ທີມນ້ອງສວາຍລະອຽດ ໄດ້ຮັບລາງວັນຊະນະເລີດຈາກການແຂ່ງຂັນສ້າງນະວັດຕະກຳກ້າວສູ່ຍຸກດິຈິຕອລ

ໃນວັນທີ 10 ເມສາຜ່ານມາ, ບໍລິສັດ ລາວຊຳຊຸງ ເອເລັກໂຕຣນິກ ຈຳກັດຜູ້ດຽວ ຈັດພິທີປິດໂຄງການຝຶກອົບຮົມຊຳຊຸງ ເທັກອິນສະຕີຕູດ 2019 ( Samsung Tech Institute 2019 ) ແລະ ແຂ່ງຂັນສ້າງແອັບ ໃນຫົວຂໍ້: ” ສ້າງນະວັດຕະກຳກ້າວສູ່ຍຸກດິຈິຕອລ ( Lnnvtion Through Digitali zation ) ຂຶ້ນທີ່ຄະນະວິສະວະກຳສາດ ( ຄວສ ) ມະຫາວິທະຍາໄລແຫ່ງຊາດ ໂດຍການເຂົ້າຮ່ວມຂອງທ່ານ ຮສ. ປອ. ຄໍາຜຸຍ ສຸດທິສົມບັດ ຮັກສາການ ຄະນະບໍດີ ຄວສ, ທ່ານ ຊຶ່ງໂຮ ຊ່ອຍ ຜູ້ອໍານວຍການ ບໍລິສັດລາວຊຳຊຸງ ເອເລັກໂຕຣນິກ ຈຳກັດຜູ້ດຽວ, ທ່ານ ປອ. ສົມພອນ ກັນທະວົງ ຫົວໜ້າພາກວິຊາວິສະວະກໍາຄອມພິວເຕີ ແລະ ເຕັກໂນໂລຊີຂໍ້ມູນ – ຂ່າວສານ ຄວສ ພ້ອມດ້ວຍບັນດາຄະນະກຳມະການ ແລະ ນັກຮຽນ – ນັກສຶກສາເຂົ້າຮ່ວມ.

ທ່ານ ຊຶ່ງໂຮ່ ຊ່ອຍ ກ່າວວ່າ: ໂຄງການຊຳຊຸງເທັກອິນສະຕີຕູດ ເປັນຫຼັກສູດແນໃສ່ການພັດທະນາຄວາມຮູ້, ຄວາມສາມາດໃນດ້ານການພັດທະນາແອັບພລິເຄຊັນມືຖື ໃຫ້ກັບນັກຮຽນ – ນັກສຶກສາ ແລະ ແນໃສ່ຄົນຍຸກໃໝ່ສ້າງທຸລະກິດ ໂດຍໃຊ້ເຕັກໂນໂລຊີເຂົ້າມາຊ່ວຍ ເພື່ອນໍາຄວາມຮູ້ທີ່ໄດ້ຈາກການອົບຮົມຄັ້ງນີ້ໄປຜັນຂະຫຍາຍແກ່ໝູ່ເພື່ອນ, ສະຖາບັນຂອງຕົນ ແລະ ພັດທະນາຄົນຮຸ່ນໃໝ່ສືບຕໍ່ໄປ.


ພ້ອມດຽວກັນນັ້ນ, ໃນພິທີດັ່ງກ່າວຍັງມີການຄັດເລືອກເອົາຜູ້ຊະນະເລີດຈາກການແຂ່ງຂັນການນຳສະເໜີໄອເດຍ ໃນການສ້າງທຸລະກິດ ໂດຍນຳໃຊ້ເຕັກໂນໂລຊີເຂົ້າມາປະກອບສ່ວນກັບຫົວຂໍ້: ” ສ້າງນະວັດຕະກໍາກ້າວສູ່ຍຸກດິຈິຕອລ ( Lnnvtion Through Digitalization ) ” ເຊິ່ງປະກອບມີ 8 ທີມທີ່ເຂົ້າຮອບສຸດທ້າຍ ເພື່ອມາແຂ່ງຂັນຄັດເລືອກເອົາທີມຊະນະເລີດ ໂດຍແຕ່ລະທີມຈະມີເວລາທັງໝົດປະມານ 15 ນາທີ ໃນການສະເໜີບົດຂອງຕົນໃຫ້ແກ່ຄະນະກຳມະການ ເພື່ອຕັດສິນຫາຜູ້ຊະນະເລີດ ແລະ ທີມທີ່ຊະນະເລີດຈະໄດ້ຮັບເງິນທຶນໃນການພັດທະນາແອັບ ມູນຄ່າ 8 ລ້ານກີບ ເພື່ອໃຊ້ໃນການພັດທະນາການສ້າງແຜນທຸລະກິດຂອງຄົນ ໂດຍໃຊ້ເຕັກໂນໂລຊີທາງດ້ານດິຈິຕອລເຂົ້າມາຊ່ວຍ ນອກຈາກນັ້ນ, ຍັງມີລາງວັນຊົມເຊີຍໃຫ້ແກ່ທີມທີ່ມີໄອເດຍ ແລະ ການອອກແບບທີ່ແປກໃໝ່ ພ້ອມທັງມີແນວຄິດສ້າງສັນ ມູນຄ່າເຖິງ 2 ລ້ານກີບ ຈຳນວນ 2 ລາງວັນ.

ທ່ານ ປອ. ສົມພອນ ກັນທະວົງ ກ່າວວ່າ: ໂຄງການຝຶກອົບຮົມຊຳຊຸງ ເທັກອິນສະຕີຕູດ ແມ່ນໄດ້ປະຕິບັດມາແຕ່ປີ 2013 ເປັນຕົ້ນມາ ແລະ ປີ 2019 ນີ້ ກໍເປັນປີທີ 5 ເຊິ່ງເປັນໂຄງການຮ່ວມມືລະຫວ່າງ ຄວສ ແລະ ບໍລິສັດລາວຊໍາຊຸງເອເລັກໂຕຣນິກ ຈຳກັດຜູ້ດຽວ ຈັດໂຄງການນີ້ຂຶ້ນມາເພື່ອສົ່ງເສີມ ແລະ ພັດທະນາການສຶກສາ.

ສຳລັບຜົນການແຂ່ງຂັນ ປາກົດວ່າທີມທີ່ໄດ້ຮັບລາງວັນຊະນະເລີດ ມູນຄ່າ 8 ລ້ານກີບ ໄດ້ແກ່: ທີມ ນາງ ສວາຍລະອຽດ ພິດສະພອນ ແຂ່ງຂັນໃນຫົວຂໍ້: ບໍລິການລ້າງລົດເຄື່ອນທີ່ ( Car Care Delivery ) ແລະ ທີມທີ່ໄດ້ຮັບລາງວັນຊົມເຊີຍ ມູນຄ່າ 2 ລ້ານກີບ ຈຳນວນ 2 ລາງວັນ ໄດ້ແກ່: ທີມ ທ້າວ ຈັອດ ວັນສີດາ ໃນຫົວຂໍ້ Service Laos ແລະ ທີມ End Game ໃນຫົວຂໍ້ Laundry Delivery.

( ຂ່າວ: ແກ້ວ; ຮູບ: ວິລະສັກ )

%d bloggers like this: