ກຳນົດເອົາ 22 ມີນາ 2020 ຈັດງານມະຫະກຳກີລາແຫ່ງຊາດ ຄັ້ງທີ 11

ການກະກຽມຈັດງານມະຫະກຳກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງເປັນເຈົ້າພາບນັ້ນ ເຖິງວ່າໄລຍະຜ່ານມາຈະພົບຄວາມຫຍຸ້ງຍາກຫຼາຍດ້ານ ເຮັດໃຫ້ງານດັ່ງກ່າວຖືກເລື່ອນມາຫຼາຍຄັ້ງ ແຕ່ຫຼ້າສຸດຖືວ່າເປັນອັນແນ່ນອນແລ້ວ ເພາະຫ້ອງວ່າການສູນກາງພັກໄດ້ອອກແຈ້ງການ ເຫັນດີກຳນົດເອົາວັນທີ 22 ມີນາ ຫາ 1 ເມສາ ປີ 2020 ເປັນມື້ຈັດງານມະຫະກຳກີລາແຫ່ງຊາດ ຄັ້ງທີ 11.

ຫ້ອງວ່າການສູນກາງພັກປະຊາຊົນ ປະຕິວັດລາວ ໄດ້ອອກແຈ້ງການຄັ້ງວັນທີ 14 ພຶດສະພາ 2019 ສະບັບເລກທີ 153/ຫສພ ເລື່ອງ: ກຳນົດມື້ເປີດງານມະຫະກຳແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໃນວັນທີ 22 ມີນາ ຫາວັນທີ 1 ເມສາ 2020.

ອີງຕາມໜັງສືສະເໜີຂອງກະຊວງສຶກສາທິການ ແລະ ກີລາ ສະບັບເລກທີ 530/ສສກ ລົງວັນທີ 2 ພຶດສະພາ 2019; ອີງຕາມຄວາມເຫັນຊີ້ນຳຂອງສະຫາຍຜູ້ປະຈຳການຄະນະເລຂາທິການສູນກາງພັກ ຄັ້ງວັນທີ 10 ພຶດສະພາ 2019.

ຫ້ອງວ່າການສູນກາງພັກ ຂໍແຈ້ງຄວາມເຫັນຊີ້ນຳຂອງສະຫາຍຜູ້ປະຈຳການຄະນະເລຂາທິການສູນກາງພັກ ມາຍັງກະຊວງສຶກສາຊາບວ່າ ກ່ຽວກັບການລາຍງານການກຳນົດມື້ເປີດງານມະຫະກຳກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ແມ່ນເຫັນດີຕາມການຕົກລົງຂອງລັດຖະບານ. ດັ່ງນັ້ນ, ຈຶ່ງແຈ້ງມາຍັງກະຊວງສຶກສາທິການ ແລະ ກີລາ ເພື່ອຊາບ ແລະ ປະຕິບັດຕາມການຊີ້ນຳຂອງຂັ້ນເທິງດ້ວຍ.

ສຳລັບງານມະຫະກຳກີລາແຫ່ງຊາດ ຄັ້ງທີ 11 ທີ່ຈະຈັດຢູ່ແຂວງຊຽງຂວາງ ໃນເບື້ອງຕົ້ນຈະກຳນົດເອົາວັນທີ 11 ພະຈິກ 2018 ແມ່ນໃຫ້ເລື່ອນໄປຈັດໃນວັນທີ 11 ພະຈິກ 2019 ແລະ ຖືກເລື່ອນອີກຄັ້ງໄປຈັດໃນທ້າຍເດືອນມີນາ ຫາ ຕົ້ນເດືອນເມສາ ປີ 2020 ເນື່ອງຈາກສາເຫດຫຼາຍປັດໄຈ ເຊັ່ນ: ຄວາມພ້ອມດ້ານພື້ນຖານໂຄງລ່າງ, ໄດ້ຮັບຜົນກະທົບຈາກໄພທຳມະຊາດ ແລະ ອື່ນໆ.

ກ່ອນໜ້ານີ້ໃນວັນທີ 6 ມີນາ 2019 ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການ ສະບັບເລກທີ 388/ຫສນຍ ເລື່ອງ: ການຂໍອະນຸມັດຈັດງານມະຫະກຳກີລາແຫ່ງຊາດ ຄັ້ງທີ XI  ທີ່ແຂວງຊຽງຂວາງເປັນເຈົ້າພາບ ທີ່ອີງຕາມການຕົກລົງ ແລະ ຊີ້ນຳຂອງກອງປະຊຸມນາຍົກ – ຮອງນາຍົກລັດຖະມົນຕີ ຄັ້ງວັນທີ 6 ມີນາ 2019.

  1. ແມ່ນເຫັນດີດ້ານຫຼັກການໃຫ້ເລື່ອນການຈັດງານກີລາແຫ່ງຊາດຢູ່ແຂວງຊຽງຂວາງ ໄປຈັດໃນລະຫວ່າງວັນທີ 22 ມີນາ ຫາ 1 ເມສາ 2020 ເພື່ອໃຫ້ເໝາະສົມກັບສະພາບອາກາດຕົວຈິງຢູ່ແຂວງຊຽງ ຂວາງ ເພາະຖ້າຈັດໃສ່ເດືອນທັນວາ 2019 ແມ່ນສະພາບອາກາດໜາວໂພດ ແລະ ອັນສຳຄັນແມ່ນເພື່ອເປັນການສ້າງຂະບວນການຕ້ອນຮັບວັນສຳຄັນຕ່າງໆຂອງຊາດໃນປີ 2020 ແຕ່ໃຫ້ກະຊວງສຶກສາທິການ ແລະ ກີລາ ສົມທົບກັບຫ້ອງວ່າການສຳນັກງານນາຍົກລັດຖະມົນຕີ ຮ່າງບົດລາຍງານຂໍການຊີ້ນຳຈາກກົມການເມືອງສູນກາງພັກຕື່ມ.
  2. ໃຫ້ກະຊວງການເງິນ ກະກຽມງົບປະມານບ້ວງບໍລິຫານສຳລັບການຈັດງານແຂ່ງຂັນກີລາແຫ່ງຊາດ ທີ່ໄດ້ຂຶ້ນແຜນໄວ້ແລ້ວນັ້ນໃຫ້ມີຄວາມພ້ອມໃນການນໍາໃຊ້ໃນເວລາຈັດງານແຂ່ງຂັນໃນເດືອນມີນາ 2020.
  3. ໃຫ້ແຂວງຊຽງຂວາງ ເປັນໃຈກາງສົມທົບກະຊວງສຶກສາທິການ ແລະ ກີລາ ແລະ ກະຊວງແຜນການ ແລະ ການລົງທຶນ ຕິດຕາມ ແລະ ຊຸກຍູ້ການກໍ່ສ້າງບັນດາໂຄງການພື້ນຖານໂຄງລ່າງຮັບໃຊ້ໃຫ້ແກ່ການຈັດງານກີລາແຫ່ງຊາດດັ່ງກ່າວໃຫ້ສຳເລັດ ແລະ ທັນມອບໂຄງການກ່ອນມື້ເປີດງານກີລາແຫ່ງຊາດ.

ທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະ ກີລາ, ທັງເປັນກອງເລຂາຜູ້ປະຈຳການຂອງງານມະຫະກຳແຫ່ງຊາດ ໄດ້ໃຫ້ສຳພາດວ່າ: ອີງຕາມແຈ້ງການຂອງຫ້ອງວ່າການສູນກາງພັກປະຊາຊົນ ປະຕິວັດລາວ ທີ່ມີແຈ້ງການອອກມາ ຄັ້ງວັນທີ 14 ພຶດສະພາ 2019 ສະບັບເລກທີ 153/ຫສພ ທີ່ເຫັນດີກຳນົດເອົາວັນທີ 22 ມີນາ ຫາ ວັນທີ 1 ເມສາ ປີ 2020 ໃນການຈັດງານມະຫະກຳກີລາແຫ່ງຊາດ ຄັ້ງທີ 11 ຢູ່ແຂວງຊຽງຂວາງ ເຊິ່ງກົງກັບແຈ້ງການ ສະບັບເລກທີ 388/ຫສນຍ ລົງວັນທີ 6 ມີນາ 2019 ໃນການເລື່ອນການຈັດງານມະຫະກຳກີລາແຫ່ງຊາດ ຄັ້ງທີ 11 ມາຈັດໃສ່ວັນທີ 22 ມີນາ ຫາ 1 ເມສາ 2020.

ທ່ານກ່າວຕື່ມວ່າ: ພາຍຫຼັງໄດ້ຮັບໃບແຈ້ງການຂອງຫ້ອງວ່າການສູນກາງພັກ ພວກເຮົາໃນກອງເລຂາຜູ້ປະຈຳການກໍຈະໄດ້ກະກຽມປັບປຸງແຜນດຳເນີນງານຫຼາຍຢ່າງເພື່ອບໍ່ໃຫ້ຊັກຊ້າ. ໃນນັ້ນ, ຈະເລັ່ງປັບປຸງລະບົບການຈັດຕັ້ງກຳມະການ – ອະນຸກຳມະການຄືນ ເພາະຫຼາຍທ່ານກໍໄດ້ມີການຍົກຍ້າຍໜ້າທີ່ຕຳແໜ່ງ ແລະ ຈຳນວນໜຶ່ງກໍອອກຮັບບຳນານ, ປັບປຸງຄືນສັດນຳໂຊກໃຫ້ສອດຄ່ອງກັບເວລາທີ່ເລື່ອນໄປນັ້ນ, ປັບປຸງແຜນດຳເນີນງານການແຂ່ງຂັນຕາມເວລາທີ່ກຳນົດໄວ້, ປັບປຸງພື້ນຖານໂຄງລ່າງ ໂດຍໄດ້ມີແຈ້ງການໃຫ້ບັນດາບໍລິສັດຮັບເໝົາເລັ່ງສ້າງໃຫ້ສຳເລັດ 100% ພາຍໃນເດືອນຕຸລາ 2019 ນີ້.

ມາຮອດປັດຈຸບັນສະໜາມກີລາເປີດ – ປິດງານແມ່ນສຳເລັດແລ້ວ 99,09% ສ່ວນທີ່ຍັງເຫຼືອແມ່ນໜ້າວຽກກ່ຽວເກັບລາຍລະອຽດຈາກການສະເໜີຂອງບໍລິສັດຜູ້ຮັບເໝົາແມ່ນເພິ່ນຈະໃຫ້ສຳເລັດ ແລະ ມອບ – ຮັບໃນທ້າຍເດືອນມິຖຸນາຫາຕົ້ນເດືອນກໍລະກົດນີ້, ທ່ານ ທອງສີ   ພັນທະວົງກ່າວ

%d bloggers like this: