ເຈົ້າຂອງນິລະນາມ ປະມູນຮູບພາບຂອງ ‘ໂກລດ ໂມແນ’ ລາຄາກວ່າ 960 ຕື້ກີບ

ຜູ້ປະມູນ ນິລະນາມ 6 ຄົນ ແຂ່ງກັນສະເໜີລາຄາເພື່ອຊີງກັນເປັນເຈົ້າຂອງຮູບພາບຂຽນຂອງໂກລດ ມໍແນ ຈິດຕະກອນທີ່ມີຊື່ສຽງ ຄົນຝຣັ່ງ ໂດຍຜູ້ໄດ້ຄອບຄອງສາມາດເອົາຊະນະໄປດ້ວຍການສະເໜີລາຄາກວ່າ 960 ຕື້ກີບ ຖືເປັນຜົນງານແພງທີ່ສຸດຂອງ ໂມແນ ທີ່ເຄີຍມີການປະມູນມາ.

ສໍານັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດ ອາເມຣິກາ ເມື່ອວັນອັງຄານ ທີ 14 ພຶດສະພາ ວ່າ ບໍລິສັດປະມູນໂຊເທີບີສ໌ ສາຂານະຄອນນິວຢອກໄດ້ຈັດການປະມູນຮູບພາບຂຽນສີນໍ້າມັນເທິງແຜ່ນຜ້າ ຊື່ “ເມິລ (Meules) ” ເຊິ່ງເປັນໜຶ່ງໃນຜົນງານສິລະປະຈາກຊຸດຮູບພາບ “ກອງຫຍ້າ” ຂອງໂກລດ ມໍແນ ຈິດກອນທີ່ມີຊື່ສຽງ ຊາວຝຣັ່ງ ຈາກຍຸກອິມເພຣສຊັນນິຊຶມ ໂດຍຜົນງານດັ່ງກ່າວເປັນຮູບພາບທີ່ ໂມແນ ໄລຍະຍັງມີຊີວິດຢູ່ລະຫວ່າງປີ 1840 ເຖິງ 1926 ແຕ້ມຂຶ້ນເມື່ອປີ 1890 ຫຼື ໄລຍະທີ່ ໂມແນ ອາຍຸໄດ້ 50 ປີ.

ເຖິງມີລາຍງານຜົນງານຮູບພາບຂຽນຂອງ ໂມແນ ຈາກຊຸດຮູບພາບ ກອງຫຍ້າ ມີຢູ່ 25 ຮູບພາບ ແຕ່ຮູບພາບຂຽນຮູບນີ້ ເປັນພຽງ 1 ໃນ 7 ຮູບພາບ ທີ່ມີການນໍາອອກມາປະມູນຢ່າງເປັນທາງການ ສ່ວນອີກຮູບພາບໜຶ່ງຢູ່ໃນການຄອບຄອງຂອງນັກສະສົມນິລະນາມ ເຊິ່ງປະສົງເກັບໄວ້ເອງ ຂະນະທີ່ ຜົນງານອີກ 17 ຮູບພາບ ຈັດສະແດງຢູ່ທີ່ພິພິດຕະພັນສິລະປະ ທີ່ມີຊື່ສຽງຫຼາຍແຫ່ງທົ່ວໂລກ.

ທັງນີ້ ໂຊເທີບີສ໌ ຊື້ຮູບພາບຂຽນນີ້ ໃນລາຄາ 2,53 ລ້ານໂດລາ (ປະມານ 21,9 ຕື້ກີບ) ຈາກນາຍໜ້າດ້ານສິລະປະ ເຊິ່ງຊື້ຜົນງານຊິ້ນນີ້ ມາຈາກຄອບຄົວມີຖານະຄອບຄົວໜຶ່ງ ໃນເມືອງຊິຄາໂກ ແຕ່ພາຍໃນເວລາປະມານ 8 ນາທີເທົ່ານັ້ນ ຜູ້ປະມູນນິລະນາມທາງໂທລະສັບຄົນໜຶ່ງສາມາດເອົາຊະນະຜູ້ຮ່ວມແຂ່ງຂັນອີກ 5 ຄົນ ດ້ວຍການສະເໜີລາຄາ 110,7 ລ້ານໂດລາ (ປະມານ 961,64 ຕື້ກີບ) ສ້າງສະຖິຕິເປັນຜົນງານສິລະປະ ທີ່ມີລາຄາແພງທີ່ສຸດຂອງ ໂມແນ ດ້ວຍ.

%d bloggers like this: