ມສ ພອນສະຫວັນ ຄວ້າລາງວັນນັກຮຽນເກັ່ງລະດັບຊາດທີ 1 ສອງລາງວັນ

ໂຮງຮຽນ ມສ ພອນສະຫວັນ – ຊົນເຜົ່າກຽມມະຫາວິທະຍາໄລໄດ້ເປັນຕົວແທນຂອງນະຄອນຫຼວງສົ່ງນັກຮຽນເກັ່ງເຂົ້າຮ່ວມບັ້ນສອບເສັງລະດັບຊາດ ຊັ້ນ ມ 7 ທັງໝົດ 3 ຄົນ ແລະ ສາມາດຍາດລາງວັນໄດ້ທັງໝົດ 3 ຄົນ. ໃນນັ້ນ, ຄວ້າລາງວັນທີ 1 ຈຳນວນ 2 ລາງວັນ ທຽບໃສ່ປີຜ່ານມາແມ່ນເພີ່ມຂຶ້ນ.
ທ້າວ ເລົ່າຢ່າງ ເຍ່ຍຢີ ນັກຮຽນເກັ່ງລະດັບຊາດທີ 1 ຊັ້ນ ມ 7 ວິຊາຟີຊິກສາດ ໃຫ້ສຳພາດວ່າ: ຕົນເອງມີຄວາມຮູ້ສຶກຕື່ນເຕັ້ນ ແລະ ດີໃຈຫຼາຍ ເພາະເປັນຄັ້ງທຳອິດທີ່ຕົນເອງໄດ້ເປັນຕົວແທນມາເສັງນັກຮຽນເກັ່ງລະດັບຊາດ ແລະ ສາມາດຍາດໄດ້ລາງວັນທີ 1. ເຊິ່ງການຄົ້ນຄວ້າຮໍ່າຮຽນ ແລະ ກຽມເສັງນັກຮຽນເກັ່ງໃນຄັ້ງນີ້ ແມ່ນໄດ້ຮັບການສົ່ງເສີມສິດສອນຈາກບັນດາຄູ – ອາຈານ ແລະ ພໍ່ແມ່ພີ່ນ້ອງທີ່ໃຫ້ກຳລັງໃຈ ແລະ ສະໜັບສະໜູນຕະຫຼອດມາ.

ທ່ານ ຮສ. ປອ. ຄຳພຸດ ພົມມະສອນ ຜູ້ອຳນວຍການໂຮງຮຽນ ມສ ພອນສະຫວັນ ແລະ ຊົນເຜົ່າ ກຽມມະຫາວິທະຍາໄລ ໃຫ້ສຳພາດ ວ່າ: ສຳລັບບັ້ນສອບເສັງນັກຮຽນເກັ່ງລະດັບຊາດປີນີ້ ໂຮງຮຽນ ມສ ພອນສະຫວັນ – ຊົນເຜົ່າກຽມມະຫາວິທະຍາໄລ ໄດ້ສົ່ງຕົວແທນເຂົ້າເສັງທັງໝົດ 3 ຄົນ. ໃນນັ້ນ, ສາມາດຍາດໄດ້ລາງວັນທີ 1 ຈຳນວນ 2 ຄົນ ຄື: ວິຊາຄະນິດສາດ ແລະ ຟີຊິກສາດ ຊັ້ນ ມ 7 ແລະ ທີສອງ 1 ລາງວັນ ຄື: ວິຊາພາສາລາວ – ວັນນະຄະດີ ຖ້າທຽບໃສ່ປີ 2017 – 2018 ເຫັນວ່າມີການພັດທະນາຂຶ້ນກວ່າເກົ່າໃນຊັ້ນ ມ 7 ແລະ ຫຼຸດລົງໃນຊັ້ນ ມ 4, ປີຜ່ານມາ ຊັ້ນ ມ 4 ແລະ ມ 7 ລາງວັນທີ 1 ລະດັບຊາດໃນວິຊາເຄມີສາດ ເຊິ່ງຜົນງານໃນປີນີ້ເປັນໜ້າເພິ່ງພໍໃຈ, ດີໃຈ, ສຸດທີ່ພາກພູມໃຈ ແລະ ເປັນກຽດທີ່ໄດ້ເປັນຕົວແທນຂອງນະຄອນຫຼວງ.

ທ້າວ ບີວ່າງ ຈົງດົງ ນັກຮຽນເກັ່ງລະດັບຊາດທີ 1 ຊັ້ນ ມ 7 ວິຊາຄະນິດສາດ ໃຫ້ສຳພາດວ່າ: ຕົນເອງມີຄວາມພາກພູມໃຈ ແລະ ຕື່ນເຕັ້ນທີ່ສາມາດຍາດໄດ້ລາງວັນທີ 1 ລະດັບຊາດໃນປີນີ້ ແລະ ຮູ້ສຶກເປັນກຽດທີ່ໂຮງຮຽນ ແລະ ຄອບຄົວໄດ້ສົ່ງເສີມຕົນເອງໂດຍຕະຫຼອດມາ ຈົນສາມາດມາຮອດຈຸດນີ້ໄດ້ ສາເຫດທີ່ຕົນເອງເລືອກເສັງວິຊາຄະນິດສາດ ແມ່ນຍ້ອນຕົນເອງມັກໃນວິຊາການຄິດໄລ່ ແລະ ໄດ້ຮັບແຮງບັນດານໃຈຈາກອ້າຍມາຕັ້ງແຕ່ສະໄໝຮຽນຢູ່ ມ.ຕົ້ນ ທີ່ ມສ ຫຼັກ 52 ແລະ ເຄີຍມາເສັງນັກຮຽນເກັ່ງລະດັບຊາດ ຊັ້ນ ມ 4 ແຕ່ບໍ່ໄດ້ ເນື່ອງຈາກວ່າຕົນເອງຍັງຂາດເປົ້າໝາຍທີ່ຊັດເຈນ.

ທ້າວ ບີວ່າງ ຈົງດົງ ນັກຮຽນເກັ່ງລະດັບຊາດທີ 1 ຊັ້ນ ມ 7 ວິຊາຄະນິດສາດ


ຫຼັງຈາກໄດ້ເຂົ້າມາຮຽນໃນ ມສ ພອນສະຫວັນ ນີ້ຕົນເອງໄດ້ມີເປົ້າໝາຍເພື່ອໃຫ້ໄດ້ເປັນຕົວແທນນັກຮຽນເກັ່ງ ເຊິ່ງໄດ້ມີການກະກຽມສຶກສາຄົ້ນຄວ້າມາແຕ່ ມ 5 ແລະ ຄົ້ນຄວ້າຕຳລາພາຍໃນ. ຫຼັງຈາກນັ້ນ, ແມ່ນເລີ່ມຄົ້ນຄວ້າຕຳລາຕ່າງປະເທດ, ການກຽມເສັງນັກຮຽນເກັ່ງໃນປີນີ້ຕົນເອງໄດ້ຄົ້ນຄວ້າຢ່າງໜັກ ນອກຈາກອາຈານສອນແລ້ວ ຍັງໄດ້ສຶກສາຮໍ່າຮຽນນຳອ້າຍເອື້ອຍທີ່ເຄີຍເປັນນັກຮຽນເກັ່ງ ແລະ ແບ່ງເວລາໃນການຄົ້ນຄວ້າຕຳລາທັງພາຍໃນ ແລະ ຕ່າງປະເທດດ້ວຍຕົນເອງທຸກມື້ ສະເພາະແມ່ນວັນເສົາ – ອາທິດ ໄດ້ຄົ້ນຄວ້າໝົດມື້ ໂດຍເລີ່ມຈາກການສຶກສາໃຫ້ເຂົ້າໃຈພາກທິດສະດີ, ນິຍາມກ່ອນ. ຫຼັງຈາກນັ້ນ, ຈຶ່ງໄປທີ່ສູດຄິດໄລ່ ແລະ ລົງມືແກ້.

ສຳລັບການຮຽນໃຫ້ເກັ່ງວິຊາຟີຊິກສາດນັ້ນ ແມ່ນຕ້ອງເປັນຄົນມັກຄົ້ນ ຄວ້າ – ຄົ້ນຄິດ ແລະ ສັງເກດ ເພາະວິຊາຟີຊິກສາດແມ່ນວິຊາທີ່ໃຊ້ໃນຊີວິດປະຈຳວັນບໍ່ວ່າການເຄື່ອນທີ່ ຫຼື ສິ່ງຕ່າງໆຢູ່ອ້ອມຂ້າງເຮົາ, ການຮຽນຕ້ອງເລີ່ມຈາກເຂົ້າໃຈທິດສະດີ ແລະ ຄວາມເປັນມາຂອງສູດກ່ອນ. ຫຼັງຈາກນັ້ນ, ຈຶ່ງຈື່ສູດ ແລະ ປະຕິບັດແກ້ຕົວຈິງ ແລະ ຕ້ອງໝັ່ນແກ້ຕະຫຼອດ ໂດຍສຶກສາຈາກຕຳລາທັງພາຍໃນ ແລະ ຕ່າງປະເທດແລ້ວນຳມາສົມທຽບກັນ.

[ ຂ່າວ: ກາວຊົ່ງ; ຮູບ: ສອນໄຊ ]

%d bloggers like this: