ເມືອງແຟຣງເຟີດ ສັ່ງອົບພະຍົບປະຊາຊົນ ເພື່ອກູ້ລະເບີດສະໄໝສົງຄາມໂລກ

ທາງການປະເທດເຢຍລະມັນສັ່ງອົບພະຍົບປະຊາຊົນອອກຈາກບ້ານເຮືອນທີ່ຢູ່ອາໄສ ໃນເຂດເມືອງເກົ່າຂອງເມືອງແຟຣງເຟີດ ຂະນະປະຕິບັດໜ້າທີ່ເກັບກູ້ລະເບີດສະໄໝສົງຄາມໂລກ ຄັ້ງທີ 2 ເຊິ່ງພົບຢູ່ໃນແມ່ນໍ້າສາຍຫຼັກຂອງເມືອງແຟຣງເຟີດ.

ສໍານັກຂ່າວເອພີລາຍງານຈາກເມືອງແຟຣງເຟີດ ປະເທດເຢຍລະມັນ ເມື່ອວັນທີ 14 ເມສາ ວ່າ ສໍານັກຂ່າວດິພີເອຂອງເຢຍລະມັນໄດ້ລາຍງານວ່າ ທາງການໄດ້ສັ່ງອົບພະຍົບປະຊາຊົນ ປະມານ 600 ຄົນອອກຈາກບ້ານເຮືອນທີ່ຢູ່ອາໄສ ໃນເຂດເມືອງເກົ່າຂອງເມືອງແຟຣງເຟີດ ເມື່ອວັນອາທິດ ທີ 14 ເມສາ  ເພື່ອໃຫ້ເຈົ້າໜ້າທີ່ຜູ້ຊ່ຽວຊານທຳການເຄື່ອນຍ້າຍລະເບີດໜ່ວຍໜຶ່ງສະໄໝສົງຄາມໂລກ ຄັ້ງທີ 2 ທີ່ພົບຢູ່ໃນແມ່ນ້ຳສາຍຫຼັກ ຈາກນັ້ນ ເຈົ້າໜ້າທີ່ໄດ້ປົດຊະນວນລະເບີດຕາມແຜນການທີ່ກຳນົດໄວ້ຢູ່ໃນພື້ນນ້ຳ  ເຮັດໃຫ້ເກີດສຽງລະເບີດດັງຢ່າງຮຸນແຮງ ແລະ ມີຄື້ນນ້ຳຟົ້ງຂຶ້ນມາ ແຕ່ທາງເຈົ້າໜ້າທີ່ຕໍາຫຼວດຢືນຢັນວ່າລະເບີດບໍ່ມີອັນຕະລາຍອີກແລ້ວ.

ເຈົ້າໜ້າທີ່ດັບເພີງພົບເຫັນລະເບີດໜ່ວຍດັ່ງກ່າວ ເຊິ່ງເປັນລະເບີດຂອງທະຫານອາເມຣິກກັນ ນໍ້າໜັກປະມານ 250 ກິໂລກຣາມ ຂະນະດໍາລົງໄປເຝິກອົບຮົມໃນນໍ້າ ເມື່ອວັນອັງຄານ ທີ່ຜ່ານມາ.

ເຖິງວ່າເວລາຈະຜ່ານໄປຫຼາຍກວ່າ 70 ປີແລ້ວ ຫຼັງສິ້ນສຸດສົງຄາມໂລກ ຄັ້ງທີ 2 ແຕ່ກໍ່ຍັງມີລະເບີດ ແລະ ເຄື່ອງລູກປືນຕ່າງໆປະກົດຂຶ້ນມາໃຫ້ເຫັນຢ່າງສະໝໍ່າສະເໝີໃນປະເທດເຢຍລະມັນ.

%d bloggers like this: