ເກີດເຫດຍິງກັນທີ່ບາເຫຼົ້າກາງຄືນ ໃນເມືອງເມລເບິ້ນ ປະເທດອົສຕຣາລີ ຕາຍ 1 ເຈັບ 3

ຜູ້ກໍ່ເຫດຂັບລົດແລ້ວລະດົມຍິງໃສ່ບາເຫຼົ້າຍອດນິຍົມ ໃນເມືອງເມລເບີ້ນປະເທດອົສຕຣາລີ ເມື່ອເຊົ້າມືດວັນອາທິດ ທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດ 1 ຄົນ ແລະ ບາດເຈັບ 3 ຄົນ.

ສໍານັກຂ່າວເອພີລາຍງານຈາກເມືອງເມລເບີ້ນ ປະເທດອົສຕຣາລີ ເມື່ອວັນອາທິດ ທີ 14 ເມສາ ວ່າ ແອນດຣູ ສະແຕມເປີ ຕໍາຫຼວດລັດວິກຕໍເລຍ ເປີດເຜີຍວ່າ ເກີດເຫດຄົນຮ້າຍຂັບລົດໃຫຍ່ກາຍມາ ແລ້ວລະດົມຍິງໃສ່ບາເຫຼົ້າກາງຄືນຍອດນິຍົມ ຊື່ເລີຟ ແມຊຊີນ ເປັນອາຄານສອງຊັ້ນ ໃນເມືອງເມລເບິ້ນ ເມື່ອເຊົ້າມືດຂອງວັນອາທິດ ທີ່ຜ່ານມາ ລູກປືນຖືກເຈົ້າໜ້າທີ່ຮັກສາຄວາມປອດໄພຂອງບາເຫຼົ້າ 3 ຄົນ ແລະ ຄົນອື່ນອີກ 1 ຄົນ ຕໍາຫຼວດໄດ້ຮ້ອງຂໍຄວາມຊ່ວຍເຫຼືອຈາກປະຊາຊົນ ວ່າ ຖ້າໃຜມີເບາະແສເຊັ່ນ ຄລິບວິດີໂອທີ່ຖ່າຍພາບເຫດການໄວ້ໄດ້ ຂໍໃຫ້ແຈ້ງຕໍາຫຼວດໂດຍດ່ວນ ເພາະຍັງຈັບກຸມຜູ້ກະທຳຜິດບໍ່ໄດ້.

ສໍາລັບເຫຍື່ອຜູ້ເຄາະຮ້າຍທີ່ຖືກລູກປືນ 4 ຄົນ ຖືກນໍາສົ່ງໂຮງໝໍ ແຕ່ພົບວ່າເສຍຊີວິດ 1 ຄົນ ເປັນຊາຍ ອາຍຸ 37 ປີ ສ່ວນທີ່ເຫລືອ 3 ຄົນໄດ້ຮັບບາດເຈັບ ແລະ ໃນຈໍານວນນີ້ອາການສາຫັດ 1 ຄົນ.

ທາງເຈົ້າໜ້າທີ່ຕໍາຫຼວດກໍາລັງສືບສວນວ່າ ລົດໃຫຍ່ເອັສຢູວີ ຍີ່ຫໍ້ປໍເຊ ສີດໍາ ທີ່ແລ່ນອອກຈາກສະຖານທີ່ເກີດເຫດນັ້ນ ມີສ່ວນກ່ຽວຂ້ອງກັບເຫດລະດົມຍິງ ຫຼື ບໍ່ ເພາະວ່າໄປພົບເຫັນລົດໃຫຍ່ຄັນດັ່ງກ່າວໃນສະພາບຖືກຈູດຖິ້ມ.

ຄວາມຮຸນແຮງຈາກອາວຸດປືນເກີດຂຶ້ນໄດ້ໜ້ອຍຫຼາຍ ໃນປະເທດອົສຕຣາລີ ທີ່ພະຍາຍາມບັງຄັບໃຊ້ກົດໝາຍຢ່າງເຂັ້ມງວດ ຫຼັງການກວາດຍິງ 35 ສົບ ໂດຍມືປືນພຽງຄົນດຽວ ໃນລັດແທສເມເນຍ ເມື່ອປີ 1996 ສ່ວນທີ່ປະເທດນິວຊີແລນ ຊາຍນິຍົມລັດທິຄົນຂາວສຸດໂຕ່ງ ເປັນຊາວອົສຕຣາລີ ຖືກຕັ້ງຂໍ້ຫາຄາດຕະກຳ ເຫດໂຈມຕີມມັສຢິດ ໃນເມືອງໄຄຣເຊີດ ເມື່ອວັນທີ 15 ມີນາ ຜ່ານມາ ມີຜູ້ເສຍຊີວິດ 50 ຄົນ ເຮັດໃຫ້ທາງການສັ່ງຫ້າມໃຊ້ອາວຸດປື້ນແບບອໍໂຕ້.

%d bloggers like this: