ບົດບາດເງິນຢວນ ເມື່ອກ່ຽວພັນກັບການຄ້າລະດັບໂລກ

ທ່ານ ໂດນັນ ທຣໍາ ປະທານາທິບໍດີອາເມຣິກາ ມີຄວາມເຊື່ອວ່າຄ່າເງິນຢວນຂອງຈີນຖືກບິດເບືອນໃຫ້ຄ່າເງິນຕໍ່າກວ່າຄວາມເປັນຈິງ ຫຼື ທີ່ຄວນຈະເປັນ ເພື່ອໃຫ້ສິນຄ້າສົ່ງອອກຂອງຈີນ ມີຄວາມສາມາດໃນການແຂ່ງຂັນ ເຊິ່ງສົ່ງຜົນກະທົບຕໍ່ ອາເມຣິກາ ເຮັດໃຫ້ຄ່າເງິນຢວນຖືກຍົກຂຶ້ນມາຕໍ່ລອງ ເພື່ອຫາຂໍ້ຕົກລົງທາງການຄ້າຈາກທີ່ເລື່ອງນີ້ບໍ່ເຄີຍເຈລະຈາກັນມາກ່ອນເລີຍ.

ເມື່ອບໍ່ດົນມານີ້, ທາງການ ອາເມຣິກາ ໃຫ້ຮູ້ວ່າ: ອາເມຣິກາ ບັນລຸຂໍ້ຕົກລົງໃນເລື່ອງຄ່າເງິນຢວນໄດ້ແລ້ວ ໂດຍຮ່າງ ຄວາມຕົກລົງທາງການຄ້າຈະຫ້າມບໍ່ໃຫ້ມີການບິດເບືອນຄ່າເງິນຢວນ ແລະ ຜູກມັດໃຫ້ທາງການຈີນ ລາຍງານການແຊກແຊງຄ່າເງິນຢວນໃນຕະຫຼາດເງິນໃນແຕ່ລະຄັ້ງນັກເສດຖະສາດ ແລະ ຜູ້ຊ່ຽວຊານໃນວົງການການເງິນຕ່າງງົງກັນໄປຖ້ວນໜ້າ ເນື່ອງຈາກຄໍາຖາມວ່າຄ່າເງິນຢວນຖືກກົດໄວ້ໃຫ້ຕໍ່າແທ້ບໍ່ ແລະ ອາເມຣິກາ ໄດ້ຫຍັງຈາກເລື່ອງນີ້.

ເງິນຢວນບໍ່ໄດ້ຖືກປ່ອຍໃຫ້ລອຍຕົວເປັນອິດສະຫຼະ, ແຕ່ຢູ່ໃນລະບົບຄືທະນາຄານ ແຫ່ງ ສປ ຈີນ ຫຼື ທະນາຄານກາງຈີນ ຈະກໍານົດອັດຕາແລກປ່ຽນອ້າງອີງກັບຄ່າເງິນໂດລາແລ້ວປ່ອຍໃຫ້ຄ່າເງິນຢວນເຄື່ອນໄຫວຂຶ້ນ – ລົງຈາກອັດຕາແລກປ່ຽນອ້າງອີງໄດ້ບໍ່ກາຍ 2%.
ໃນໄລຍະ 5 ປີທີ່ຜ່ານມາ, ອັດຕາແລກປ່ຽນເງິນຢວນຕໍ່ໂດລາ ປັບຕົວຢູ່ລະຫວ່າງ 6,2 ຢວນ ຈົນເຖິງ 6,8 ຢວນຕໍ່ໂດລາ ຖືເປັນລະດັບແຂງຄ່າສູງສຸດຂອງເງິນຢວນ ເມື່ອປຽບທຽບກັບໂດລາ, ຂະນະທີ່ອັດຕາແລກປ່ຽນເກົ່າແບບກໍານົດຕາຍຕົວ.

ກ່ອນໜ້ານັ້ນຢູ່ທີ່ 8,28 ຢວນຕໍ່ໂດລາ, ປີ 2017 ເງິນຢວນແຂງຄ່າຂຶ້ນ 6,3% ແຕ່ເມື່ອປີກ່ອນກັບອ່ອນຄ່າລົງ 5,7% ອ່ອນຄ່າລົງສູ່ລະດັບຕໍ່າສຸດໃນຮອບ 10 ປີ ເຊິ່ງນັກເສດຖະສາດເຊື່ອວ່າເຮັດໃຫ້ຂໍ້ກ່າວຫາທີ່ວ່າ ຈີນ ບິດເບືອນຄ່າເງິນຢວນກັບມາເປັນທີ່ໜ້າສົນໃຈອີກຄັ້ງ.

ກອງທຶນການເງິນສາກົນ ຫຼື ໄອເອັມເອັຟ ຊີ້ວ່າ: ເງິນຢວນ ບໍ່ໄດ້ຖືກກົດໃຫ້ຄ່າເງິນຕໍ່າກວ່າຄວາມເປັນຈິງ, ລາຍງານຂອງ ໄອເອັມເອັຟ ເມື່ອທຽບເດືອນກໍລະກົດປີກ່ອນ ລະບຸວ່າຄ່າເງິນຢວນໂດຍລວມມີສະຖຽນລະພາບເມື່ອທຽບກັບເງິນສະກຸນອື່ນ ແລະ ສອດຄ່ອງກັບພື້ນຖານທາງເສດຖະກິດຂອງປະເທດ.

ກະຊວງການເງິນອາເມຣິກາເອງ ກໍລະບຸໃນລາຍງານປະຈໍາປີທີ່ເຮັດປີລະ 2 ຄັ້ງ ຍັງຍອມຮັບວ່າ ຈີນ ບໍ່ໄດ້ບິດເບືອນຄ່າເງິນຢວນ.
ຢ່າງໃດກໍຕາມ, ຄັ້ງສຸດທ້າຍທີ່ມີການເຂົ້າແຊກແຊງຄ່າເງິນເຮັດໃຫ້ຄ່າເງິນຢວນອ່ອນຄ່າລົງຄືເມື່ອເດືອນສິງຫາ ປີ 2015 ເຮັດໃຫ້ຄ່າເງິນຢວນອ່ອນຄ່າລົງ ປະມານ 5% ໃນໄລຍະອາທິດດຽວ.

ຜົນກະທົບທີ່ເກີດຂຶ້ນ ກໍຄືເງິນທຶນໄຫຼອອກຈາກ ຈີນ ເປັນຈໍານວນຫຼວງຫຼາຍ ຍິ່ງເຮັດໃຫ້ຄ່າເງິນຢວນຫຼຸດຕໍ່າລົງໄປອີກ ໂດຍລວມຈໍານວນເງິນທີ່ໄຫຼອອກ ໃນປີ 2016 ປະມານ 650.000 ລ້ານໂດລາ.

ໃນລະຫວ່າງ ປີ 2015 – 2016 ທະນາຄານກາງຈີນ ແຊກແຊງຕະຫຼາດເງິນ, ແຕ່ດໍາເນີນການເພື່ອຢຸດບໍ່ໃຫ້ເງິນຢວນອ່ອນຄ່າລົງອີກ. ສ່ວນບັນຫາທີ່ເກີດຂຶ້ນໃນປີ 2018 ນັກເສດຖະສາດບອກວ່າບໍ່ໄດ້ເກີດຈາກການແຊກແຊງຂອງທະນາຄານກາງຈີນ ແຕ່ເປັນເພາະເສດຖະກິດຈີນ ຂະຫຍາຍຕົວຊ້າລົງ, ບັນຫາທາງການຄ້າກັບ ອາເມຣິກາ ແລະ ອາເມຣິກາ ຂຶ້ນດອກເບ້ຍເຮັດໃຫ້ໂດລາແຂງຄ່າຂຶ້ນ.

ປະສົບການຂອງຈີນ ໃນປີ 2015 – 2016 ເຮັດໃຫ້ທະນາຄານກາງຈີນ ຄວບຄຸມເງິນທຶນເຂັ້ມງວດ, ພະຍາຍາມບໍ່ໃຫ້ເງິນຢວນລົງຢ່າງໄວວາ ແລະ ແຮງ, ປ້ອງກັນບໍ່ໃຫ້ເງິນທຶນໄຫຼອອກ ແລະ ນໍາເອົານະໂຍບາຍຕ່າງໆມາໃຊ້ເພື່ອໃຫ້ເງິນຢວນມີສະຖຽນລະພາບຫຼາຍຂຶ້ນ.

%d bloggers like this: