ກຳປູເຈຍ ປ່ຽນທິດທາງສົ່ງເຂົ້າສານອອກໄປຈີນຫຼາຍຂຶ້ນ ຫຼັງຖືກ ອີຢູ ບີບຂຶ້ນພາສີ

ກໍາປູເຈຍ ປ່ຽນມາສົ່ງອອກເຂົ້າສານ ໄປຈີນເພິ່ມຂຶ້ນ ຫຼັງຖືກອີຢູ ຮຽກເກັບພາສີນໍາເຂົ້າ ເຂົ້າສານ ຈາກການເປີດເຜີຍຂອງທະນາຄານໂລກ ເມື່ອວັນຈັນ.

ສໍານັກຂ່າວຣອຍເຕີລາຍງານຈາກນະຄອນຫຼວງພະນົມເປນ ເມື່ອວັນຈັນ ທີ 6 ພຶດສະພາ ວ່າ ເດືອນມັງກອນຕົ້ນປີນີ້ ສະຫະພາບເອີຮົບ (EU) ປະກາດເກັບພາສີເປັນໄລຍະ 3 ປີ ຂອງເຂົ້າສານຈາກກໍາປູເຈຍ ແລະ ມຽນມາ ເພື່ອຄວບຄຸມການນໍາເຂົ້າເພິ່ມຈາກ 2 ປະເທດນີ້ ແລະ ເພື່ອປົກປ້ອງຜູ້ຜະລິດເຂົ້າຂອງ ອີຢູ ເຊັ່ນ: ປະເທດອິຕາລີ ເຊິ່ງລັດຖະບານກໍາປູເຈຍໄດ້ຢື່ນເລື່ອງຮ້ອງຮຽນເລື່ອງນີ້ໄປທີ່ສານຍຸຕິທໍາເອີໂລບ ຫຼື ອີຊີເຈ (ECJ: European Court of Justice).

ລາຍງານສະຖານະການເສດຖະກິດກໍາປູເຈຍຂອງທະນາຄານໂລກ ລະບຸວ່າ ຫຼັງຈາກຖືກອີຢູຮຽກເກັບພາສີການສົ່ງອອກເຂົ້າຈາກໂຮງສີຂອງກໍາປູເຈຍໄປ ອີຢູ ໃນເດືອນກຸມພາ ທີ່ຜ່ານມາ ເຫຼືອພຽງ 10.080 ໂຕ້ນ ຫຼຸດລົງ 57,8% ຈາກເດືອນມັງກອນ.

ກໍາປູເຈຍ ສົ່ງອອກເຂົ້າສານ 270.000 ໂຕ້ນ ຫຼື 43% ຂອງເຂົ້າສີຈາກໂຮງສີທີ່ສົ່ງອອກໄປ ອີຢູ ທັງໝົດ ໃນປີ 2018. ແຕ່ຖືກຊົດເຊີຍຫຼາຍກວ່າຈາກການສົ່ງໄປຈີນ ໂດຍອັດຕາສົ່ງອອກເຂົ້າສານຂອງກໍາປູເຈຍໄປຈີນ ໂດຍລວມເພິ່ມຂຶ້ນ 45,6%.

ປັດຈຸບັນ ກໍາປູເຈຍ ໄດ້ຮັບສິດພິເສດທາງການຄ້າຈາກ ອີຢູ ທີ່ເອີ້ນວ່າ ຂາຍໄດ້ທຸກຢ່າງຍົກເວັ້ນອາວຸດ ຫຼື ອີບີເອ (EBA: Everything But Arms) ເຮັດໃຫ້ສິນຄ້າສົ່ງອອກທຸກຊະນິດຂອງກໍາປູເຈຍໄປ ອີຢູ ບໍ່ຕ້ອງເສຍພາສີ ຍົກເວັ້ນອາວຸດ.

ອີຢູ ຄອງສ່ວນແບ່ງຫຼາຍກວ່າ 1 ໃນ 3 ຂອງສິນຄ້າສົ່ງອອກທັງໝົດຂອງກໍາປູເຈຍ ລວມເຖິງເຄື່ອງນຸ່ງຫົ່ມ, ເກີບ ແລະ ລົດຈັກ ໃນເດືອນກຸມພາ ອີຢູ ເລິ່ມຂະບວນການ 18 ເດືອນ ທີ່ຈະນໍາໄປສູ່ການລະງັບສະຖານະ ອີບີເອ ຂອງກໍາປູເຈຍ ເນື່ອງມາຈາກສະຖິຕິການລະເມີດສິດທິມະນຸດສະທຳ ແລະ ເລື່ອງຄວາມເປັນປະຊາທິປະໄຕພາຍໃນປະເທດ.

%d bloggers like this: