ຮູ້ບໍ? ວິສາຂະບູຊາ ເປັນຫຍັງຈິ່ງຈັດຍິ່ງໃຫຍ່

ຖ້າຜູ້ບໍ່ສຶກສາທຳມະແທ້ກໍອາດພຽງໄດ້ຍິນເພິ່ນວ່າວັນວິສາຂະບູຊາໆ ແຕ່ບໍ່ຮູ້ແກ່ນແທ້ຂອງງານແມ່ນຫຍັງ!! ຄວາມຈິງແລ້ວວັນວິສາຂະບູຊາ ຫຍໍ້ມາຈາກ “ວິສາຂະປຸຣະມະນີບູຊາ” ແປວ່າ “ການບູຊາໃນວັນເພັງເດືອນວິສາຂະ” ຖ້າປີໃດມີອະທິກະມາດ ຄື: ມີເດືອນ 8 ສອງຫົນ ກໍເລື່ອນໄປເປັນກາງເດືອນ 7. ວັນວິສາຂະບູຊາ ເປັນວັນສໍາຄັນຍິ່ງໃນທາງພະພຸດທະສາສະໜາ ເພາະເປັນວັນທີ່ ພະພຸດທະເຈົ້າປະສູດ ຄືເກີດ, ໄດ້ຕັດສະຮູ້ ແລະ ປະຣິນິພານ ຄືດັບເກີດຂຶ້ນກົງກັນທັງ 3 ວາລະຄື:

 

“ປະສູດ” ເມື່ອວັນເພັງເດືອນ 6 ກົງກັບວັນສຸກ ຂຶ້ນ 15 ຄໍ່າ ປີຈໍ ກ່ອນ ພສ 80 ປີ ເປັນປະສູດຂອງເຈົ້າຊາຍ ສິດທັດທະ ໃຕ້ຕົ້ນສາລະ ທີ່ລຸນພິນີສະຖານ.

“ຕັດສະຮູ້” ເມື່ອເຈົ້າຊາຍສິດທັດທະ ຊົງຜະນວດໄດ້ 6 ປີພຣະຊົນມາຍຸ 35 ພັນສາ ຊົງຕັດສະຮູ້ ໃຕ້ຮົ່ມໄມ້ສີມະຫາໂພ ຝັ່ງແມ່ນໍ້າເນຣັນຊະລາ ເມືອງ ອຸຣຸເວລາເສນານິຄົມ ໃນຕອນເຊົ້າມື້ວັນພຸດ ຂຶ້ນ 15 ຄໍ່າ ເດືອນ 6 ປີລະກາ ກ່ອນ ພສ 45 ປີ.

 

 

ການຕັດສະຮູ້ ໄດ້ອະຣິຍະສັດ 4 ຄືຂອງແທ້ອັນປະເສີດ 4 ປະການ ຂອງພະພຸດທະເຈົ້າເປັນການຕັດສະຮູ້ອັນສຸດຍອດ ບໍ່ມີຜູ້ປຽບປານ ວັນຕັດສະຮູ້ຂອງພຣະພຸດທະເຈົ້າ ຈຶ່ງຈັດເປັນວັນສຳຄັນ ເພາະເປັນວັນໃຫ້ກໍາເນີດມີ ພະພຸດທະເຈົ້າຂຶ້ນໃນໂລກ ເຊິ່ງທໍາທີ່ພະພຸດທະອົງຊົງຕັດສະຮູ້ ອະຣິຍະສັດ 4 ໄດ້ແກ່:

1 ທຸກ ຄື ຄວາມລຳບາກ ຄວາມບໍ່ສະບາຍກາຍບໍ່ສະບາຍໃຈ.

2 ສະມຸໄທ ຄື ເຫດທີ່ເຮັດໃຫ້ເກີດທຸກ

3 ນິໂຣດ ຄື ຄວາມດັບທຸກ

4 ມັກ ຄື ຂໍ້ປະຕິບັດໃຫ້ເຖິງຄວາມດັບແຫ່ງທຸກ

ສັດຈະທຳທັງ 4 ຂໍ້ນີ້ເອີ້ນວ່າ: ອະຣິຍະສັດ ເພາະເປັນສິ່ງທີ່ພະອະຣິຍະເຈົ້າຊົງຄົ້ນພົບ ເປັນສັດຈະທໍາຊັ້ນສູງ ປະເສີດກວ່າສັດຈະທໍາສາມັນທົ່ວໄປ.

 

 

“ປະຣິນິພານ” ຫຼັງຈາກຕັດສະຮູ້ແລ້ວ ໄດ້ປະກາດພະສາສະໜາ ແລະ ໂປດເວໄນຍະສັດ ເປັນໄລຍະເວລາ 45 ພັນສາ ພະຊົນມາຍຸໄດ້ 80 ພັນສາ ກໍສະເດັດດັບຂັນທະປະຣິນິພານ ເມື່ອວັນອັງຄານ ຂຶ້ນ 15 ຄໍ່າ ເດືອນ 6 ປີ ມະເສັງ ທີ່ ສາລະວະໂນທະຍານ ຂອງມັດລະກະສັດ ເມືອງກຸສິນາຣາ ແຄວ້ນມັດລະ. ການປະຣິນິພານຂອງພະພຸດທະເຈົ້າ ນັບໄດ້ວ່າເປັນການສູນເສຍດວງປະທິບຂອງໂລກ ເປັນການສູນເສຍຄັ້ງຍິ່ງໃຫຍ່ ແລະ ຄັ້ງສຳຄັນຂອງຊາວພຸດທົ່ວໄປມີຄວາມເສົ້າສະຫຼົດໃຈ ແລະ ອາໄລສຸດຈະພັນລະນາ.

 

 

ພະພຸດທະອົງໄດ້ຊົງສະແດງປັດສິມໂອວາດກ່ອນປະຣິນິພານວ່າ: “ດູກ່ອນ ພິກຂຸທັງຫຼາຍ ອັນວ່າສັງຂານທັງຫຼາຍຍ່ອມມີຄວາມເສື່ອມສະຫຼາຍໄປເປັນທຳມະດາ ທ່ານທັງຫຼາຍຈົ່ງຍັງກິດທັງປວງອັນເປັນປະໂຫຍດຂອງຕົນ ແລະ ປະໂຫຍດຂອງຜູ້ອື່ນໃຫ້ບໍລິບູນດ້ວຍຄວາມບໍ່ປະໝາດເຖີດ” ຫຼັງຈາກນັ້ນກໍສະເດັດດັບຂັນປະຣິນິພານໃນຣາຕີເພັງເດືອນ 6 ນັ້ນ.

ນັບວ່າເປັນເລື່ອງອັດສະຈັນຍິ່ງ ທີ່ເຫດການທັງ 3 ກ່ຽວກັບວິຖີຊີວິດຂອງພະສຳມາສຳພຸດທະເຈົ້າ ເຊິ່ງມີໄລຍະເວລາຫ່າງກັນ ນັບຫຼາຍສິບປີບັງເອີນເກີດຂຶ້ນໃນວັນເພັງເດືອນ 6. ດັ່ງນັ້ນ, ເມື່ອເຖິງວັນສຳຄັນຢ່າງນີ້ ຊາວພຸດທັງບັນພະຊິດ ແລະ ຄະລືຫັດໄດ້ພ້ອມໃຈກັນປະກອບພິທີບູຊາພະພຸດທະອົງ ເປັນກໍລະນີພິເສດ ເພື່ອນ້ອມລຳນຶກເຖິງພະກະລຸນາທິຄຸນ ພະປັນຍາທິຄຸນ ແລະ ພະບໍລິສຸດທິຄຸນ ຂອງພະອົງ ຜູ້ເປັນດວງປະທິບຂອງໂລກ.

 

 

ພ້ອມກັນນີ້, ໃນວັນທີ 13 ຕຸລາ ພ.ສ 2542 (ຄ.ສ 1989 ) ອົງການສະຫະປະຊາຊາດໄດ້ຍອມຮັບຍັດຕິທີ່ປະຊຸມ ກຳນົດໃຫ້ວັນວິສາຂະບູຊາເປັນວັນສຳຄັນຂອງໂລກ ໂດຍຮຽກວ່າ: Vesak Day ຕາມຄຳຮຽກຂອງຊາວສີລັງກາ ເຊິ່ງເປັນຜູ້ທີ່ຢື່ນເລື່ອງໃຫ້ສະຫະປະຊາຊາດພິຈາລະນາ. ດັ່ງນັ້ນ, ສະຫະປະຊາຊາດໄດ້ກຳນົດໃຫ້ວັນວິສາຂະບູຊາ ເປັນວັນພັກລັດຖະການຂອງສະຫະປະຊາຊາດອີກດ້ວຍ.

 

%d bloggers like this: