ເກີດເຫດຍົນໂດຍສານລຳນ້ອຍ ຕຳກັບ ເຮລິຄອບເຕີ ເສຍຊີວິດ 3 ບາດເຈັບ 4

ຍົນລຳນ້ອຍແລ່ນໄຖອອກນອກຣັນເວໄປຕຳກັບເຮລິຄອບເຕີ ທີ່ສະໜາມບິນໃນເຂດພູເອເວີເຣສ ປະເທດເນປານ ເມື່ອເຊົ້າວັນອາທິດ ທີ່ຜ່ານມາ ເຮັດໃຫ້ມີຜູ້ເສຍຊີວິດ 3 ຄົນ ແລະ ບາດເຈັບ 4 ຄົນ.

ສໍານັກຂ່າວເອພີ ແລະ ເອເອັຟພີ ລາຍງານຈາກນະຄອນຫຼວງຄັດມານດຸ ປະເທດເນປານ ເມື່ອວັນອາທິດ ທີ 14 ເມສາ ວ່າ ທ່ານຣາຊ ກຸມາຣ ຊະເຮຕຣີ ເຈົ້າໜ້າທີ່ການບິນພົນລະເມືອງຂອງເນປານໄດ້ເປີດເຜີຍ ວ່າ ເກີດອຸບັດຕິເຫດຍົນໂດຍສານລຳນ້ອຍຕຳກັບເຮລິຄອບເຕີ ທີ່ຈອດຢູ່ສະໜາມບິນລຸຄລາ ເຊິ່ງເປັນສະໜາມບິນແຫ່ງດຽວໃນເຂດພູເອເວີເຣສຂອງເນປານ ເມື່ອເຊົ້າວັນອາທິດ ທີ່ຜ່ານມາ ເປັນຍົນເຄື່ອງຈັກນ້ອຍແບບ let-410 turbo-prop ຂອງສາຍການບິນຊໍາມິດ ແອຣ໌ ຂະນະທີ່ ກໍາລັງບິນຂຶ້ນຈາກສະໜາມບິນລຸຄລາ ເດີນທາງສູ່ຈຸດໝາຍປາຍທາງທີ່ນະຄອນຫຼວງຄັດມານດຸ ຂອງເນປານ ແຕ່ຍົນເກີດການແລ່ນໄຖອອກນອກຣັນເວແລ້ວໄປຕຳກັບເຮລິຄອບເຕີຂອງບໍລິສັດມານັງ ແອຣ໌ ທີ່ຈອດໄວ້ ເຮັດໃຫ້ມີຜູ້ເສຍຊີວິດ 3 ຄົນ ແລະ ບາດເຈັບ 4 ຄົນ ເຈົ້າໜ້າທີ່ເລັ່ງນໍາຕົວສົ່ງໂຮງໝໍ ໃນນະຄອນຫຼວງບຄັດມານດຸແລ້ວ.

ຍົນໂດຍສານ ແລະ ເຮລິຄອບເຕີຂອງສາຍການບິນຊໍາມິດ ແອຣ໌ ແລະ ມານັງ ແອຣ໌ ທີ່ປະສົບເຫດນັ້ນ ລ້ວນແລ້ວເປັນຂອງບໍລິສັດເອກະຊົນ ທີ່ໃຫ້ບໍລິການນໍາພາຜູ້ໂດຍສານ ແລະ ຊາວເນປານ ໃນການເດີນທາງໄລຍະໄກ ສ່ວນສະໜາມບິນລຸຄລາກໍ່ໄດ້ຊື່ວ່າເປັນໜຶ່ງໃນສະໜາມບິນທີ່ຂຶ້ນລົງຍາກທີ່ສຸດໃນໂລກເຊັ່ນກັນ ດ້ວຍສະພາບພາກພື້ນຂອງປະເທດທີ່ເປັນພູ ແລະ ຣັນເວສັ້ນ ຈຶ່ງເປີດໃຫ້ບໍລິການສະເພາະຍົນນ້ອຍ ແລະ ເຮລິຄອບເຕີ ເທົ່ານັ້ນ ໂດຍຕັ້ງຢູ່ທີ່ລະດັບຄວາມສູງ 2.845 ແມັດ.

 

picture: AFP

%d bloggers like this: