັ້ງຢືນດຳເນີນການເຄື່ອນໄຫວກິດຈະການໄຟຟ້າ ໃຫ້ບໍລິສັດທີ່ມາຈາກຕ່າງແຂວງໄດ້ຈຳນວນ 8 ຫົວໜ່ວຍ. ໄດ້ອອກໃບຢັ້ງຢືນການນຳອອກນໍ້າມັນຫຼໍ່ລື່ນຈາກພື້ນທີ່ບໍລິເວນລະບົບໝໍ້ນໍ້າ ແລະ ລະບົບກົງຫັນຂອງໂຮງງານໄຟຟ້າພະລັງງານຄວາມຮ້ອນຫົງສາ ໄປວິເຄາະທີ່ປະເທດໄທຈຳນວນ 5 ຄັ້ງ.

ໂດຍເວົ້າລວມແລ້ວໃນ 6 ເດືອນຕົ້ນປີຜ່ານມາ ບັນດາຫົວໜ່ວຍທຸລະກິດທີ່ດຳເນີນການກ່ຽວກັບກິດຈະການໄຟຟ້າໄດ້ມອບພັນທະເຂົ້າງົບປະມານໄດ້ທັງໝົດ 4.952 ລ້ານກີບ, ທຽບໃສ່ແຜນປີປະຕິບັດໄດ້ 53,73% ທຽບໃສ່ໄລຍະດຽວກັນຂອງປີຜ່ານມາ ປະຕິບັດໄດ້ 109,23%.

[ ຂ່າວ: ບຸນທີ ]

%d bloggers like this: