ມວນຊົນທະຍອຍກັບພູມລຳເນົາ ສອງຄິວລົດແໜ້ນອັ່ງ

ບັນຍາກາດຂອງການເດີນທາງກັບບ້ານໃນໄລຍະກ່ອນປີໃໝ່ລາວ ປີນີ້ເລີ່ມມີຄວາມຄຶກຄື້ນຫຼາຍຂຶ້ນທັງສອງຄິວລົດ ສາຍເໜືອ ແລະ ສາຍໃຕ້ ທັງສອງຄິວລົດກໍໄດ້ມີການກະກຽມຄວາມພ້ອມເລື່ອງຂອງລົດ, ເຕັກນິກກວດກາສະພາບລົດ ແລະ ຈໍານວນລົດ ລວມທັງຄົນຂັບ ເພື່ອຮັບປະກັນຄວາມປອດໄພ ແລະ ການຕົກຄ້າງຂອງຜູ້ໂດຍສານ.

ທີມຂ່າວເສດຖະກິດ – ການຄ້າ ໄດ້ລົງໄປຕິດຕາມພົບວ່າ ມີຜູ້ໂດຍສານທັງສອງຄິວ ເໜືອ ແລະ ໃຕ້ ໄດ້ເລີ່ມພາກັນມາຂຶ້ນລົດຢູ່ຄິວ ເພື່ອກັບຄືນສູ່ພູມລຳເນົາບ້ານເກີດເພື່ອໄປຢ້ຽມຍາດພີ່ນ້ອງ, ຂໍພອນຈາກພໍ່ແມ່ ແລະ ຜູ້ຊົງຄຸນວຸດທິ ເພື່ອເປັນສີລິມຸງຄຸນໃນການຄົບຮອບ 1 ປີ ທີ່ເຄີຍປະຕິບັດສືບຕໍ່ກັນມາຍາວນານ ສຳລັບຜູ້ໂດຍສານທີ່ເຂົ້າມາເຮັດວຽກຢູ່ໃນນະຄອນຫຼວງ ທີ່ຈະເດີນທາງກັບບ້ານຕ່າງແຂວງແມ່ນໄດ້ເລີ່ມທະຍອຍມາແຕ່ວັນທີ 9 – 10 ເມສາເປັນຕົ້ນມາ. ອີງຕາມຕົວເລກໃນແຕ່ລະປີແມ່ນຈະມີທຸກວັນນັບແຕ່ກ່ອນໄປຈົນເຖິງຫຼັງປີໃໝ່ມື້ລະຫຼາຍແສນຄົນໃນແຕ່ລະຄິວ.


ຕາມການສອບຖາມຈາກປາກຜູ້ໂດຍສານສ່ວນໃຫຍ່ ໄດ້ຮູ້ວ່າ: ຮູ້ສຶກມີຄວາມສຸກທີ່ຈະໄດ້ເດີນທາງກັບບ້ານ ຫຼື ໄປຢ້ຽມປູ່, ຍ່າ, ພໍ່ເຖົ້າ, ແມ່ເຖົ້າຂອງຕົນໃນຮອບ 1 ປີ ຈຶ່ງຈະໄດ້ມີໂອກາດ. ນອກນັ້ນ, ກໍຈະໄດ້ພົບປະໝູ່ເພື່ອນຖາມຂ່າວຄາວຄວາມສຸກທຸກຕະຫຼອດປີຜ່ານມາ. ແນວໃດກໍດີ, ສະເພາະປີນີ້ຍັງດີທີ່ຄ່າລົດກັບບ້ານຍັງລາຄາປົກກະຕິ ແຕ່ສິ່ງທີ່ໜ້າຫ່ວງຄືການເດີນທາງທັງຕອນໄປ ແລະ ຕອນກັບ ຢ້ານລົດຮັບຈຳນວນຜູ້ໂດຍສານແອອັດຈົນໄດ້ນັ່ງຕັ່ງເສີມຄືທຸກປີຜ່ານມາ.

ຕໍ່ບັນຫາດັ່ງກ່າວຫົວໜ້າສະຖານີທັງສອງຄິວໄດ້ຢືນຢັນຕໍ່ສື່ມວນຊົນແລ້ວວ່າ ຈະມີການເພີ່ມຈຳນວນລົດ ແລະ ຈະມີລົດແລ່ນອອກທຸກ 5 – 10 ນາທີ ແລະ ຂໍໃຫ້ຜູ້ໂດຍສານເຂົ້າມາຈອງປີ້ຢູ່ກັບຄິວດ້ວຍຕົນເອງ ສໍາລັບເທດສະການບຸນປີໃໝ່ລາວ ພ.ສ 2562 ປີນີ້ແມ່ນເຫັນວ່າມີວັນພັກຫຼາຍວັນພໍສົມຄວນ ລວມທັງວັນຊົດເຊີຍເໝາະສົມກັບຜູ້ທີ່ຈະເດີນທາງໄປຢ້ຽມຢາມຍາດພີ່ນ້ອງຕ່າງແຂວງທີ່ຈະໄດ້ມີເວລາໂອ້ລົມ ແລະ ພັກຜ່ອນຈາກທີ່ເຮັດວຽກມາໝົດປີ.

ຮູບ:Houmphet Manisouk, ວິລະສັກ

%d bloggers like this: