ປຶ້ມ 5 ຫົວ ທີ່ຄວນອ່ານຈາກຫໍສະໝຸດແຫ່ງຊາດ

ການອ່ານປຶ້ມຖືເປັນສິ່ງສຳຄັນທີ່ເປັນຕົວແປດ້ານການພັດທະນາຂອງຄົນເຮົາ, ຄົນທີ່ອ່ານຫຼາຍຈະມີຄວາມຮູ້ຫຼາຍ ແລະ ຊ່ວຍໃຫ້ກາຍເປັນຄົນທີ່ມີຄວາມສາມາດສູງ ບໍ່ວ່າທາງດ້ານວິຊາການ ຫຼື ດ້ານເຕັກນິກຕ່າງໆ.

ຫໍສະໝຸດແຫ່ງຊາດເປັນໜຶ່ງສະຖານທີ່ທີ່ເຕົ້າໂຮມຮວບຮວມແຫຼ່ງ ຄວາມຮູ້ ຫຼື ປຶ້ມຕ່າງໆທັງໃນ ແລະ ຕ່າງປະເທດທີ່ໜ້າສົນໃຈ ແລະ ຄວນອ່ານ.

ທ່ານ ນາງ ບົວພັນ ພານິດສຸວົງ ຫົວໜ້າຂະແໜງບໍລິການການອ່ານ ແລະ ປະຊາສຳພັນ ຫໍສະໝຸດແຫ່ງຊາດ ໃຫ້ສຳພາດວ່າ: ຫໍສະໝຸດແຫ່ງຊາດ ເປັນແຫຼ່ງເຕົ້າໂຮມບັນດາປຶ້ມຕ່າງໆທີ່ນັກຮຽນ – ນັກສຶກສາ, ນັກຄົ້ນຄວ້າ ແລະ ຜູ້ສົນໃຈອ່ານຕ່າງໆມັກເຂົ້າອ່ານ. ປັດຈຸບັນ ຫໍສະໝຸດແຫ່ງຊາດ ເປີດບໍລິການການອ່ານຢູ່ຊັ້ນ 1 ຊັ້ນ 2 ແລະ ຊັ້ນ 3 ເຊິ່ງແຕ່ລະຊັ້ນປະກອບມີ 3 ຫ້ອງ ແລະ ຊັ້ນທີ 2 ແມ່ນຊັ້ນທີ່ມີປຶ້ມຕຳລາກ່ຽວກັບຄວາມຮູ້ຕ່າງໆປະກອບມີທັງໝົດ 3 ຫ້ອງ ຄື: ຫ້ອງພາສາລາວ – ພາສາໄທ – ພາສາຈີນ, ຫ້ອງໄອທີ ແລະ ຫ້ອງໜັງສືໃບລານ. ໃນນັ້ນ, ປະກອບມີທັງໝົດ 10 ໝວດໃຫຍ່ ເປັນຕົ້ນແມ່ນ: ໝວດຄວາມຮູ້ທົ່ວໄປ, ໝວດປັດຊະຍາ, ໝວດສາສະໜາ, ໝວດສັງຄົມສາດ, ໝວດພາສາສາດ, ໝວດວິທະຍາສາດທຳມະຊາດ, ໝວດເຕັກໂນໂລຊີ, ໝວດສິລະປະ ແລະ ການບັນເທີງ, ໝວດວັນນະຄະດີ ແລະ ໝວດສຸດທ້າຍຄືປະຫວັດສາດ – ຊີວະສາດ – ພູມສາດ ແລະ ການທ່ອງທ່ຽວ.

ໃນປີ 2019 ນີ້ເຊິ່ງເປັນປີທ່ອງທ່ຽວ ລາວ – ຈີນ ເຖິງວ່າຫໍສະໝຸດແຫ່ງຊາດຍັງບໍ່ທັນຕອບສະໜອງປຶ້ມຕຳລາກ່ຽວກັບວັດທະນະທຳທ່ອງທ່ຽວຈີນ ຫຼາຍເທົ່າທີ່ຄວນ, ແຕ່ກໍໄດ້ຮັບປຶ້ມຕຳລາຈຳນວນໜຶ່ງຈາກນັກຂຽນ ແລະ ໂຮງພິມຕ່າງໆ ເພື່ອໃຫ້ນ້ອງນັກຮຽນ – ນັກສຶກສາທັງຫຼາຍທີ່ເຂົ້າມາໃນຫໍສະໝຸດໄດ້ຄົ້ນຄວ້າ ແລະ ອ່ານ. ໃນນັ້ນ, ປຶ້ມທີ່ໜ້າອ່ານ ແລະ ຄວນອ່ານທີ່ສຸດປະກອບມີ:

  1. ປຶ້ມ “ ຮັກນີ້ນິລັນດອນ ” ຂອງ ທິບພະເກສອນ ດວງຈັກ ເຊິ່ງເປັນນິຍາຍຊຶ້ງໆທີ່ມີກິ່ນອາຍຂອງຄວາມເສົ້າ, ການເສຍສະຫຼະເປັນເລື່ອງທີ່ເກີດຂຶ້ນໃນຮົ້ວມະຫາວິທະຍາໄລຂອງນັກສຶກສາແພດ, ເປັນຄວາມຮັກທີ່ຫວານຊຶ້ງຊ່ວຍເຫຼືອເຊິ່ງກັນ ແລະ ກັນຈົນສຳເລັດການສຶກສາ, ເປັນຄວາມຮັກໜຸ່ມສາວທີ່ສາບານກັນວ່າຈະຮັກກັນຈົນຊົ່ວຟ້າດິນສະຫຼາຍ, ແຕ່ຄວາມແນ່ນອນກໍຄືຄວາມບໍ່ແນ່ນອນ ຮັກຄັ້ງທຳອິດ ແລະ ຮັກຄັ້ງສຸດທ້າຍບາງເທື່ອກໍບໍ່ແມ່ນຈະມີໃຫ້ຄົນໆດຽວ.
  2. ປະຫວັດເມືອງວັງ ແຂວງສະຫວັນນະເຂດ ຂອງ ທ່ານ ປອ. ຄຳເຜີຍ ຜັນທະຈອນ ເຊິ່ງເປັນເລື່ອງທີ່ເວົ້າກ່ຽວກັບຄວາມເປັນມາຂອງເມືອງວັງ ແຕ່ສະໄໝບູຮານມາຈົນເຖິງປັດຈຸບັນ. ໃນນັ້ນ, ຜູ້ຂຽນໄດ້ເວົ້າເຖິງປະຫວັດການສະຖາປະນາເຂດເມືອງວັງ ແຕ່ສະໄໝປີ 1690 ທີ່ເມືອງດັ່ງກ່າວໄດ້ເປີດປະຕູຮັບເອົາການເຄື່ອນຍ້າຍຂອງຊຸມຊົນເຜົ່າຜູ້ໄທຈາກເມືອງແຖນມາຢູ່. ໃນນັ້ນ, ຍັງເລົ່າເຖິງປະຫວັດຂອງເຜົ່າຜູ້ໄທ ແລະ ອີກຫຼາກຫຼາຍປະການທີ່ກ່ຽວກັບປະຫວັດສາດອາຊີອາຄະເນ ແລະ ປະຫວັດສາດລາວມາຈົນເຖິງປັດຈຸບັນ.
  3. ປຶ້ມ “ ຈຸດຈົບຢູ່ຜາຖີ່ ” ຂອງ ທ່ານ ແສງຈັນ ສຸຂະເສມ ເປັນນະວະນິຍາຍອີງປະຫວັດສາດທີ່ເວົ້າເຖິງຂະບວນການຕໍ່ສູ້ກູ້ຊາດຂອງກອງທັບປະຊາຊາດລາວ, ສະທ້ອນເຖິງຄວາມປີຊາສາມາດ ແລະ ວິລະກຳອັນລໍ້າເລີດຂອງກອງທັບປະຊາຊົນລາວ ເຊິ່ງເປັນນະວະນິຍາຍທີ່ຂຽນອອກມາໃນຫຼາຍແງ່ມູມ ແລະ ມີຫຼາຍກໍລະນີສຶກສາຜ່ານຕົວລະຄອນ ແລະ ເຫດການເລື່ອງຈິງຄົນແທ້.
  4. ອະພິທັມມັດຕະສັງຄະຫະ ຂອງ ວີລະຫະຣະປຸນໂຍ ເປັນໜັງສືທີ່ກ່ຽວກັບການສຶກສາທາງພຸດທະສາສະໜາ ເຊິ່ງຜູ້ຂຽນໄດ້ຫຍໍ້ສະເພາະຫຼັກສຳຄັນຂອງ ປະຣະມັຕຖະທັມ ຄືຈິດເຈດຕະສິກຮູບນິພານ ເພື່ອໃຫ້ງ່າຍໃນການສຶກສາຄົ້ນຄວ້າສືບຕໍ່ຮັກສາພຸດທະສາສະໜາວັດທະນະທຳອັນດີງາມຂອງຊາດລາວ ໃຫ້ຢູ່ຄົງໄວ້ ແລະ ວິທີການປັບໃຊ້ໃຫ້ເກີດປະໂຫຍດໃນການດຳລົງຊີວິດ, ສ້າງ ຄວາມກ້າວໜ້າແກ່ສັງຄົມລາວ ໃຫ້ກ້າວໄປສູ່ການພັດທະນາແບບຍືນຍົງ.
  5. ໂຮມກະວີ “ ສະດຸດີ 70 ປີກອງທັບປະຊາຊົນລາວ ” ເຊິ່ງເປັນກະວີໂຮມລວມຜົນງານຂອງນັກກະວີແຫ່ງຍຸກສະໄໝເກືອບທັງໝົດຂອງໃຕ້ຟ້າລາວ, ເປັນຮວດຮ້ອຍພວງມາໄລພິເສດ ແລະ ສຳຄັນທີ່ສຸດທີ່ສະມາຄົມນັກປະພັນລາວ ແລະ ນັກກະວີທັງຫຼາຍໄດ້ປະກອບສ່ວນອຸທິດໃຫ້ແກ່ກອງທັບປະຊາຊົນລາວ ເນື່ອງໃນໂອກາດຄົບຮອບ 70 ປີ.

ປຶ້ມແຕ່ລະຫົວທີ່ໄດ້ແນະນຳມານັ້ນລ້ວນເປັນປຶ້ມທີ່ໜ້າອ່ານທີ່ສຸດໃນປີ 2019 ນີ້. ໃນນັ້ນ, ປຶ້ມທີ່ໜ້າສົນໃຈ ແລະ ອ່ານແລ້ວສາມາດປັບໃຊ້ເຂົ້າໃນຊີວິດຕົວຈິງນັ້ນແມ່ນປຶ້ມ “ ຈຸດຈົບຢູ່ຜາຖີ່ ”.

ທ້າວ ເດດດາພອນ ມະທຸຈັນ ຜູ້ທີ່ອ່ານ “ ຈຸດຈົບຢູ່ຜາຖີ່ ” ມາແລ້ວຫຼາຍຮອບໃຫ້ສຳພາດວ່າ: ປຶ້ມຫົວນີ້ຖືເປັນຜົນງານອັນລ້ຳຄ່າຂອງນະວະນິຍາຍເລີຍກໍວ່າໄດ້, ນອກຈາກສອນໃຫ້ເຮົາໄດ້ຮຽນຮູ້ເລິກເຊິ່ງກ່ຽວກັບຂະບວນການປະຕິວັດຕໍ່ສູ້ປົດປ່ອຍຈຸດຍຸດທະສາດຜາຖີ່ແລ້ວ ຍັງມີຫຼາຍກໍລະນີສຶກສາ, ຫຼາຍກົນລະຍຸດທີ່ອ່ານແລ້ວສາມາດປັບໃຊ້ໃນການດຳລົງຊີວິດປະຈຳວັນ ແລະ ປັບໃຊ້ເຂົ້າໃນໜ້າທີ່ການງານ ເປັນຕົ້ນແມ່ນຄວາມຮອບຄອບ, ຄວາມສາມັກຄີ, ການເສຍສະຫຼະ ແລະ ອື່ນໆ.

( ຂ່າວ: ກາວຊົ່ງ; ຮູບ: ສອນໄຊ )

%d bloggers like this: