ລອງເຮັດ! ວຸ້ນໝາກມັງກອນຂອງຫວານເພື່ອສຸຂະພາບ

ໝາກມັງກອນເປັນໝາກໄມ້ທີ່ສາມາດກິນໄດ້ໂດຍບໍ່ຕ້ອງເປັນຫ່ວງເລື່ອງໄຂມັນ ແລະ ຄວາມຫວານທີ່ຈະກາຍເປັນໄຂມັນສະສົມ ແຖມຍັງອີ່ມທ້ອງຈົນສາມາດທົດແທນເຂົ້າແລງໄດ້. ເຊິ່ງເປັນໝາກໄມ້ທີ່ຊ່ວຍຄວບຄຸມນ້ຳໜັກໄດ້ເປັນຢ່າງດີເລີຍທີ່ສຳຄັນຄືຍັງມີຄຸນຄ່າທາງອາຫານອີກດ້ວຍເຊັ່ນ: ແຄຊຽມ, ຟົດຟໍຣັດ, ທາດເຫຼັກ, ວິຕາມິນ B1, B2 ແລະ B3 ແຕ່ມີຫຼາຍທີ່ສຸດຄື: ວິຕາມິນ C ຈຶ່ງຊ່ວຍໃນເລື່ອງບຳລຸງຜິວພັນ, ກະດູກ, ແຂ້ວ ແລະ ຍັງຊ່ວຍບຳລຸງລະບົບສາຍຕານຳອີກ.

 

ສ່ວນປະສົມ:

ໝາກມັງກອນເນື້ອຂາວ 1 ໜ່ວຍ.

ໝາກມັງກອນເນື້ອແດງ 1 ໜ່ວຍ.

ນ້ຳຕານ 4 ບ່ວງແກງ.

ຜົງວຸ້ນ 1 ບ່ວງແກງ.

ນ້ຳສະອາດ 3 ຖ້ວຍ.

ວິທີປຸງແຕ່ງ:

  • ເອົາໝາກມັງກອນມາລ້າງໃຫ້ສະອາດແລ້ວຜ່າເຄິ່ງ ແລະ ເອົາເນື້ອທາງໃນອອກມາໂດຍບໍ່ຕ້ອງປາດເປືອກຖີ້ມ (ເນື່ອງຈາກວ່າຈະໃຊ້ເປືອກເປັນພິມ). ຈາກນັ້ນ, ກໍ່ເອົາເນື້ອໝາກມັງກອນທີ່ໄດ້ມາຊອຍເປັນຕ່ອນ 4 ລ່ຽມນ້ອຍແລ້ວໃສ່ຕູ້ເຢັນກຽມໄວ້ (ສໍາລັບໝາກມັງກອນສີແດງແມ່ນຈະຊ່ວຍເພີ່ມສີສັນໃຫ້ເປັນຕາແຊບຍິ່ງຂຶ້ນຖ້າບໍ່ມີກໍ່ໃຊ້ພຽງແຕ່ໝາກມັງກອນສີຂາວກໍ່ໄດ້).

  • ຫຼັງຈາກນັ້ນ, ກໍ່ເອົານ້ຳໃສ່ໝໍ້ຄ້າງໄຟປານກາງພໍນ້ຳເລີ່ມຟົດກໍ່ເອົາຜົງວຸ້ນລົງຄົນໃຫ້ຜົງວຸ້ນແຕກດີແລ້ວຈຶ່ງເອົານ້ຳຕານລົງ ແລະ ຄົນຈົນນ້ຳຕານລະລາຍພໍດີນ້ຳຟົດແລ້ວປົງລົງປະໄວ້ໃຫ້ອຸ່ນໜ້ອຍໜຶ່ງ. ຈາກນັ້ນ, ກໍ່ເອົາເນື້ອມັງກອນທີ່ກຽມໄວ້ລົງແລ້ວຖອກໃສ່ເປືອກມັງກອນທີ່ກຽມເປັນພິມໄວ້ ແລະ ປະໄວ້ໃຫ້ເຢັນ ຫຼື ຈະເອົາເຂົ້າຕູ້ເຢັນໄວ້ປະມານ 1-2 ຊົ່ວໂມງກໍ່ກິນໄດ້ແລ້ວ.

ຜົນ​ການ​ຊອກຫາ​ສຳລັບ วุ้นแก้วมังกอน

 

%d bloggers like this: